【獨媒報導】前年十一遊行案，民陣召集人陳皓桓承認兩項控罪，被判入獄18個月。他在判刑前接受獨媒訪問，強調絕不後悔公民抗命，更不會放棄抗爭，「唔放棄唔後悔，未來見。我希望大家唔係望住啲人離開，咁多人移民、退退退退、解散、唔做區議員同辭職，唔想大家望住低潮，都可以望下繼續留低、付出同埋堅持緊嘅人。」
應訊當日，陳皓桓身穿電影《復仇者聯盟4：終局之戰》中一眾英雄所穿的戰衣外套，他希望在服刑後，能夠帶更多人回來。「有人堅持緊㗎，唔洗咁灰咁唔開心，唔好長期令自己困喺恐懼，對呢場運動無幫助。」
一人秘書處 民主派中人：依家已經係最後
《國安法》立法、民主派初選案47人被捕，民陣一時風聲鶴唳，退會的退會，民陣秘書處只餘下陳皓桓一人。25歲的陳皓桓一直力挽狂瀾，他努力地正面，嘗試正面迎人，正面地面對所有事情。
那一陣子，每日都「傳民陣被取締」，民主派政團退的退。有民主派中人對他說，「Figo，我哋唔係唔想同你堅持到最後，但我哋認為宜家已經係最後啦。」
陳皓桓先是黑人問號，然後一笑置之，「我唔可以強求大家承受國安嘅嘢，我無理由迫大家承受，自己都唔想承受，『但我要堅持呀嘛』。我只能夠講任何離開、任何唔留低，我都尊重、理解同包容，我唔可以令社會更加灰同頹呀。」
強大先可以撐過去，但每人都有弱不禁風的時候。初選47人案聆訊，和陳皓桓亦師亦友的梁國雄、岑子杰是案中被告，他連日到庭聽審，這其實是陳皓恒狀態最差的時候。
初選47人案提堂第一日
愛犬離世 一星期歷盡生離死別
Figo 的愛犬「細佬」在這時候離世，生離原不易，死別更艱難。在馬拉松聆訊後，他晚上去了找朋友、兩名前浸大學生會會長方仲賢及劉子頎喝酒消愁，怎料翌日下午回家，赫然看到「細佬」倒在地上，頭上笠住薯片袋。Figo 對身旁的劉子頎說，「我隻狗死咗呀⋯⋯咁點算呀。」他良久未能反應過來，不住的點火、吸煙和嘆氣。
那天是星期一，陳皓桓傍晚還要到旺角警署報到，然後到位於長沙灣的社民連總部開行委會會議，但他眼前只有一片空白，他只不斷的重複「『細佬』死咗呀。」
正在還柙的長毛，一度以為陳皓桓的親細佬去世，後來寫信對 Figo 說，「知道你是愛犬之人，傷心在所難免，希望你能夠恢復狀態。」
Figo 其實自小已想養動物，小時候患有哮喘，加上家中空間有限只得作罷。四年前，他搬出來和朋友住在一起，便立即排隊領養柴犬。「細佬」給他的是前所未有的輕鬆，和如獲至寶的陪伴，「喂，你唔覺得狗好治癒咩，嘻嘻。」
早在唸中學時，陳皓桓已經歷過一次死別。鄰座的同學患癌去世，他是 Figo 的好友，更是喚他參與6.22公投（編按：2014年6月22日和平佔中舉行的民間公投）的人，他邊說邊用力皺起了眉頭，「嗰次經歷其實都好深，我記得佢仲好努力讀書，想同大家一齊畢業。」
「點解球球都要射中我」
初選47人案，黨友入獄，同道中人入獄，連網台節目的嘉賓都要入獄。隨之而來的是，民陣秘書處和成員團體紛紛要求退出，這場閃避球，似乎一直追住陳皓桓來打，「好鬼辛苦，點解球球都要射中我。」
「其實我去到唔識答，唔通話人生就係咁咩？社會環境已經好差，你仲發放咁嘅訊息？」那星期，陳皓桓有多個訪問要做，他原本想全都推掉，休息一星期。支聯會副主席鄒幸彤跟他說，「點解你唔做？個個入晒去，你唔做就少咗把聲音，不如你嘗試下做。」
「好，既然鄒幸彤叫我做就做！」
刻意與家人保持距離 望能理解決定
陳皓桓的腳腕印有柴犬的紋身，他和家人的關係一般，很少公開提及，牠已是他的唯一。「細佬」的狗籠其實還在家中。「唔再養啦，我受唔起打擊，嗯，如果要養都坐完幾年先再諗吧。」
之所以較少提及家人，Figo 承認是刻意保持距離。「真係有機會坐，好好照顧自己。」這是陳皓桓對家人發的訊息內容，「我無做錯嘢呀，我（參加社運）無任何紅利，人工只能夠 cover 我生活，無參選、無議席、無攞過任何錢。唔需要支持我，但希望可以理解我決定。爸爸身體唔好，我唔知仲有冇機會見佢。」
屯門長大 傘運後成社民連職員
在屯門長大和讀書，陳皓桓的中學年代和同學去做兼職賺錢。他揀了整個屯門最好生意、位於新墟的那間麥當勞。這間24小時營業的麥當勞，記載了陳皓桓的汗水，可能日子有功，他今天依然能斟得一杯靚雪糕。
廉價勞工自然乜都要做，炸薯條、洗廁所和倒垃圾，陳皓桓的左翼勞工意識，大概亦從此而來，「個垃圾桶重到乜咁，你叫啲老人家同事點倒？我成日覺得，做人要多啲調返轉嚟諗。」「戲院一散場就好多人，又成日畀啲客鬧，諗返都唔知咁辛苦為咩？」
訪問在社民連總部進行，成員唐婉清甫見到陳皓桓，便喚「囝囝，boyboy」，為他送上一碗暖湯來。副秘書長兼長毛太太陳寶瑩在旁整理信件，同案被告吳文遠則正交代「身後事」。陳皓桓在社民連的總部瞓過幾年，「嗯，其實呢每一個角落呢，都影過晒㗎啦。」
中學畢業後原本報了 IVE 讀旅遊文憑，卻遇上雨傘運動，然後為社民連搞了兩場選舉，選舉後 Figo 曾經去台灣旅行，認真思考前路，「諗嚟諗去覺得仲後生，繼續做啦（社民連行動幹事）。」
後來又遇上長毛被DQ和兩次九西補選，再來就是爆發反送中運動。這場閃避球，直至 Figo 入獄才有畫上休止符的機會。
劉慧卿推薦到加拿大唸法律 「唔好啦」
反送中運動的「香港人」，在前年獲得麥凱恩公共服務領袖獎，陳皓桓和劉慧卿到加拿大領獎。他原本有機會留學，卿姐鋪橋搭路，安排了他入讀當地大學讀法律。
說到這裡，Figo 在記者跟前，即時卓韻芝上身「唔好啦」。「用民陣呢個名攞返嚟嘅嘢，我唔想。同我英文唔好，點去加拿大讀呢？」
陳皓桓一向好抵得諗，2018年李卓人參加九西補選，他便穿上藍色緊身衣扮「任何人」助選。在判刑前，Figo 對六四仍念念不忘，入獄前還想做今年維園晚會的司儀，長毛也喚他必須小心行事，「喂，冇人做咪我做囉，我係因為六四而出嚟。」
召集人召集唔到的遺憾 以及留低的責任
大半年前接替岑子杰出任民陣召集人，一句到尾因為責任，但今日的秘書處就只剩下這名召集人。召集人有點遺憾，他嘟起咀，攤開雙手說，自己是唯一一屆未能申請及舉行遊行和集會，警權和人權報告更是欠奉。「我冇令到更多成員團體加入呢個平台，社會又令到團體走晒，我係號召唔到任何嘢，咁點做召集人？」
話音剛落，那份正面很快又回來，陳皓桓喝了一口湯說，「我宜家嘅責任係盡量留住呢個平台，能夠做嘢嘅時候盡量做嘢，1月1車隊遊行、號召市民去法庭聲援47人案。」
前年10.1遊行當日
我叫陳皓桓，唔係陳皓恒
在聆訊中，法庭播出十一當日的媒體直播影片，有記者兩次讀錯陳皓桓的中文全名，庭內的人大笑起來，法庭職員要求旁聽的人安靜。
陳皓桓的英文名 Figo，其實有一個小故事。小學上英文堂要改名，陳皓桓原本想叫 Sam，但老師對他說已有同學用了該名字。陳皓桓的舅父喜歡葡萄牙國家足球隊前隊長費高（Luis Figo) ，便叫他 Figo，他在中學畢業後才知道 Figo 原來是足球球星。
「中學老師教㗎，叫錯人名，就係唔尊重人哋呀嘛。」《星島日報》記者早前致電給他，「佢話『你好呀，陳皓恒呀，想問你民陣啲嘢。』我火都嚟埋，我同佢講我個名叫陳皓桓，第二我唔會回應你。」
那一天，記者和他去旺角警署報到，陳皓桓甫步出警署，他便飛奔過來說，「都好啲，唔係《國安法》」，說的是當局指控民陣涉違反《社團條例》。
入獄前一個多月，陳皓桓才認真開始為自己打算，他先是勤力健身，希望在獄中能繼續做運動。他又預約打復必泰疫苗、洗牙和朋友好好相聚，「可能有一段時間見唔到大家啦，無問題，出返嚟再砌過。」
「我揀咗堅持呀嘛，講咗就要行埋落去」
前年反送中運動，去到白熱化階段時每次行動都被說成是 Endgame。漸漸地，人的確越來越少，被捕的被捕，和理非都不敢再上街，「走唔走」近日成為熱門話題。「點樣令到啲人返番嚟？梗係用唔同方式嘗試，諗下點做，哪怕得一次機會。」
這一年來，陳皓桓做了至少二十多個訪問，「你呢個係入去坐前嘅最後一個，我要講嘅都講晒，講到我都覺得口臭。」
身負14條控罪，十一遊行案只是最早判刑的一單而已。陳皓桓選擇了鋃鐺入獄，在水泥地上繼續種花，他預計，加加埋埋的刑期為五年，五年後的陳皓桓將會30歲；然而，單是十一案的判刑已是18個月。
「我揀咗堅持呀嘛，講咗就要行埋落去，入到去咪睇下書同字典，當進修囉，反正我英文唔好，你哋要印歌詞俾我呀。」
記者：麥馬高