＊ ＊ ＊
在話劇《蔣公的面子》，蔣介石欲兼任中央大學校長，邀請教授賞面吃飯，疏通阻力。
劇情圍繞三名教授的爭論。有人甘當政權說客；有人欲拒還迎，礙於面子，左顧右盼；有人憤慨政權腐敗，屠殺學生，但生計無著，終於擱下骨氣。結果全都接受獨裁者延攬。
到了文革，三人都想抹掉過去，互相揭發，互相指責。劇中對白俱借古諷今，放諸香港亦無巧不成話。
獨裁者來港，前呼後擁，安枕華廈，大宴三日，滿眼盡是衣香鬢影，滿耳盡是讒佞諂媚。而在遠方的病榻，一個正直的人矢志不渝，靜靜地等死。
和獨裁者吃飯，抑或與受苦的人共患難？你會怎樣選擇？
幾個人選擇後者，結果進入臭格。
＊ ＊ ＊
問：為何這次不惜被捕，走在前線？
黃莉莉：過去只係好彩冇被捕，其實一直冇缺席行動。公民抗命就係要準備好承擔後果和責任。
Oz：依半年一直都喺前線。我認為和平抗爭冇錯，就要走出嚟身體力行。
Figo：一來我地的確需要人；二來如果連我地都唔行動，仲有邊個為劉曉波行動？
我嘅政治啟蒙係六四。就係受劉曉波等人感染而走出嚟。當習近平嚟香港，有難得嘅機會可以發聲，為左劉曉波先生，我願意做更多。
黃子悅：人生第一次行動，就係衝公民廣場；往後嘅抗爭比如反釋法，我都喺現場。
我唔係任何政黨嘅成員，但我覺得喺歌舞昇平嘅時候，點都要話俾香港人同習近平聽，我地唔會啞忍，仲有反抗嘅聲音。
周庭：其實過去嘅行動，幾乎都喺度，只不過今次被捕風險係 100%。唔可以喺習近平嚟嘅時候，咩行動都冇。參與組黨嘅時候已經有覺悟。
＊ ＊ ＊
問：第一次坐「臭格」（羈留室），有什麼見聞和感受？
黃莉莉：原來唔似電影咁污糟，比想像中光亮。但有男警巡邏，就非常過分＊。
（註：警署羈留室素按性別區隔，通常一方是男，另一方是女。）
開始時係女警巡邏，跟住就出現男警。我地質問阿 sir 點解可以巡女仔依邊，女警話阿 sir 都要入嚟「睇吓」，勸我地唔好有咁大動作，阿 sir 經過會見到。
我心諗：「睇啲咩呀？」
Oz：我冇入到正式「臭格」，一直喺臨時羈留室＊，大約一張床嘅空間，長度和自己的身高差唔多，根本瞓唔到。
（註：此前有疑犯拿走欄外電腦 van 線自殺，即屬同類地方）
警察一直剝削嫌犯應有權利。我不斷要求見律師，對方不斷話律師忙緊，冇時間。出嚟問番律師，律師話一直等緊我地。
Figo：被捕後警察問邊個可以先落口供，我立即舉手，點知就去左臨時羈留室一直等，最後才轉到「臭格」。臨時羈留室冇窗兼壞冷氣，好焗。
黃子悅：過去都係聲援被拘留嘅人。真係入到去，先體會到幾辛苦幾難捱，警察不斷刁難。
我要長期食藥，拘留時唔准食現成嘅藥，一定要去醫院再處方。期間雙手反鎖身後，要求好多次先可以放喺身前。雖然有權聯絡律師，但警察都用唔同嘅理由拒絕。
喺臭格嘅時候，女警曾經講過，女性羈留室只有女警經過，但冇幾耐就有男警巡邏。
周庭：警方處理得好慢，當然係特登嘅，困得幾耐得幾耐，減少我地喺街上嘅機會，我係最後嗰幾個落口供。
當晚 12:30 大家先可以食飯，但都唔算乜嘢，最過份係女倉有阿 sir 巡邏。因為臭格嘅蹲廁喺欄杆後面，冇門冇遮掩，路過嘅人都會睇到，但巡邏嘅竟然係男人。
＊ ＊ ＊
問：「冇用」、「鳩做」、「博拉」、「呃光環」。。。大家耳熟能詳。你們認為是否值得？
黃莉莉：而家大家都覺得無能為力，行動力非常之低。我地講唔到有咩成果，能夠做嘅就係開始同嘗試。我覺得值得嘅。
Oz：值得。可能影響唔係好大，習近平根本冇回應。但起碼俾港人睇到，依然有人願意抗爭，抗爭可以點做。
Figo：要睇件事重唔重要，影響大唔大。件事衝住習近平而嚟，既要表達二十年嚟一國兩制愈嚟愈差；亦要為劉曉波發聲。
行動前我地清楚思考過代價，覺得負擔得起，值得做咪做囉。唔好咩都諗「係咪鳩做」，都未做又點知效果係點？
喺金紫荊嘅時候，黃之鋒向大家喊：「香港人唔好放棄」，好講得出我嘅感受。
六四又鳩做，七一又鳩做，結果咩都唔做。。。唔一定要勇武抗爭、公民抗命，但香港人應該要諗，要做，要出嚟，嘗試用唔同方式表達訴求。
我地就係想叫香港人唔好放棄。
黃子悅：好多嘢都唔會有即時成果，但喺依個時候，總要有人出嚟，戳破歌舞昇平。我地唔係咁諗，我地願意反抗。
周庭：行動要累積架。唔係一開始就可以佔領到政府總部。運動就係由一個個微小嘅人累積起嚟。
大家都好憧憬一場新嘅反國教或者雨傘運動，但運動唔會無端端爆出嚟，總要有人參與，每一次小行動都有意義。已經考慮清楚，如果要坐監咪坐監囉。
＊ ＊ ＊
問：在七一街站，警察揚言「信唔信我掹槍呀？」你就在警察和林淳軒中間，一時看著朋友，一時望向警察。當時有什麼感受？
周庭：我都聽到佢話掹槍，當時唔係嬲而係呆左，諗唔到佢會咁講。但事後就覺得非常之嬲，警察應該有專業操守，唔可以亂咁講。
＊ ＊ ＊
後記
訪問時筆者口沒遮攔：「唔好意思要影相，因為要呃 likes。。。」說後深感愧疚。
抗爭最大的艱難，未必是審訊或坐監，而是奚落的話。部分受訪者一直受狙擊，自己是否只想消費外貌，卻不惜連累人家？
筆者設想了一個類似電車難題的思想實驗扣問自己：
假設共產黨也抓了我，要我為蔣麗芸拍同樣的人像照。答應的話有一百萬，拒絕的話只能自殺。
共產黨：「要影到好似你影周庭咁靚，明唔明白？」
筆者：「依個比較難。。。」
共產黨：「喂都唔同嘅？」
筆者：「？」
共產黨：「你要影到蔣麗芸好似周庭咁抬起頭。。。」
筆者：「。。。」
筆者無法想像下去。雖然千古艱難唯一死，但為保攝影師的尊嚴，無奈只可揀自殺。
過得到良心這關，就覺得淡定。
每次在街頭，其實都很害怕，害怕自己能否再付得起代價，卻不忍由其他人承擔，心就在兩者間掙扎。
筆者清楚他們都面對同樣困惑，尤其傘運後一夜白髮，付出絕不止青春那麼簡單。
中過箭的人都會明白，你寧願用一日監禁代替一個箭疤。
他們做的事未必正確，但他們走過失敗的蔭谷，找回自己所沒有的勇氣。不止面對審訊和刑期，還有負評。但他們終於收拾心情，踐行不息。
筆者不會懶清高地否認外在美，卻篤信真、善、美是一體的。美固可惹人顧盼，但從來只是錦上添花。沒有審美觀可以脫離價值。照片焉能喧賓奪主，只能叨他們的光，希望配得起他們。