【獨媒報導】立法會議員謝偉俊日前接受電台訪問，引起政圈不少迴響。謝偉俊在訪問中暢所欲言，指立法會已由西敏寺變成人大模式，亦太多一致性聲音，指特區政府現時口吻較北京外交部更強硬，認為「幫阿爺做打手」、「做惡狗」並非香港的角色。他更重提年初在立法會指政府「小紅書治港」 ，但體諒行政長官李家超當時正值23條立法前夕較緊張：「我只係覺得佢，始終從政嘅經驗係唔夠佢做警察嘅經驗多，我成日心裡面都笑，警察阿sir 你梗係唔可以窒㗎啦，窒阿sir佢梗係嬲你。但我哋從政嘅，永遠都係兜口兜面鬧你，都要接受意見，我哋呢啲慣咗。所以佢鬧我，我又無乜所謂。」
現年65歲的謝偉俊自2008年首次循旅遊界晉身立法會，2012年轉戰九龍東直選，翌屆再次連任，2021年改循選委界參選續任立法會議員，至今已長達16年。他早前遭《星島日報》點名，發表政治不正確的言論，來屆或未能連任。
被問做足16年議員「夠皮未」 謝偉俊：都覺得係時候
謝偉俊上周接受商台節目「光明頂」訪問，被問到「夠皮未」，謝偉俊稱可以想像從小一到大學畢業：「其實可以話夠皮㗎啦，無論從年紀上，或者參與一件事嘅體驗呢，基本上都覺得係時候⋯⋯不過當然啦，政治嘅嘢好難講，一日都嫌長啦，宜家言之尚早！」
今屆立法會是中央出手後，「完善」選舉制度兼落實愛國者治港的首屆議會，謝偉俊亦由曾被視為「西環契仔」，變成議會壞孩子。對於頓成「刀鋒口」，謝偉俊形容為起承轉合，稱「以前有佢好嘅地方」尤其2008年最開心好玩，並稱為目前唯一曾任功能組別、地區直選及選委會界別的議員。
立法會模式由西敏寺變人大 「無人敢問規程問題」
在節目中，謝偉俊指昔日的立法會做法、作風及經驗，都比較接近英國西敏寺模式的議會，較多辯論及互動：「呢一屆呢，我希望唔好冒犯任何人啦。我有時講嘢好多時都冒犯人，我就覺得我哋的確由西敏寺式，的而且確慢慢轉向人大式嘅議會模式，我無話好定唔好，純粹係唔同咗。」
謝偉俊認為議員要慢慢適應：「對於我哋呢啲打所謂打慣仗嘅議員嚟講，覺得似乎打仗嘅時候刺激好多啦。」不過，他亦表明不認同肢體碰撞、不守規矩的階段，被迫後來要作出大幅修正：「亦都非常之不幸，我哋要經歷過咁嘅個程，令到各方面收緊咗、收窄咗好多。」至於昔日或者現在的議會較佳，謝偉俊就稱各有利弊，惟現時議員過分遵守規則：「宜家好似無晒呢一樣嘢，無人敢問規程問題，無人質疑、挑戰嗰個主席。」
稱梁君彥現已能大覺瞓 同意立法會只有單向聲音
另外，謝偉俊更稱，聽說立法會主席梁君彥現時主持會議已輕鬆得多：「我聽講，以前星期二晚佢就忐忑不安，唔知第日有咩發生，宜家可以大覺瞓，甚或安心去馬會。呢個係咪進步我就唔知，但的而且確宜家係無咗呢一種擔憂，我哋無咗一種議會式個種⋯⋯尤其我大律師出身，慣咗係無論上法庭要對碰，先到攞到新嘢出嚟，立法會亦都一樣，應該要互相辯論，先可以令到議題迫到一個真嘢出嚟。」他認為現時「過份睇一面」，未能呈現反面，從而令辯論角度少了很多：「你話顏色又好，角度又好，視野又好，係有啲缺陷。」
謝偉俊及後引述稱，有聲音批評現時立法會不代表大多數市民的聲音、只有單向的聲音，但個人認為這是客觀事實：「我哋一致讚好呀，一致支持呀，一致甚至我哋啲議案都係全票通過，當然唔應該喺議會，通常總係有啲人反對，但香港宜家係太多一致性聲音。」
他強調，不是要過份評論西敏寺或人大模式較好，而客觀來說國家在發展成效進步了不少，西方民主則反而有不少問題，但個人傾向英國較保守、循序漸進式的進步、改變，不宜太大動作改變，但2019年反修例事件令香港被迫大幅度改變：「改變嘅幅度係咪太大，太過極端？呢個可能要事後睇返。」他希望能找到新平衡點，但認為短期內還未到達。
批政府拒認大批中產移民 指香港應崇優不做Yes Man
談到近年有不少中產離港移民，謝偉俊批評政府始終不肯正面回應、承認該問題：「淨係硬係側側膊，覺得唔肯承認呢個令到香港宜家經濟，施政上困難嘅地方。」他分析稱任何社會如要穩定，便要令中產市民滿意：「中產好自不然穩定，中產唔好的而且確好多問題。」
謝偉俊更重提，早前質疑《施政報告》無靈魂、得個做字，是行政長官李家超不滿他的伏線：「覺得我好似唔係好妥佢喎，唔係好妥你《施政報告》，令到後期發展出咗嚟。」他稱十分關注中產對香港的歸屬感、信心：「對於政府嘅管治能力呀，對於佢哋會唔會過份地無咗自我，無咗香港特色，無咗香港不嬲以往我哋崇優、崇專業，有自己嘅個性，有自己嘅諗法，而係過份地做Yes Man，做Yes Sir，我諗好多中產唔係太滿意。」
謝偉俊：中產有性格但不等如敵人 不接受下一代接受高壓式國安教育
談到中產，謝偉俊更有感而發，認為本港賴以成功是港人有性格、有創意：「好多時政府批評話有軟對抗拒，任何中產人有性格，有自己思考，或多或少都有啲批判性。」謝偉俊質疑當局如將中產的自發性、有創意、敢批判都當成敵人及對立面：「令到成個中產覺得呢啲唔係我哋慣咗，唔係我哋喜歡嘅一種水土，而係需要搵新天地。」
謝偉俊指港人到外國後仍可在網上工作及發表意見：「天大地大呢，香港physically 唔容許咁多精英，自不然可以去全世界做呢樣嘢。其實真係幾好㗎喎，有好處而無壞處，可以喺空氣中繼續發表你嘅意見，又唔需要太擔心喺形式上被人禁咗你出鏡，甚至拍門拉你返去問話。」他更表示，育有下一代的中產不會接受，過早地接受太有啟發性、填鴨及高壓式的國安教育，「需要保留返呢種天地、空間畀下一代」，形容非常不幸。
被叫西環契仔、白偉俊無問題 指北京2019年後重手鎮壓香港
在節目中，主持馮智政指謝偉俊是「西環契仔」，問其如何做到有少少順從，兼有獨立思考。謝偉俊重提2012年立法會選舉時，遭「政治對手」即協助社民連陶君行助選的黃浩銘所改的名稱：「佢都幾有天份嘅，改呢個名，都幾得意嘅，一笑置之啦。」謝偉俊更自嘲，網民笑其為「白偉俊」：「我又覺得無咩所謂，從政起碼要有呢種咁嘅寬容，呢種態度先可以從政，如果唔係太緊張呢啲嘢亦都無辦法。」他指從政便要食四方飯，最重要是講道理，即使價值觀不同，亦應用理性說服對方，並套用英國給予香港的優良傳統即行政、法治，都是理性講道理：「茶壺入面好嘅茶漬嚟，但如果一吓冚棒唥將呢啲嘢洗晒佢，有啲遺憾。」
不過，謝偉俊認為現時只屬過渡期，源於2019年經歷了不理性的階段，令北京政府認為港人不可理解、接受：「導致重手咁樣落嚟鎮壓我哋，我希望當宜家國安法又好，23條做晒之後，當個社會安定返之後，能夠證明畀北京睇，香港都唔係真係咁亂嘅，大部分人仲係好理性嘅，我哋中產都希望，過多兩年經濟上希望改善，令到中產返轉頭。」但他指正值中美博奕，仍屬困難階段，「唔係咁容易吸引到中產返嚟」。
重提「小紅書治港」 與李家超份屬華仁師兄弟、好好感情
在今年1月，謝偉俊在立法會指現時是「小紅書治港」，並且是法家高壓，遭李家超斥其挑撥矛盾，用字更令人聯想起「黑暴」。謝偉俊在節目中表示，收到不少意見指，政府的確不著緊本港市民意見，卻十分緊張或會傳到北京的小紅書意見。
他指其說話可能較尖銳及首名議員發言，「令到特首好唔happy」，但稱無必要在議會外駁斥：「始終我哋都係華仁嘅師兄弟嚟，我哋以往都好好感情，飲啤酒傾計。」他強調對方是特首，自己必然代表市民發聲：「即使係唔係好啱特首聽，唔啱政府聽，更加唔啱師兄聽都要講，唔係做唔到我應該做嘅責任。」
喚李家超可參考李顯龍 減少宣講式口吻
然而，謝偉俊亦不忘揶揄一番：「當然啦可能特首佢就身在高位呢，就可能對於一啲批評，無以往咁容易接受啦，又或者當時係23條立法之前較緊張，壓力好大，我都唔怪佢，我完全唔介意。我只係覺得佢，始終從政嘅經驗係唔夠佢做警察嘅經驗多，我成日心裡面都笑，警察阿sir 你梗係唔可以窒㗎啦，窒阿sir佢梗係嬲你。但我哋從政嘅，永遠都係兜口兜面鬧你，都要接受意見，我哋呢啲慣咗。所以佢鬧我，我又無乜所謂。」
謝偉俊強調，事實是政府未能多從香港人角度「睇啲事」，及不太注視香港人的感覺，不期望李家超做到新加坡總理李顯龍的政治歷練，但可以參考對方刻意與社會溝通，明白當地人、中產說法：「好過一啲宣講式，或者我都唔好講啲咩戰狼嘅口吻啦。就算唔係都好啦，有時政治就係政治，你要用政治技巧多啲。管治香港係好叻，特別係用紀律部隊管治當然好叻、好有效率，但始終唔係香港人習慣想見，特別係中產、專業人士想見到。如果你想保留多啲入才喺香港，你要留意呢方面多啲。」
盼特首站在港人角度 謝偉俊：搵夏寶龍做特首都得㗎
謝偉俊指官員、議員為保權位，或要較側重國家一方，「可能會著數啲、快啲」：「但係我覺得始終都係有啲人需要，代表香港發啲聲音提一提大家、政府，香港好多人期望我哋嘅領導間中、有時候都企喺香港呢面點睇，無論係角度、利益、價值觀又好，甚或係言語上嘅選擇，係應該多啲留意吓，因為你始終都係香港呢一面嘅特首，如果無香港市民，你做呢個香港特首都無意思。不如我哋搵個京官落嚟做啦，唔洗搵你做啦，點解要一國兩制、港人治港？不如我哋就搵夏寶龍做特首都得㗎！可能仲好𠻹，感覺上比較唔洗咁複雜𠻹。」
至於特首的「角色」，謝偉俊認為在一國兩制下，香港人、香港仔講香港人的說話，及擁有香港價值觀，將國家言語以香港的通俗文化令港人明白，在北京則向對方解釋港人的困難：「有啲嘢我哋無心冒犯，不過我哋係咁佻皮㗎啦，香港不嬲都係咁，呢個係香港成功嘅地方，希望佢哋明白到香港有啲人講嘢過咗火位，唔等如佢哋反叛，要推翻國家，只不過呢種特性係香港成功嘅特性嚟。」他重申，特首不應過份一面倒「扮晒一個國家領導人宣講嘅方式」，而應間中站在港人角度「睇吓啲嘢」，及說服港人接受國家的關懷、苦衷，惟多任特首都未能令人滿意。
政府口吻較北京外交部強硬 稱應做「香港仔」搵著數
在節目尾聲，謝偉俊談到香港的角色，稱如果中國是航空母艦，香港便應該是快艇，過往能扮演較溫和角色，穿梭於各國中間：「但宜家往往連北京外交部嘅語言都無我哋香港咁強硬，我哋好快好重咁講啲說話，令到我哋香港無咗國際城市，甚至乎一國兩制之下應該扮演嗰種比較溫和啲、中立啲，或者係叫香港仔啲，香港仔搵著數㗎嘛，多啲搵著數，唔好吓吓做馬前卒，令到成個香港社會都受害，令到香港人喺機會、經濟上受損害更加嚴重。雖然係唔容易，但起碼要知道呢個定位，要知道咁樣做法先真係幫到香港，如果我哋吓吓都幫阿爺做打手、做惡狗，呢個完全唔係香港應該有嘅角色、定位。」
主持指現時立法會滿佈「戰狼」，問謝偉俊是否有興趣。謝偉俊再次自嘲：「係囉，好笨呀可？我做唔到囉，應該係不能定不為我都唔知啦。」他表示，希望每件事都能夠有自己想法、角色及決定，但現時越來越困難，新同事缺乏從政歷練，或是成功學者、中資背景或專業人士等，都不了解公共政策：「點解做到議員？可能就係因為阿爺欣賞佢，一手栽培佢。始終佢coming from⋯⋯都係從阿爺角度睇一啲事件，無從選民，或者香港中產基層睇一啲嘢，令到成個議會都盲點，咁係不幸嘅。」
料本港未來數年道路坎坷 望23條後步入較緩和階段
對於地緣政治緊張，謝偉俊預期本港未來數年的道路會較坎坷、麻煩：「但唔好自己做衰啲啦，起碼都可以知道環境之下點樣盡量減低損害，做到爭取任何益處，呢個係宜家要明白嘅一樣嘢。總唔能夠就咁簡單過度地，口號式做一啲施政，或者係完全一面倒、唔喺另一方面睇啲嘢，令到成件事唔係咁衰，都更加衰。」他期望在完成《基本法》第23條立法後，本港能步入較緩和、「菩薩心腸」的階段：「唔好再挑戰阿爺好多嘢，同樣道理希望阿爺可以對我哋有多啲信心，呢個係香港之福嚟。」
謝偉俊最後呼籲政府要多做實事，不應「講咗等於做咗」：「不應過份太多PR、論壇，你唔做又唔得，唔俾人知。但你做到大家都『滑咗』，成日都有咩論壇，呢樣個樣、咩盛事⋯⋯都唔關注我哋宜家最關注嗰啲搵錢呀、安定呀、信心呀，我哋做多啲嗰嘢可能會好啲，甚至有時候講少兩句都可能係好啲。」
陶君行曾邀謝偉俊出席節目 獲回覆要韜光養晦
此外，陶君行昨晚在其網台節目「大君伐」透露，在4月30日曾邀請謝偉俊出席其節目，獲對方回覆稱5月2日已有安排，即接受商台節目「光明頂」訪問，並表示要韜光養晦。 陶君行表示，如果謝偉俊答應出席其網台節目，立法會議員生涯則很大機會告終。
二人曾一起競逐立法會選舉，陶君行在2012、2016年九龍東直選均不敵謝偉俊未能當選。當時助選的黃浩銘就在節目講述謝偉俊「西環契仔」外號的由來：「我唔知你係人定係鬼，但你肯定就係西環嘅契仔。」他又指謝偉俊在「光明頂」訪問中說出溫和的人話，實情已是「鳥盡弓藏，兔死狗烹」。