【獨媒報導】商台節目《又係時候同一天講再見》一連四集訪問文化體育及旅遊局局長羅淑佩，是節目首位訪問的政府問責官員。羅淑佩另一為人熟悉的身分是「MIRROR」成員陳卓賢（Ian）的歌迷，她笑言以前不是經常出席追星活動，亦有朋友陪同，不過近年擔任局長後已不方便再參與。她又提到本月曾與Ian同場工作，分別擔任活動的表演及頒獎嘉賓：「大家好professional㗎嘛，見到面打個招呼當然會啦，但我唔會用嗰啲時間追星㗎嘛。」
與Ian同場工作 僅見面打招呼
羅淑佩曾在電台節目中透露自己是「Hellosss」，即「MIRROR」成員陳卓賢的歌迷，更被曾拍到出席活動追星。羅淑佩先向主持陳志雲笑言近年不方便再追星：「多得你囉，就係因為你個節目，所以人人都覺得我而家剩係追星，乜都唔做。唉，係就好，我都想，哈哈。」被問到有否因為工作而犧牲參與追星活動，羅淑佩坦言：「其實我嗰時都唔係去得多，大家見到我係一件事，就係我喺機場出現嘛，真係好傻講到我好似一個人入去追，然後企喺後邊一路跟住我個偶像喺度行喺度笑。」她澄清當時有朋友陪同，兩人正在談天，只是報導刪走了站在旁邊的朋友。
至於會否因避嫌而不邀請陳卓賢出席政府活動，羅淑佩表示不會著人「搵邊個唔搵邊個」，通常交由同事決定人選。她又提到在剛過去的「浪琴香港國際馬術盛典2026」，二人亦曾經同場，分別擔任表演及頒獎嘉賓：「大家好professional㗎嘛，見到面打個招呼當然會啦，但我唔會用嗰啲時間追星㗎嘛。」
資料圖片
曾檢討以球迷身份發文
除了是歌迷，羅淑佩亦是資深足球迷，在港足不敵新加坡，無緣晉級2027亞洲盃決賽周後更曾在社交媒體以球迷身份發文，指與時任主教練韋斯活想法有差異，需研究反思。她指後來有為此事作「自我檢討」：「如果你話做問責官員有咩要犧牲？可能呢一啲就係啦。我不嬲都係有碗話碗、有碟話碟。」她強調當時只是表示「要去諗一諗啫」，港足於日後賽事會否有更仔細部署、更考慮球迷的感覺，「而家事後睇起上嚟，如果大家有咁大嘅感覺，我以後會小心㗎啦」。
韋斯活之後離任港隊主帥，有聲音認為是「政治干預足球」，羅淑佩亦主動提及此事並慨嘆道：「如果早知，我一定會避免，無謂去令大家誤會，我係冇呢個意圖，冇意思圖但俾人覺得我有意圖，誤會咗我都覺得唔值得。」
資料圖片
談到該場生死戰，羅淑佩形容香港球迷為「世界級」，指當時全城氣氛亢奮，但在關鍵一戰卻落敗出局：「你問我擔唔擔心？其實都擔心，其實喺世界任何地方都可能有啲要發洩下，但嗰晚一隻垃圾桶都無打翻、一個路牌都無整爛，大家和平有序散去，仍然支持中國香港代表隊，呢個唔係必然。」
感恩升官無慢過：近年感覺快啲
羅淑佩早前亦談及自己仕途﹐指1989年中大政治與行政系畢業後便加入政府，當時沒有想過會出任問責官員，笑言「冇得咁諗嘅，不嬲都係服從組織分配」。她指早已自覺不適合從商，加上當時公務員容易報名：「我哋個時CRE（綜合招聘考試），填張表，考個試就幾份政府工都可以一齊考。」
於公務員體制近36年，羅淑佩曾任政制事務局任助理局長、行政署任助理行政署長、工業貿易署助理署長、環境運輸及工務局首席助理秘書長（運輸）、旅遊事務副專員、政制及內地事務局副秘書長、運輸署署長及房屋局常任秘書長兼房屋署署長等。她指自己心態是隨遇而安、做好自己本份，沒有特別去想「最高要做到咩位」：「我係一路叫做啱年就升級，好蒙恩無慢過。」主持陳志雲問道「咁有無快過」，羅淑佩就指前期都是「跟大隊」，只是在2020年升任運輸署署長後「呢幾年可能大家感覺快啲」。
資料圖片
直至2024年12月，羅淑佩替離任的楊潤雄，出任文化體育及旅遊局局長。被問到獲得邀請時有否考慮，羅淑佩稱：「梗係要考慮啦，唔考慮吓自己何德何能啦，不過真係要考慮吓，呢個唔係一個細決定。」現年58歲的她指任問責官員代表要脫離公務員體制，加上距離退休年齡只有一、兩年，希望「好快退休」：「可以得閒無事喺博物館度，唔係主禮嗰三五分鐘，而係行幾個鐘慢慢睇，可以做返啲鐘意嘅，好似唱歌、教會事奉或者出外旅遊，好多嘢可以做㗎嘛。」
稱想退休 盼做喜歡的事
現屆政府任期餘下約一年半，講到未來，羅淑佩指是否留任過渡並非自己可決定，同時亦要中央任命：「唔係我哋決定㗎嘛，所以呢啲唔好諗，我覺得每一天做好而家嘅事，我仲有一年零四個月喺呢個崗位上，咪用呢啲時間做好工作。」
被問到有否繼續服務香港的意願，羅淑佩就稱很多崗位都可以服務香港，指自己30多年前已加入政府，不可能沒有服務香港的心：「咁但係，人呢最緊要係腳步走得穩，每天做好每天嘅事。」陳志雲再追問是否只要有機會再服務香港，任何方法位置都會考慮，羅淑佩指：「要做得嚟先得，一定要做得嚟先得。」陳志雲應道：「咁我識得聽啦呢個。」羅淑佩強調這只是陳志雲的個人解讀，重申「我都真係想退休」，希望有時間做喜歡的事。
資料圖片
指頭大面圓上鏡顯肥
羅淑佩又談到自己的乳名「奀女」 ，她指自己年幼時很瘦，母親及親戚都會這樣叫她。她續稱，在中大讀書時不時要「跑樓梯」往來山上的聯合書院與本部上課，直至大學畢業時仍不足100磅，「都唔算肥呀真係」。她又強調人隨著年齡增長，新陳代謝減慢，必然會較以前體重增加。她又解釋，自己身型不高但頭大，面型偏圓，加上腮骨不明顯：「所以鏡頭影埋嚟，係好肥嘅，尤其是大頭嗰啲真係好肥。」她形容自己為「最不上鏡小姐」，髮型上近年亦有精心設計，由以前齊陰變成側分修飾臉型。