近年示威者走上前線，被警察和黑勢力毆打，似乎變得理所當然，抗爭門檻高得可怕。中共領導人習近平七一前來港，多名社民連成員隨即被跟蹤，古惑仔肆無忌憚在街頭對成員拳打腳踢，警察又故意無理拘捕，終於示威現場變成太平地，相當符合「國情」。
「俾人打完嗰晚，我完全瞓唔到，但唔係發惡夢，而係覺得有好多嘢要思考清楚。」上月30日被惡漢打至入醫院驗傷的社民連成員陳文威說。
示威者並非聖人，陳文威這段時間沉澱情緒和思考，想在抗爭與恐懼之間取一個平衡。在訪問中，他選擇誠實面對自己。「6月28日去完金紫荊示威俾人拉咗，困咗廿幾個鐘，唔知出面發生咩事。我喺警署門口等埋其他人出嚟，見到對面有十幾廿個人喺度，徘徊流連。個場面都幾深刻，我一個人諗住搵地方去廁所，有兩個人一路跟住我，我行入後巷，佢又跟我入後巷，我返出嚟，佢又跟住我……我嗰下係驚架！」
古惑仔在警署附近也可以目無皇法遊蕩和跟蹤，離開警署範圍後更是明目張膽。陳文威與社民連成員乘的士回家，發現有另一可疑車輛「吊尾」，最初他還以為目標人物只是社民連主席吳文遠，後來才知自己也是主角。
「第二日我要去公民廣場開記招，瞓醒時都冇心理準備，沖完涼落樓就有人影我相。嗰下都有啲手足無措，我覺得自己好廢，我係怯到跌咗部手機喺地下兩次，跟住就俾人打，同埋搶手機。俾人打完，個情緒好複雜，又驚，又嬲。我好嬲自己有近視，500度近視，500度散光，但我冇咗副眼鏡，想追返去攞返部手機又好，去還拖也好，但佢入咗後巷，我就追唔到。」
向可疑人士質問為何跟蹤自己，卻被無故打了廿鎚，但事情沒有告一段落，陳文威隨後到醫院驗傷，再返到社民連總部，樓下已有十多人守候，其中一人還「問候」陳文威︰「未俾人打夠呀？」
「夜晚我配完眼鏡，拎埋電話卡，就聽到有社記成員屋企人俾人恐嚇；跟住我去另一個成員屋企瞓，諗住第二日一齊去升旗禮示威，又有人跟住我上樓。佢哋凌晨四點幾五點，都仲喺嗰個成員屋企出面食煙、吹水、吐痰。」這些門外滋擾的聲音，音量剛剛好，大概是故意要對社記眾人發出「警告」。
那一夜，誰都睡得不好。7月1日早上，大伙兒醒過來準備去示威，但社民連用作示威的棺材，未到示威現場已遭不明人士破壞，更有古惑仔在灣仔等候社民連和眾志示威者，大剌剌地在警察面前破壞示威物品。示威者被警察以「保護」或「拘捕」之名，拉上警車，記者隨即拍攝到社民連主席吳文遠、成員陳皓恒，在警車上公然被警察毆打。
圖：七一早上公然遭不明人士破壞示威物品
事實上，噤聲的白色恐怖，以及警黑聯手成為國家維穩機器的場面，陳文威一點也不陌生。6年前陳文威踏足社運圈，替社民連助選，已見證建制派以旅遊巴接送長者投票，「掌心雷」從來不只是傳聞。
2012年陳文威加入社民連，陳母一直擔心兒子走得太前，陳則如很多年輕人一樣，暪著母親參與示威行動。翌年8月陳文威跟大隊到天水圍向落區「聽民意」的梁振英示威，親睹一眾鄉事派動員大量金毛和「口罩男」護航，黑社會當警察透明，向社民連兩名成員揮拳，「我嗰時縮埋一舊，驚媽媽會擔心，驚俾人打、俾人影到相，親朋戚友會有壓力，話佢唔識教仔。嗰時第一次知道原來參與社運係會俾人打，呢啲邏輯嗰時冇梳理得好清楚，但有種恐怖感，有啲驚，但又冇話因為咁而唔去示威。我諗係嗰時有少少睇小咗對家嘅肢體暴力。」
圖片來源：蘋果日報
時至大半年後的2014年5月4日，陳媽媽在電視新聞報道上看到兒子接受訪問，方知道兒子參加反對大白象工程示威，去到一個月後的反對新界東北前期撥款示威，陳文威仍然是騙母親「我有去，但冇衝」。
不過這次新界東北示威行動，他見證的不只是黑社會打人，原來警察都會濫權動武，「我去警署外聲援，跟住收到訊息，（被捕示威者之一）周諾恆話俾人打，人哋第一句問佢，打得有幾甘，佢話好X甘。跟住我見到啲相，有啲傷痕，嗰時好嬲。想個社會好，原來係會俾人打。」
圖：2014年反東北發展示威者佔領立法會示威區，示威者之一周諾恆被捕後在警車被毆打
警察淪為有牌爛仔，勾起陳文威兒時回憶。小時候他跟母親到超市購物，店員沒有將所有貨物收錢，卻在陳母離開超市時誣陷她偷竊，「差人嚟到，第一句就同媽媽講，『你認咗佢啦，認咗冇咁煩，冇咁大鑊』。媽媽唔識，就認咗，最後罰咗幾千蚊。我對差佬有積埋嘅嬲，覺得好仆街，跣X人。周諾恆佢哋俾人打，係將我細個積埋嘅情緒一次過撩出嚟。」
數月後，雨傘運動爆發，陳文威與社民連成員一直在旺角「擺檔」，最初只與警察對峙和推撞，至第六天黑社會兇巴巴走來拆帳篷，發生流血衝突，那時陳文威反而沒恐懼，皆因很多同路人一起在現場「頂住」，「通常我哋同啲古惑仔打，警察就會拉走啲古惑仔，轉頭喺後巷放走佢。開頭都嬲，後來就慣，我哋仲會同返警察講，『你放咗佢啦，你都唔拉架啦！』所以我哋其實係絕望架。」
圖：雨傘運動旺角佔領區
雨傘運動結束至今兩年多，陳文威指這些黑勢力實質沒消失。他認得那個襲擊他的人，以及在尖沙咀指罵外國記者的人，他都曾在黃大仙擺街站宣傳反高鐵追加撥款時已見過，「佢哋該組織起來時就組織起來囉。」
圖：2015年社民連會慶
只有23歲的陳文威，這幾年參與過多場大大小小的抗爭行動，這個本來只顧打波、打機的宅男，忽然成長，對社會、對國家機器，都有反思，「我會覺得自己準備得唔夠，唔夠堅揪，唔夠堅實。2012年佔領中環匯豐，都有古惑仔搞；李旺陽俾共產黨嘅人監生照盲；劉曉波患癌都冇得去外國就醫。呢啲嘢一路喺我哋身邊發生緊，古惑仔又好，警察又好，佢哋都係國家機器，去幫政權、資本家去維持佢哋想要嘅秩序。呢啲嘢唔應該對自己有咁大衝擊，如果我哋要做落去，就唔應該驚呢啲嘢。」
這是一個吃人的社會，把公義都扭曲。明明打人者犯法，被打的卻唯有怨自己沒有做好心理準備，諷刺非常。陳文威承認會怯，但他絕不退縮；他沒有甚麼大義凜然的鼓勵說話，卻特別想跟家人道歉，「想同屋企人講sorry。第一係我可能會影響佢哋，第二係......好sorry，我冇按照佢哋想要嘅模樣去成長，同埋做一個所謂大人。23歲，話細唔細，話大唔大，但都係一個成年人，我冇成為佢哋想要嘅，特別係我阿媽想要嘅大人，佢想我乖乖地搵錢、讀書，想搞嘢都好，都要有學歷，大個啲先啦，唔好搞共產黨，好危險架，做乜要俾人拉，有案底冇前途......」
「咁你屋企人知道你俾人打，點睇？」
「冇架......咪擔心囉......」
圖：2015年2月，時任政務司長林鄭月娥到柴灣青年廣場出席青年交流會，社民連在場外示威
圖：陳文威因在港鐵站內示威，反對加價遭控違反港鐵附例
圖：陳文威也因參與2016年反人大釋法遊行被捕
圖：參與五一勞動節遊行