【獨媒報導】民主派初選47人案，案中被告被控串謀顛覆國家政權，被判入獄5年7個月的伍健偉，他今日在中秋節刑滿獲釋。初選案被告出獄後各有不同路向，部分人已離開香港。伍健偉接受《獨媒》訪問時表明會留在香港，「在適當位置幫香港進步」、「達到夢想」：「一個自由、公義、人人都免於恐懼嘅香港。」他又分享在獄中看到一篇俄羅斯作家的文章，指該國良善的人唯一出路便是監獄：「如果用我嘅版本，一個追求真誠嘅人，佢唯一嘅歸宿亦都可能係監獄。我呢5年7個月，有傷心，有迷惘，有憤怒，但我無一刻唔為我自己去驕傲，因為我當年選擇咗做一啲為香港更加好嘅事情，我有選擇去付出，我有選擇去犧牲。我亦都可以有幸為呢個地方，同我鍾意嘅香港人去付出呢一切。對於呢件事，我從來無後悔過。」
現年31歲的伍健偉，本身在銀行工作，在反修例期間成為天水連線成員，在2019年區議會選舉中參選元朗嘉湖北選區當選，及後參加民主派初選，在新界西以第四名出線，其後被警方國安處拘捕，被控串謀顛覆國家政權。
在案中，伍健偉最終認罪，及被法庭列為積極參加者。然而，他在求情信中稱不會為自己相信的價值而道歉，除了認罪之外沒有其他求情原因。法庭最終採納7年監禁為量刑起點，並因應他其認罪，即在開審當日才認罪，給予20%扣減，總刑期為5年7個月。
中秋出獄感高興 不忘支聯會案、蘋果案等被告
伍健偉今早由懲教人員從石壁監獄送到市區，他在元朗接受傳媒訪問。《獨媒》問到在中秋節出獄，會否特別有感受，伍健偉指不知不覺已在囚5年7個月，自言沒想過在中秋正日出獄，在獄中沒有特別計算：「喺監房數住，始終一日又一日係幾辛苦，反而唔諗眨吓眼就過咗去。」
不過，伍健偉表示不少反修例案的被告，及同案被告仍在服刑：「中秋節我有啲高興，見到伴侶、朋友，同時間有啲唔舒服、感觸，因為仍然有好多人未必可以同親友一家團聚。」他特別提到早前支聯會案、蘋果案等被告被判刑，「所以有好多感受」。
準備好迎接「新世界」？ 伍健偉稱用新方法貫徹信念
有同案被告在刑滿出獄後，形容來到了「新世界」，《獨媒》問伍健偉是否準備好迎接「新世界」。他稱在囚期間只能透過報紙了解香港，因為5年均獨立囚禁，沒有機會看電視，只能依靠收音機了解香港：「仍然留喺香港，選擇留喺香港嘅人，我哋係要面對個現實。但面對現實唔等如我哋接受現實，我哋客觀環境係時代唔同咗，無論紅線、可以做嘅嘢，甚或資源、人脈都唔同晒，呢個係唔能夠否定。既然現實係咁。我哋只能夠用新嘅方法去貫徹我哋嘅信念。」
談到未來路向，伍健偉稱相信每人都對自由及公義帶著熱熾的期望，未來會由堅持相信改變、具行動力的人所創造，監獄不能阻止人對自由的渴望，恐懼同不能阻止良知的呼喚，一時的挫折更不能阻止追求夢想。他表示仍有很多人希望香港變好，並在不同崗位努力，但認為需要更有智慧，必須更團結、堅定才能達到理想。
獄中曾感傷心、迷惘、憤怒 感有幸為港人付出
伍健偉分享在獄中看到一篇俄羅斯作家的文章，指該國良善的人唯一出路便是監獄：「如果用我嘅版本，一個追求真誠嘅人，佢唯一嘅歸宿亦都可能係監獄。我呢5年7個月，有傷心，有迷惘，有憤怒，但我無一刻唔為我自己去驕傲，因為我當年選擇咗做一啲為香港更加好嘅事情，我有選擇去付出，我有選擇去犧牲。我亦都可以有幸為呢個地方，同我鍾意嘅香港人去付出呢一切。對於呢件事，我從來無後悔過。」他續指，雖然自己只是普通人，但仍有很多可以為香港付出的地方：「每一個改變都係由普通人一小步開始。」
初選案被告出獄後各有不同路向，部分人已離開香港。伍健偉則表明會留在香港，「在適當位置幫香港進步」、「達到夢想」：「一個自由、公義、人人都免於恐懼嘅香港。」他特別向看到今次訪問內容的人說：「我哋約定再見，就會喺我哋應許之地再見。」
伍健偉又表示，假若街坊尋求協助，自己仍會盡力幫忙：「當然新時間我哋都有一班專業嘅區議員，我香港希望佢哋做得好服務，唔洗話令其他人操心啦。」
回家後要立刻做家務 在囚期間從未一覺瞓天光
出獄後的伍健偉變得長氣起來，他叮囑街坊：「大家唔好覺得呢個地方好多嘢，就咁就算，好多嘢講咗無用，做咗無用，有無用係靠時間同埋行動先至顯示到成果，冇人知道蘇聯突然間1989年宣布瓦解，亦都冇人知道2019年會發生咁大嘅社會運動，甚或至我冇諗過今日出嚟，一切都係有因果同因由，每一個人做嘅行為都會影響住你，大家交俾時間同埋自己嘅信心，希望大家相信互相扶持嘅人，香港最缺乏信任他入嘅能力。」
在出獄後，伍健偉第一件事是與伴侶、家人在元朗飲茶，笑言回家後要立刻做家務：「嗯，我連擁抱同親吻都好唔現實呀呢一刻。」他提到在獄中常常發夢，每逢周六、周日可以到牆外放風，並與女友歡聚，然後返回荔枝角收押所單獨囚禁。他表示，入獄前是鬧鐘都叫不醒的人，在囚期間卻從未一覺瞓天光，每晚都會因為不同事而扎醒，早上眼光光等待懲教人員開燈。
獄中單獨囚禁 自言更成熟、盼修補昔日關係
說到這裡，伍健偉有感而發向反修例案在囚被告的家人說，「其實我哋係好感謝每一個仍然等待佢哋嘅親友」，惟獄中生活影響了他們的情緒，令探訪期間說了些難聽的說話，希望家人體諒：「佢哋其實係明白到呢份感情難能可貴，明白山長水遠、長途跋涉、不辭勞苦為我哋打點生活上一切係無價，相信有一日可以團圓，希望大家互相幫忙扶持。」
伍健偉笑言年輕人愛食麥當勞，老人家愛上酒樓，自己不知不覺已成為老人家：「我24歲入監房，出返嚟31歲，我未習慣到我係三字頭，我未習慣到被人叫Uncle嘅年紀。」他除了感謝伴侶在其在囚期間的支持，亦感恩母親一直探望自己：「我希望有一日我哋可以食餐好。」
在獄中，伍健偉被懲教單獨囚禁，他稱壞處是減少與他人接觸，好處是有更多時間思考及進修，在囚室內睇報紙、讀書及做運動：「我會覺得係香港市民俾咗個機會我放大假，一直以嚟喺出面我連三餐都好少食足，瞓覺時間又少。」他認為，獨立囚禁令其能處理好心情及處事態度，自己變得從容、成熟及更願意相信其他人，感恩在獄中遇到很多善良的人：「我希望可以繼續幫助唔同嘅人，同修補一啲我以前處理得唔好嘅關係。」
感謝好兄弟林進及伴侶支持 難耐獄中酷熱天氣
在入獄後，伍健偉獲好兄弟林進一直支持，他形容二人關係微妙，並重提初選的時候，林進其實曾經成為名單的第一位：「今時今日倒推嘅話，呢5年7個月可能係我支撐林進，呢個緣份都幾微妙。」他不忘讚賞林進，指他仍熱心為值得付出的人和事繼續付出，在獄中能夠自己處理的事便不會打擾對方及伴侶：「當你每日四面都係牆，只有一、兩扇窗嘅時候，每日最期盼就係探訪同派家書，代表住有人記得我哋，未忘記我哋，等緊我哋。」
伍健偉今日的裝束是前年求情及判刑的衣服，波鞋還是沒有鞋帶的，他自嘲數年來出庭都「唔理下身」：「好似力威健身咁，淨做上身！但求上面見得人，如果下面可以著短褲，我都唔介意著短褲。」他進一步提到，自己還未習慣穿衣服，酷熱天氣情況加劇，尤其在囚期間不想有任何活動，只想像企鵝般涼風扇，指懲教人員亦熱得非常大汗：「地獄啲就係好彩我唔係20年後先坐監，我好擔心有一日可能真係會熱到暈。」
在民主派47人案，45名罪成被判禁監的被告中，連同伍健偉，已有22人刑滿出獄，包括毛孟靜、范國威、譚文豪、郭家麒、岑子杰、李嘉達、譚凱邦、王百羽、馮達浚、劉澤鋒、吳敏兒、袁嘉蔚、徐子見、趙家賢、朱凱廸、岑敖暉、梁晃維、張可森、楊岳橋、胡志偉及尹兆堅。其中趙家賢為國安案首名因行為良好獲扣減、提早獲得釋放的被告。