懵，
是佛家獨門暗器。
尋日家好月圓入面，
JO爸畀個契家婆紅姨同條患左絕症「忽然因果」嘅老契，
施展「順勢屈法」嚇到以為「因果報應」，
連視角膜都嚇到甩左，
驚到嗌生嗌死，
話個天收佢喇，
因為拋棄糟糠之妻嘅人都冇好結果架！！
死梗啦死梗啦！！
荷媽一到，
見佢個衰款，
就知佢畀人落左「降」啦！！
自己隊自己、
以為黑勢力係出面、
想著草又唔認得路，
乜Q症狀都有齊。
荷媽整左幾十年餅，
搓粉搓到撲拓學專家都冇訂企啦！
第一件事就捉住呢舊成PET野嘅「麵粉」JO爸，
大喝一聲：
「你話畀我知個天離個地幾遠？
東邊離西邊有幾遠？」，
嘩！！
高人一出手，
便知有沒有呀！！
曉得用「禪機抽離法」食住「順勢屈法」認真唔簡單！
JO爸畀人捺住個油門係咁SIR緊落去個「私家地獄」，
邊度肯剎車呀！！
佢地根本以為個剎車制一早畀自作自受嘅因果塞住左啦，
突然聽到荷媽咁問，
仲黐多二錢重，
「你係咁嘅時候，
仲問天仲問地做乜呀？」
荷媽搓佢唔掂點做荷媽呀？
再大喝：
「你答左我先啦！
你話畀我知個天離個地幾遠？
東邊離西邊有幾遠吖？」，
JO爸架車仲去緊，
「豈，
我點知個天離個地有幾遠啫？」
荷媽聽後一手翻掌捺住舊麵粉，
「咪係囉，
你連個天離個地幾遠都唔知，
你又點解會知個天想收你呢吓？」，
嘩！！
咁都得！！
呢D簡直係垃圾劇之冠呀！
如果你係咁諗，
你又見到濟公當公公喇！！
點都得！
捉得老鼠嘅就係好貓，
黑與白真係咁重要咩？
天都唔知係邊豎，
你又成日話天收你，
神係你鬼係你都唔止啦，
而家要個天都你DO埋？
邊度咁冇天理呀？
唔知天唔知地，
唔係無明，
係懵！！
無明至以為自己知天知地知神知鬼，
所以先至咁大鑊！
懵就唔同喇，
如果你查吓佢張身份証，
就知佢仲有個名叫「放下」，
呢個朵佢就係太張揚，
佢出嚟行好少用！！
懵，
就是只知「天生天養」，
其他一概不知，
你成日搵我笨叫我自己搞點，
我懵嘅，
點知咁賊多野？
吓？
吓？
吓？