（獨媒特約報導）曾任職廣告公司助理創作總監的大埔青年連桷璋，從去年開始萌生參與區選的念頭，至今年6月「反送中」運動掀起，更加驅使他下定決心進行社區工作，考慮於11月區選挑戰現屆大埔區議會主席、「廣福及寶湖」選區區議員民建聯黃碧嬌。
連桷璋曾於四、五年前參與過大埔社區學堂的工作，以不同活動推動社區連結。他對社區商討有一套看法，「點樣可以帶到民主化嘅過程？可能係居民嘅相處入面有商討元素。如果有嘅話，我地可能喺地區已經做到人民議會嘅狀態，當一個咁理想嘅狀態出現時，我哋仲需唔需要成日問政府攞咁多嘢？有啲問題係咪可以嘗試透過居民商討去解決呢？」。
也許是作為廣告人，連桷璋個人專頁非常有風格，記者與其拍照時亦相當「生鬼」。
拍攝位置所在的廣福邨平台，便是街坊聚會的地點，背後便是現任區議員辦事處
連桷璋其中一個計劃是活化已空置的私人街市，使之改變成社區市集或藝文地方。他認為區議會選舉的輸贏並不重要，最重要是他的工作能夠「connect」居民，「對於對家嚟講，佢一輸就無晒成個議席，對佢嚟講輸得好勁。但對我哋嚟講，唔緊要啦，贏咗已經刀仔鋸大樹。既然我哋無嘢輸，乜都試下啦。嗰樣嘢係開心、幫到、connect到居民嘅，我哋都想試下做」。
連桷璋自決定積極考慮參選後，已辭掉廣告公司的工作，積極投身社區。他指自己最主要的理念是推動社區民主化，「啲人成日話揼石仔揼石仔、去深耕細作，咁究竟深耕細作緊啲乜嘢先？」他眼中的「深耕細作」，並非只是解決社區問題，「社區問題本身已經係需要解決，問題係作為非建制嘅人，點解同建制有分別、點樣可以帶到（地區）民主化過程」。
他認為地區民主化的起點是良好的鄰里關係，「要落區做民主化進程，如果無人與人第一下嘅信任，其實係做唔到。我覺得鄰里關係，講緊就係一個信任嘅基礎；有咗信任之後我哋會唔會互相幫忙，就係要行動；有咗呢個行動之後，我覺得再下一步，就係我哋可唔可以進行商討，去解決一啲公共性問題，變成一個類似人民議會嘅狀態......同政府拗數嘅過程係好痛苦，當一個咁理想嘅狀態（人民議會）出現時，我哋仲需唔需要成日問政府攞咁多嘢？」
作為當區居民，連桷璋認為大埔區內屋邨的鄰里關係不俗，居民間的溝通及互助感覺都較為濃烈，「只不過未去到最尾一步，就係商討」。他指要達到「商討」這個步驟，並非一時三刻能夠做到，而是要透過「持之以恆、日子有功」去建立出來。
關於落區「深耕細作」，連桷璋已有一些具體計劃，例如建設社區經濟平台，將街坊擅長製作的食品，例如藥膳蛋等放到互聯網平台買賣，繼而「connect」整個大埔區，「過程入面有溝通，都係一個民主化經濟過程。」
近年各區自發發起的「不是垃圾站」資源回收共享平台，連桷璋自然亦有舉辦，將街坊家裡不再合用的物品放到回收站，「例如啲姨姨唔想嘥嘢，好得意，佢哋有時有個膠花樽無用，想畀其他人用，而又真係有其他人攞嚟用。」他認為這是資源重新分配，既環保又同時滿足到居民的需要。
連桷璋在大埔廣福邨平台舉行不是垃圾站及「派老牛」活動，街坊只需講出一個大埔區內問題，就可以拿走一條回收得來但全新的牛仔褲。另外他亦分享了一些資源回收資訊，教街坊分辨回收物料。
街坊可以點識佢？連桷璋笑言除 Facebook 等社交平台外，亦有街坊主動將他介紹給其他街坊認識。他表示廣福區的街坊自6月起在Facebook組織了一個群組，針對11月區選及區內事務發表意見，「其實係受反送中啟發，大家都好alert嚟緊11月有啲嘢要郁（區選），咁街坊就自己做出嚟（平台）」。
連桷璋表示，這班街坊每兩星期會自發在廣福邨平台開一次會，商討社區問題，而平台位置正位於現屆區議員黃碧嬌的辦公室前，「佢哋（居民）成日有個心態係踢走黃碧嬌，呢個好強烈，當然唔係你求其推條友、狗屎垃圾佢哋都撐你。但因為呢樣嘢，暫時我收到個 feedback 都幾好」。
連桷璋稱，自己在這些街坊會議中的身份並非社區主任，而是作為街坊的一份子去討論問題。他多次以「得意」、「搞笑」形容這班街坊，「佢哋會 evaluate 社區主任有咩做得唔好，有好多建議，我又會講我哋有咩諗法、佢哋點睇。」目前每次街坊會議都有約十多人參與，而且人數一次比一次多，感覺溫馨，「大家扶老攜幼，媽媽拖住兩個細路，都依然好想落嚟，啲?仔跑嚟跑去玩，其實成個感覺勁開心，大家又吹吓水。無非都係想咁姐，呢個畫面好值得去珍惜，係會有少少感動。」
因為街坊會議，讓連桷璋了解更多「對家」的事，「（街坊）未必畀完整建議，但至少講畀我知，原來對面個人係無心跟（社區問題）」。例如廣福商場對出的空間，經常有阿叔就地小便，而位置正正對著小學生功課輔導班教室，問題一直未有解決。有位街坊姨姨就跟他分享，「（街坊）有次朝早遇到黃碧嬌，同佢講個問題，黃碧嬌就叫佢助手即刻打畀領展經理。電話通咗，助手就隊個電話畀街坊，話『你講吖，有咩問題』。個街坊咪覺得，『講咩姐？有咩好講姐？頭先咪講咗畀你知，唔係你去處理咩？』」
「好多人問我黃碧嬌有咩做得唔好，其實我就完全唔憎佢，但我覺得佢無心。舉個例，鷺鳥林件事，就係有街坊投訴，話條路好多雀屎，佢（黃）要跟進處理。佢嘅處理其實就係將個投訴pass比政府，佢唔會跟進究竟政府用咩方法處理問題。」
「你點知政府係黐咗線咁走去劈樹㗎姐？如果你有心跟，你一早阻止咗啦。就係無心跟，最後出咗事你先知，原來政府斬樹，啲雀仔跌晒落嚟，要嘉道里嚟救，救得幾多姐其實？正正證明咗對家係無心經營，去處理社區問題。」
他續指，建制派一直以龐大資源「鞏固地盤」，「既然咁濕碎嘅社區問題，濕碎到好多嘢棘咗喺行政上解決唔到，咁佢（建制派）不如派嘢，反正佢有大量嘅錢，所有嘢都係買返嚟。佢持之而恆、行之有效，都唔需要去改變，因為已經無人打倒佢啦嘛。」連桷璋說，非建制派的策略並非去「硬撼」，「調返轉，你要諗自己有無咩重要嘅諗法同價值畀群眾」。
連桷璋想要輸出的想法，就是地區民主化，「唔係淨係香港政制左棘係度，地區問題一樣有棘到。區區每一條屋邨都要建行人上蓋，區區都總係有啲位無啦啦斷緊缺，究竟個問題出喺邊？調返轉講，我哋係咪真係得起行人上蓋呢個方法先？我假設，擺個遮筒係咪處理唔到先？又或者，我用一個共用雨傘嘅概念，係咪某程度上可以解決到？我唔敢講呢個係最好嘅方法，但我覺得呢啲係社區主任可以input嘅嘢」。
「廣福及寶湖」選區現任區議員為民建聯黃碧嬌，她於2004年當選為大埔「宏福」選區區議員，於去屆區議會選舉因選區改劃，出選「廣福及寶湖」選區，以2,248票擊敗分別獲得363票及779票的獨立候選人郭樹仁及周弘隆。黃碧嬌亦於本年4月獲補選為大埔區議會主席，接替同屬民建聯的張學明。
記者：陳康麒
部分相片由受訪者提供