「我作為公眾人物，已經準備好冒住失去生命、以至犧牲一切的風險去做（保護人民）這件事。」
講呢句正氣說話嘅，並唔係尋日企喺撐警大會嗰一邊嘅鍾鎮濤、譚伯或者係梁家輝，相信佢哋唔會有腦甚至有勇氣講得出，呢番說話其實係90年代克羅地亞傳奇球員波班（Zvonimir Boban）講嘅。
80年代，南斯拉夫面臨分離局面，「南斯拉夫社會主義聯邦共和國」入面嘅各個共和國紛紛爭取獨立，不同族嘅人都會以支持當地球會以宣示自己政治訴求以及身份認同，足球場漸漸成為一種政治角力場地。去到1990年，更發生咗一場影響當時局勢嘅比賽－克羅地亞球隊薩格勒布戴拿模，主場迎戰塞爾維亞代表貝爾格萊德紅星。
呢兩隊波本身都係死敵咁款，基本球迷都會帶備刀仔、水樽旁身，甚至只要身上有乜嘢可以掉出去嘅嘢都會成為武器；同時兩隊當中亦有分別叫Bad Blue Boys及Delije嘅民族主義狂熱分子喺度，所以每逢對頭都會有大量警察守候。
比賽開波唔使10分鐘兩隊球迷已經喺看台上打鬥緊，紅星球迷更破壞球場一切設施，連座椅都被拆出嚟做武器，搞到場波要暫停，甚至發展到「全民開打」，鎮暴警察好快就出動，但係一班警察只係追住克羅地亞人打，對塞爾維亞人係有「保護」嘅傾向。
當時仲留喺球場嘅波班，見到一個塞爾維亞人嘅南斯拉夫警察不斷追打克羅地亞人，作為克羅地亞人嘅佢做咗最人性、最不假思索嘅動作－衝前飛踢一名「拳打腳踢」緊嘅警察。
波班起腳後，戴拿模嘅球迷即刻上前保護波班離場。賽後，波班講咗呢番說話：「由貝爾格萊德來作客的流氓破壞我們的球場，但警察只為政權服務，對這一切視若無睹。我作為公眾人物，已經準備好冒住失去生命、斷送足球生涯以至犧牲一切的風險，去做這件事，原因只有一個，我是克羅地亞人。」
最後，波班因為呢件事被罰停賽半年，更被禁止參加當屆世界盃，但佢不假思索保護克羅地亞人嘅呢一腳，令佢成為克羅地亞嘅民族英雄。
我諗人民推祟佢，唔係因為佢起飛腳呢一下踢得爽幫佢哋出啖氣，而係作為有影響力嘅人，佢明辦事非知道對與錯之餘，佢更冇因為自己身份選擇沉默，反而係用自身力量保護人民。我諗波班嗰刻已經冇諗自己係唔係球員身份，而係以一個克羅地亞人身份做呢件正確嘅事。
我想講嘅係，作為有影響力嘅公眾人物，你係應該要識分辨事非，用你嘅力量保護支持你嘅人，或者係手無寸鐵嘅人民，而唔係為自己利益而沉默，更加唔應該係助紂為虐，事非不分，仲要拋低一句無腦嘅說話：「我不理政治，只為公義」。