中學時期，同班的一個女仔超迷朗尼，迷戀到一聽「Rooney」又或者「Wayne」已經會瘋狂起嚟，即變心心眼，又狂嗌朗尼bb。佢會自製朗尼banner滿足自己、身上總會搵到同朗尼相關嘅相或者物品，仲會叫朗尼做老公。
女同學樣子不賴，性格都幾得人鍾意，唔係重點，但都想講下。好多男同學知道佢鍾意朗尼都呆咗，唔係呱，鍾意朗尼！？其他女仔鍾意碧咸、雲達華治、卡卡，唯獨佢就鍾意人人都叫佢做史力加嘅朗尼。當時迷到天下女士嘅C朗在她心目中僅排第二，由始可見，朗尼在她心目地合有多懸殊。
如果同班有男同學笑朗尼，佢真係會唔開心到喊出嚟，可能只係好小事笑一聲：「朗尼咁撚肥」，佢都已經會雙眼通紅，成日都一邊滴淚，一邊笑住講：「無嘢呀，我眼淺渣。」
其實我有問過佢點解咁鍾意朗尼，佢話覺得朗尼個樣好cute，肥得嚟幾可愛，其實聽到都唔知畀咩反應好，品味嘅野，各花入各眼，我真係識條春。
個陣嘅曼聯，仲係費格遜領軍之年，仲有加利仔鎮守右路、雲達沙把關、星仔無限奔走、C朗開始變得成熟、蘇B得閒繼續做後備殺手，當然唔少得如日方中嘅朗尼。而我隊阿仙奴，正開始由盛轉衰，傷心嘢真係不堪回首。
其實佢以為我鍾意曼聯，我都唔知點解，可能因為有次我問佢朗尼英文名點串而以為我都係同道中人，但我又無否認，雖然我真係唔係。有次佢搵我陪佢去睇曼聯來港七人賽，我又唔知點解會陪咗佢睇，仲要幫曼聯加油，不過個陣我又志不在此。
其實每個男生都希望會搵到個鍾意足球嘅女生，唔好講到話識吹波經，只要肯一齊睇波而又唔會嫌悶，已經足以加分，加你五十分！不過我又諗，如果當真係搵到個同自己趣味相當嘅女生，但佢同你支持嘅係敵對關係，佢亦會迷戀到某個球員如同自己男友或者老公，唔知會有咩感覺？ 不過，佢係我心目中，應該只不過是一個黃翠如，我亦只不過係張保仔......幾好傾，但絕對唔過電個隻。或者如果我肥啲，頭髮少啲，似史力加多啲，佢應該會鍾意咗我。
Anyway，我這個超迷戀朗尼嘅女同學，直到畢業之前，我都仲知道佢係咁迷朗尼，但迷到咩地步不得而知，畢業後已經無聯絡7~8 年了。呢7~8 年，朗尼肥咗、頭髮多咗；上過神枱，做過地底泥；做過可靠神鋒，亦做過九流射手；扭過計轉會，最後又留隊做最高薪一人。而兩樣嘢經歷咁多年都無變，一，仍然都是球隊必然正選；二，仍然都畀球迷瘋狂批評和問候，係唯一一點有加無減，每一次批評、每一問候都愈嚟愈入肉、愈嚟愈人生攻擊。
雖然Keep 住打正選，兼破英格蘭最多入球紀錄，但望住今時今日嘅朗尼，已經找不到當年仲可以凌空飛起嚟個倒掛再將個波送入網裡嘅嗰個朗尼。
今季曼聯踢足咁多場，朗尼畀球迷小足咁多場，而今場聯賽盃，朗尼無波入，去到十二碼大戰，仲要第一輪射失，球迷嘅容忍早已超出負荷，而雲高爾亦看似已到臨界點，忽然，諗起呢位曾經超迷朗尼嘅女同學......
從前朋友好嗎？尚獨身嗎？還想朗尼嗎？（我知唔岩音）