識我既人都知，大型示威我最叻唔係衝，而係走佬。如果講講就大大聲，做就收皮走佬，我絕對係第一位。但今晚我竟然要收山了，我真係估唔到唔係被警察打，而係被班白衫撐政府黑社會打先。
西鐵去到元朗站開門個時，已經聽到下面打到鬼曬咁嘈，月台有唔少市民叫大家唔好落車，因為下面有班白衫人追打緊所有人，係所有人。因為有人係月台問有無人識急救，話有人被人打爆頭，而部車都完全開唔到，所以唯有走落車睇下可以點幫手。
元朗西鐵站係一個兩層樓既建築，列車月台位於上層，下層就係入閘區。我走到落入閘區，已經見到班有手持國旗，木棍，警棍既人係咁追打市民，有市民用雨傘自衛還擊，同用滅火喉噴射白衫襲擊者。忽然間，班白衫人衝入入閘區追打市民，我立刻轉身向月台逃走，但已經走避不及，我既背部，頭部，右手已被多人用棍攻擊，眼鏡也飛脫。
當時我同市民一起跑到未能開出既列車，當時列車已經企滿人，本以為列車開及時開出，但一眾白衣人衝上月台，除左追打未能上車既市民，更衝入列車內不停用木棍攻擊列車在既市民，因為列車未能開出，手上也無任何武器，因此我地唯有將大家既背包當成盾牌，去阻擋佢地大約七，八波既攻擊。有不少市民受傷，包括一名係月台走避不及，被人打到頭部流血不止既大叔。有人禁列車既通話器，但列車竟發出列車暫停服務，要求乘客離開車廂既訊息。
最後我地中左幾十棍後，班白衫人兇我地話叫我地唔好再入來元朗，然後列車先開始嘗試關門。但每次關門失敗，就會吸引左個班白衫人前來揮棍攻擊，關門後大約三四次後，車門才成功關上，並且離開。
我想講，個班白衫人聲稱要針對遊行完既市民，但其實車廂內既人，又或者被打到頭破血流既市民，大多都不是遊行完回來的，他們有些是同朋友食完飯，有些是放工回來，但在元朗西鐵站內，無一倖免。最後我係朗屏站落車，車內被人打左十幾棍既市民，嚇到捉住我，叫我唔好落車，好驚再有人來打。不過好在，當時朗屏站無事，所以我先可以逃走。
翻到屋企，我檢查我既傷勢，我既右手食指被打發腫，前臂有棍傷，頭有少許流血但已止血，以及我既左背有四至五個被棍襲擊既傷痕。但我其實已經算輕傷，有不少市民都被打到頭破血流。
最後我想講，係成個襲擊過程，元朗西鐵站係一個警察都無，完。