MIRROR演唱會掀開了空前的撲飛盛況，成為近十年來最為人談論的娛樂熱話，這隊本土男子組合，扭轉了香港娛樂圈的生態、打破了不能得罪大台的潛規則，為活於苦難的香港人，帶來了點點希望。可是，唔知醜的正苦與ZERO IP，最近也盯上了MIRROR，再次吹奏大灣區與中國如何利害，甚或大言不慚為MIRROR爭取上強國節目。阿婆，好心你啦，幾十歲就睇大台，學BEN SIR話齋：「唔好攪啲細！」愛國節目，係留返俾同拿破崙一樣高度的大台高層去，同埋37歲既周柏豪，以及47歲的楊千嬅呢啲紅色偽人，呢班香港年青人放眼市場是亞洲，立志做亞洲第一，宇宙第一的強國市場，是留返俾有準備的大台偽人，唔啱佢地，佢地喺國際城市香港長大，唔理解內地市場。好多40幾話唔識MIRROR，同60歲話唔識VIUTV既大台偽人，都抽MIRROR水搏有娛頭，呀ZERO，你已經國際知名，你都係專心12月閹割立法會選舉，同埋報名同柒婆、689選特首算啦。
MIRROR與ERROR夠地道
說真點，作為一個年近半百的中年後生仔（羅致光話60歲算中年，我肯定係後生仔），真的不認識MIRROR，只識姜濤、AK、IAN，全民造星也只是看過數集，根本沒有資格評論MIRROR，我只是知道，身邊所有40歲以上的女性，對MIRROR的認識與瘋狂程度，不下於80年代的張國榮。四大天王講左30年、陳奕迅講左四份一世紀，終於有一班音樂人，可以吸引本地年青人與成年人，同時將果班食老本既偽人，正式劃上句號。姜濤與MIRROR並不是哪些注重形象工程的藝人，在遊戲節目咬人、顛喪隨時出現，這些場面，就像校園生活一樣，低低能能又一日，青春，就是這麼的一回事！
相反，ERROR的成團，吸引更多男性觀眾，四位成員阿DEE、肥仔、保錡與193，活像過去日本的瘋狂綜藝節目一樣，幾喪都有，【ERROR自肥計劃】絕對是治療抑鬱症的最佳良藥。拔陰毛、彈春袋、圍揼、大整蠱、講粗口，就是我們中學時代每天的生活點滴，在電視重現這些兒時畫面，簡直正到無朋友。我與很多香港人一樣，不知有多久沒有坐定定追電視節目，ERROR四人組合，為觀眾帶來了無限歡樂。阿DEE早在2014年在旺角街頭【獨自去鳩嗚】，已經紅遍網絡，捱了這麼多年終於出頭，絕對是勵志故事。肥仔多多口又靈活，就是校園生活中經常識走位的肥仔同學，總有計避開危險。串串貢的193，就是典型MK仔駁咀駁到你一「幢」都無的年青人，不過呢類年青人通常專吋衰人，唔會向弱者抽刀。保錡的緋聞，也就是經常溝女出事的寫照，但同「安心出行」相比，只是微不足道。
MIRROR與ERROR的成功，是幕後花了很長時間，推出一個又一個節目，慢慢揼石仔造出來，相關ERROR為何走紅的原因，由電影基層勞工專頁撰寫的【ERROR不紅 天理不容】有十分細緻的描寫，大家可以搜尋細看。而家見人紅正苦同ZERO IP就想割韭菜，你地無病呀，大台咁多偽人，死返去81至85台慢慢搵啦！
不要填海華翻版
ZERO IP在垃圾會唔知醜地說，替MIRROR爭取上內地節目:「例如最近爆紅嘅姜濤、Mirror、Error，局長會唔會爭取佢哋上內地受歡迎嘅節目？例如《乘風破浪的『哥哥』》？」商務及經濟發展局局長邱騰華回應時指，現時在本地和海外競爭下，樂見本地出現「新嘅星」，又指將會吸納葉劉淑儀的部分意見。（截取自獨立媒體2021年5月12日報導）
呀ZERO，我終於明點解你個黨選區議會輸到仆街，一席都無。呀婆，VIUTV邊個係老細？你地啲娛樂界關係會好過李家?佢地要安排MIRROR上大陸節目，要你班廢柴爭取？上果啲老土節目要你幫？MIRROR好恨上呀？大台佢地都唔去，聽下姜濤點答傳媒先啦！佢地講明迫佢地返大陸搵食，情願做外賣仔，呢啲叫做骨氣，唔會好似條成蟲咁，話而家無香港電影，只有中國電影，奶共留返俾你呢啲有準備既人啦。仲有，你咁八掛無理由唔睇八掛新聞，電影大亨古天樂都有睇佢地演唱會，MIRROR要返大陸拍合拍片，係都搵古老闆，幾時要勞煩你班廢柴?到時同你地上去見啲大陸人，你地啲國語就真係「倫呔倫」。香港80年代電影業雄霸亞洲，到90年代人人開始北上掘金，發哥選擇到荷里活發展，成為國際巨星，想MIRROR與香港青年好，不要吹奏大灣區，而是叫他們放眼海外，走向世界。
一個藝人建立形象，需要十年，要破壞形象，只要十秒。劉德華以前被視為民間特首，明日大嶼替正苦錄音後，形象插水，只剩下中國市場，你估MIRROR會唔會理你？MIRROR與ERROR踏入娛樂圈第一步，就作出正確選擇，去一間有心做好節目的電視台，而不是食老本的大台。正如足球界一樣，有些人會詐傷放棄代表香港隊，轉而代表中國隊，亦也有很多年青球員代表香港隊為榮。MIRROR在音樂頒獎禮表明，他們向亞洲第一的目標進發，這份久違的志氣，像強心針一樣，注入香港人體內，為這兩年活在苦難的香港人，帶來了點點希望。
ZERO IP，唔該你死開，求下你放過MIRROR，睇返王祖藍扮你妹妹，《開心大綜藝》是為你這類目標觀眾度身訂造，7月攪得成奧運，你都係同荷蘭叻、年年25歲廢老欣賞中國隊精彩演出，你地支持警察，MIRROR叫香港人，加油，你夠膽嗌先算！