月前八方睇報紙，見到話支聯會「一致」通過決議，唔俾民間團體再係六四晚會當日既天后維園入口擺檔，話阻住人流出入云云，不過支聯會自己就可以繼續擺。唔少社運人在網上鬧爆，話支聯會霸道。有支聯會成員就話係大會通過，民間團體唔去開會係佢地既責任，又話佢地依然可以去銅鑼灣噴水池、糖街入口或者場外擺檔。
八方為人無咩好，就係記性好。幾年之前，民間團體都成日因為擺檔問題同支聯會嘈，支聯會糾察仲成日差佬上身咁大叫團體留返條通道俾人入場。支聯會覺得晚會係佢地搞，民間團體唔應該係佢地個「主場」度搞其他野，又成日覺得啲團體噪音騷擾到佢地默哀環節喎。其實呢兩年啲團體已經好識做，默哀既幾分鐘已全場靜晒，但佢地仲未滿意。係擺檔問題上，民間團體就一直少理支記，話曬六四七一對香港的民間團體來說是「春秋二祭」既大事，佢地可以係當晚籌到唔少日常運作既經費，天后入口更是重要「水源」，籌款收入一般都會比銅鑼灣個邊好，又可以接觸到大量理念相近的市民，所以佢地唔多會理支記既呼籲，一早去霸定靚位開檔，呢幾年更變成「軍事競賽」咁，鬥早到場，前兩年下午兩點左右已開始有團體到，去年更有團體笑說要之前一晚扎營過夜添。
之不過去年係天后果邊就有大量市民投訴入唔到場，於是今年支記就有一個咁爭議既決議。但係八方又記得，上年D人入唔維園唔係因為團體擺檔架播，而係警方出陰招打壓。支記既李卓人上年仲鬧緊警方五宗罪，話警察提早關閉天后入口，老點市民遊花園去到差唔多海邊先屈返入去，原本10分鐘路程變45分鐘，行得黎晚會都完左。
八方上年都係天后呢邊八卦，傍晚人流未到，警方已經將入口既一半劃做緊急行車通道唔俾人行，人流入去既速度減左一半。八方去過年宵花市，從來都未試過警方封左成條緊急行車通道唔俾人行既。
果晚去到七點幾，人開始多，警方就關左天后度大閘唔再俾人入，話人流太多，但係據八方現場所見，籃球場同埋維園足球場旁邊依然有唔少位置，八方就覺得警方咁做擺明係有心刁難D遲黎既人。
就算支記中人真係得金魚既記憶力，都唔該佢地睇翻下D報紙，睇下上年發生過咩事，佢地同報紙投訴過警方D乜野。一個唔該就話大會已經通過，唔俾民間團體擺檔，好似屈左班民間團體阻住地球轉，難怪民間團體心中有氣，支記咁做仲正當化左警察既行動。
八方又要恃老賣老一下，雖然支記都同好多民間聯席一樣，好多時都係班核心主導所有決定，成員團體多少都懶得參與日常事務，但我覺得支記都可以有多啲信心俾團體同市民既，唔通團體會阻住市民去悼念六四咩，而且人流管制呢啲野係警察的責任而唔係糾察的責任，支記又何苦做醜人呢。
其實悼念六四係咪剩係得返入維園坐低、點下燭光、叫下口號、自由花血染的風采呢？好多係六四晚會籌旗救命既團體，做既野都係爭取香港民主、爭取工人權益、支援內地維權運動等等，呢D唔係就係每日都做緊八九學運既工人、學生市民所爭取既野咩？八方好希望支記中人真係諗清諗楚。
順帶一提，近年六四晚會完左之後都有野搞，2010年係幾千人衝左入中大護送「新民主女神像」，上年就係兵分兩路，一路遊行去中聯辦，一路就遊行去北角警署，結果中聯辦隊俾警察迫上行人路，北角隊就俾人拉左53件，告左8件，六月十八日起要審廿日。今年八方又收到風，有人吹緊想六四晚會完左之後遊行去中聯辦，八方就帶定花生拭目以待喇。