【獨媒報導】政府昨日向宏福苑居民發出「收購建議信件」，至於未受大火波及的宏志閣，如於6月30日前有75％業主簽署出售業權信件，亦會一併納入收購方案。今日上樓執拾的住戶陸小姐表示希望原址重建，強調宏福苑是區內首屈一指的居屋，亦難以理解未受大火波及的宏志閣，卻變成管理公司合安口中的「蓉蓉爛爛」，需要花費3,000萬維修：「點解突然間去到今日同我講係變咗爛樓先？點解你會變到我哋而家冇水冇電，乜嘢防火、石油氣都冇晒？」
稱一直盼重返居住 惟官方復修時間一直推
陸小姐一家居於宏志閣中層單位，今日與父母及女兒再次上樓執拾。她憶述上次只有1.5小時，僅取走護照、樓契、現金及金器等，「因為當時想佢係諗住復修嘛，即係我當可能你復修一個月，我就上返去啦嘛，咁梗係淨係攞冬天衫再加其他嘢⋯⋯當其時諗住冇燒過，我哋冇波及，政府新聞一路都話唯一一座冇波及，冇波及理所當然梗係上返去住。」
陸小姐續指，今次執拾物件的取向不同，「今次唔同啦，你睇吓政府講到我哋危樓咁樣」，提及第一次政府說復修宏志閣需時最少兩個月，後來麥美娟改稱9個月，現時合安卻指可能有法律程序問題，9個月亦未必完成復修：「一步一步咁推啦，我之前諗住一個月，但係而家唔係一個月啦，我而家係要執最少九個月嘅嘢落嚟。」她表示，今次至少要取回保單、獎狀、證書、夏天衣物及家品，又認為不會當最後一次回家，反問「40幾年執三個鐘，咩邏輯呀？」
資料圖片
盼原址重建 指區內第一居屋
被問到會否出售業權，陸小姐堅決稱希望「原址重建」：「你諗吓我哋呢個地段，呢個交通網絡，無一個（媲美），我講大埔居屋呢個係number one嚟，你搵一個俾我睇。」她指宏福苑最高峰時期售價400至500萬，目前樓市至少上升10%，認為政府收購價不合理，「我哋唔係要佢恩恤，政府係要賠償」。
她提及未有聽證會前，居民已認為政府責任至少佔七成，其餘則涉及宏業及鴻毅，「聽埋聽證會係市民都知道，我哋宏福苑嘅居民已經行得好前㗎啦，好似陸官話齋我哋投訴過10幾、20次，但係你聽下聽證會佢哋嗰班父母官點樣講？唔理想，可以做更好喎。」她指168條人命涉及近2,000個家庭：「牽涉嘅真正家庭係咪咁少呢，藤㨢瓜瓜㨢藤，眼淚同傷心都唔止呢個數，呢啲唔係數字，冇事冇幹點解唔俾我哋返去？宏福苑唔淨止宏志閣，宏建同宏盛都好完好㗎。」
資料圖片
不滿合安稱宏志「蓉蓉爛爛」
對於合安指重返宏志閣居住，業主須付3,000萬維修費。陸小姐不滿宏志閣變成合安口中的「蓉蓉爛爛」，指大火當日「我哋仲可以喺個廚房煮九大簋」，至12月仍有水有電，質疑「點解突然間去到今日同我講係變咗爛樓先？點解你會變到我哋而家冇水冇電，乜嘢防火、石油氣都冇晒？」
她又不解其他7座可以用捐款收購業權，3,000萬卻不能動用善款維修，「成日都話情行先，乜嘢都睇唔到，你唔好話情，我而家覺得政府連個理都冇，法理都無」。即使最終須強制出售業權，陸小姐稱：「起碼我哋有堅持，唔係話我哋企企定⋯⋯我哋聽陸官講我哋發緊聲，我哋同政府發緊聲，我哋要返去住。」對於初時稱重建需時10年，她就指：「我老竇80幾歲都話等。」
盼開業主大會 嘆只可與家人訴不滿
陸小姐亦支持盡快召開業主大會，對於合安稱要需時核實簽名，她認為問「一戶一社工」便可，指合安能夠將市建局大維修資助退回：「咁你合安核實到市建局嗰個簽名，退返個津貼俾我哋，點解呢個名咁難對？堂堂咁大間公司。」她提及當時可以逐一找暫住不同過渡房屋的居民簽署，「嗰個都簽到名，咁點解你呢個咁簡單得個 200零個名簽唔到？但係千幾戶嘅名你又可以簽到呢？」
至於如何爭取召開業主大會？陸小姐反問「其實可以點行動，邊個夠膽行動？」她坦言行動擔心誤觸國安法：「我哋唔敢講，只要同第三者講就係叫做煽動，以我理解⋯⋯我唔可以煽動人哋情緒，以災亂港㗎嘛，我有不滿咪淨係可以同屋企人講。」