【獨媒報導】新一季港超聯賽事下月舉行，去季本地盃賽雙冠王大埔今日開操，「綠戰士」今季陣容目前只有19人，當中更僅得8名本地球員，將要應付港超聯、亞冠二、高級組銀牌、足總盃及聯賽盃五條戰線。被問到去季帶領大埔取得好成績，今季資源反而減少「如何令自己向前看」。主教練李志堅指「成個香港都係咁㗎啦」：「面對經濟唔係理想嘅時候，大家要有個諗法，對成個產業投放咗係無可厚非。」他表示，會將「限米煮限飯」視為考驗：「盡力做囉，有時有咩菜咪炒咩餸囉。但我覺得亞冠二要盡砌，呢個係關鍵嚟。盡力做囉，怨天尤人都無用。」
「綠戰士」在開操前一直沒有公布新加盟球員名單，本身是班主的領隊兼副主席葉志雄，及會長葉吳彬彬下季將退場，交棒新管理層接手球隊。根據大埔向傳媒提供的球員名單，只有19名球員，當中更只有8名本地球員，包括謝家榮、盧兆崎、王顯深、李家豪、費蘭度、陳肇鈞，另簽入陳凱柏及張憙延。
至於留隊的外援包括加比爾、韋法頓、伊高沙托尼、保連奴、沈承賢及謝臣，另簽入里安納度、亞蘭特、加比馬斯基達、摩連奴及華力臣。
在開始訓練前，李志堅主動談到張憙延的加盟，稱「俾次機會人啦」，又笑言：「同東區交換咗個7號咋嘛，我哋嗰個叫馬交雷拿。我哋有賺㗎，本地呀嘛，新馬卡雷拿。」
李志堅認本地球員數量不充裕 重申亞冠二必「拼盡」
對於今季目標定為港超聯頭三、亞冠二分組賽出線，李志堅重申希望能在亞冠二再做好啲，但亦要視乎抽籤結果：「老土啲講句，有啲乜嘢就煮乜嘢，亦都要面對現實。」他承認本地球員數量不充裕，笑言傳媒過去數季常常盤點球員人數，「又話我可以出幾多隊」：「依家正啦係咪？依家清清楚楚啦。」
李志堅指今季港超聯新增一支球隊，本地球員更為缺貨，即使有資源亦難以找到合適的人。此外，有6名球員穿上白色訓練服參與試訓。李志堅稱下周將安排兩日試訓日，每日約40名來自海外及本地的球員參與，相信或可以找到滄海遺珠球員，但認為不容易，強調球隊會在亞冠二「拼盡」，將該項賽事放在首位。
苦笑稱大埔前場球員不足 指張憙延具一定能力
談到新加盟的球員，李志堅透露陳凱柏知悉鄭子森離隊後，主動向大埔尋找機會，笑言「搵機會就啱啦」。至於張憙延，此子將穿上7號球衣，李志堅稱認識對方已久，在會面時問到：「你26歲，仲係咪想踢波？我真係咁問佢，我未必幫到你改變做啲乜嘢，但如果你真係想，你知道點做人，點應付呢個行業、你嘅工作，佢應承我。」他苦笑稱大埔前場球員不足，而張憙延具有一定能力，希望可以協助球隊，「睇佢自己造化啦」，並指正物色多一名守門員，及補充更多華人球員。
記者問李志堅去季帶領大埔取得好成績，今季資源反而減少，「如何令自己向前看」。李志堅指「成個香港都係咁㗎啦」：「面對經濟唔係理想嘅時候，大家要有個諗法，對成個產業投放咗係無可厚非。」他表示，會將「限米煮限飯」視為考驗：「盡力做囉，有時有咩菜咪炒咩餸囉。但我覺得亞冠二要盡砌，呢個係關鍵嚟。盡力做囉，怨天尤人都無用。」
黃耀富出任助教 李志堅信能為球隊帶來生氣
大埔教練團亦迎來大變動，李志堅續任主教練，黃耀富出任助教，曾效力大埔多年的彭梓鍵接任守門員教練，謝臣兼任教練，另有一名來自巴西體能教練下周到港。李志堅在訪問時稱，自己在數周前更灰心，幸好找到一名好的體能教練，他更不忘自嘲：「以前成日話乜乜乜李志堅，依家淨返我喺度啦，其他側邊唔喺度啦。呢兩個禮拜嘅時候，俾粒糖你食已經好開心。」
記者喚李志堅介紹新教練，他提到黃耀富的時候，便笑稱「呢個時候多啲奇形怪狀嘅人都好嘅」：「真係唔介意我咁講，多啲新嘅元素。」李志堅指黃耀富近年大力推動五人足球，外出的時候更是無償，認為對方是值得尊重的教練，相信對方能為球隊帶來生氣。
陳肇鈞：始終大環境唔係咁好 「相信李志堅」
對於大埔迎來大幅度變動，作為球隊老大哥、前香港足球先生陳肇鈞向《獨媒》表示，本地球圈「變動一定會有」，不論班主、資金及贊助商都難免有限制：「加埋始終大環境唔係咁好。香港足球如果你搵到隊波，肯延續落去，唔好理detail、用咩形式，同搞幾大，都已經係好感恩。」
陳肇鈞指出，大埔領隊兼副主席葉志雄及會長葉吳彬彬投入4年多已屬超額完成，並放心讓李志堅帶領球隊。他表示要相信李志堅，「不論用咩budget都可以搞到啲嘢出嚟」。
望亞冠二分組賽抽到上籤 向球迷保證「唔會揸流攤」
對於亞冠二分組賽出線，陳肇鈞認為在節奏、輪換上可以做得更好，相信教練團或自己都可以給予更多意見，並期望可以抽到上籤：「唔洗飛5、6個鐘，越近越好。」談到即將又大一歲，日後的個人發展路向，陳肇鈞稱近日亦常常問自己同一問題，強調十分喜歡踢足球，「唔敢講話會踢多幾年、之後會做咩」：「但我好享受依家嘅日子，其實享受已經係挑戰，因為香港踢波真係唔容易。」
大埔多年來經歷贏得港超聯冠軍、自降，到再升班，惟下季或去向未明，陳肇鈞稱球迷支持的是球隊：「我哋都俾咗好多好嘅回憶大家，無理由話feel到隊波唔係你諗咁就好擔心。」他認為球隊仍有多名具質素球員：「我哋一定會盡力，唔會揸流攤。」
「綠戰士」將在7月30日至8月4日到泰國集訓，期間安排4場熱身賽。