【獨媒報導】港超聯今日（5月25日）上演四場煞科戰，賽前落後理文一分的大埔，以3比1擊敗北區，另一邊廂理文卻以0比3落敗，大埔後上奪冠。爭冠一戰，大埔運動場有1,486人入場，大埔球迷「綠戰士」坐爆球迷區，不少球迷全場站立觀賽，打氣聲勢浩大。
大部分球迷一邊透過直播關注理文對流浪的賽事，當下半場理文落後下，球迷區隨即爆出歡呼聲，理文緊接再失兩球，幾乎已鎖定大埔奪冠。未完場，「綠戰士」已提早慶祝捧盃。
球證吹哨完場後，不少大埔球迷衝落場慶祝，主教練李志堅亦激動走到看台前，大聲問「who we are?」，球迷們呼應「大埔」，李志堅更脫去身上球衣拋向看台。大埔是自2018/19年度後，第2度奪港超聯冠軍。
上季起成為大埔球迷的Vincent表示非常開心，「無諗過奇蹟會發生喺我哋身上。」他指季初成績「開得靚」，本以為「坐定粒六」贏得冠軍，惟近季尾成績不斷下跌，形勢變成被動。Vincent認為大埔後衛馬高斯山度士、加比爾及韋法頓表現最好，特別指韋法頓「估唔到佢打得咁好咁出色，幫咗我哋左右防，中堅時候打得真好好好。」
「綠戰士」成員Roy指奪冠「難以置信」，早前對南區一戰失分後失去領先優勢後，已不期望奪冠。「到呢一刻捧起獎杯都好難以置信，原來做好份內事，對手原來會失分。」
Roy形容今季心情「高低跌蕩」，全季最出色的球員是前鋒伊高沙托尼，「只要佢落到場，狀態好與唔好，其實佢都人嘅存在帶動到成隊進攻。」他指伊高沙托尼的入球及助攻數字皆非最多，但有他「坐鎮」球隊會令比賽踢得更流暢。
大埔下季將出戰亞冠二，今季兩支香港代表東方及理文皆於分組賽出局，Roy表示不期望必須晉級，但望踢出水準，「睇咗十幾年呢隊波，覺得洲際賽事點樣都大過本地賽榮譽，都好期待呢隊球隊會帶我哋走遍唔同國家。」
