（獨媒報導）律政司副司長張國鈞明日啟程前往歐洲，與三大國際私法組織舉行會議。他出席電台節目時表示，會做足功課，講出《國安法》實施後的真實情況：「我哋覺得係理直氣壯，怕咩呢？」他又表示，會邀請有嚴重質疑的人親身來港看看：「你自己上條街度行，睇吓啲人係咪驚隨時被人拉，係咪唔夠膽亂咁⋯⋯驚亂咁講嘢會被人拉？」
稱會講香港真實現況：最緊要理直氣壯
張國鈞表示會抱平常心出訪，有疑問就會解答：「我哋覺得係理直氣壯，怕咩呢？我哋宜家係講真實說話喎，有邊句係謊言呢？香港國安法實施咗之後，香港係咪變得穩定？法庭係咪一直以來繼續秉持公義，無論咩人審訊都係公平，我哋見到。有冇人質疑香港嘅法庭係偏袒呢？我哋係帶一啲事實過去，最緊要我哋自己係理直氣壯。」
他提到，在西方媒體和政客影響下，有些人對香港的印象有疑問，故會邀請有嚴重質疑的人親身來港看看：「嚟兜個圈，勝過千言萬語。」「你喺外國成日話我哋唔好，你自己幾耐冇嚟過香港先？你自己上條街度行，睇吓啲人係咪驚隨時被人拉，係咪唔夠膽亂咁⋯⋯驚亂咁講嘢會被人拉？」
張國鈞指，無可否認西方政客會以《國安法》為藉口遏制香港，但認為仍有很多地方的朋友是客觀和理性，不想在中國與美國之間靠邊站，會尋找合作空間。
稱早前訪中東無人問《國安法》
張另提到，早前出訪中東前已準備了有關《國安法》的資料，惟完全沒有當地人問他相關問題。主持問是當地人不知道香港有《國安法》，抑或不擔心《香港國安法》時，張回應指「唔好睇小佢哋」，指當地人已掌握全球的投資環境，包括香港情況，反而關心香港在法律上如何保障外國投資及上市規則如何運作。