（獨媒報導） 先後在東京奧運及全運會奪得3面獎牌的「牛下女車神」李慧詩，今午聯同3位港隊代表到浸大出席分享會。闊別校園兩年的李慧詩表示，現時正修讀浸大的寫作課程。她笑言雖已開學已經一個多月，自己仍未適應，亦為功課感到苦惱：「放假都覺得好攰，因為要做功課。」她又稱會虛心受教，「重新追返學業」，不擔心跟年輕人有代溝 ：「我平時喺體院訓練接觸開嘅新晉全職運動員，都係呢啲年紀。」
（左起）港隊代表陳仲泓、李慧詩、何宛淇、陳浩源
開學日被當透明人 李慧詩：無計啦，慢慢嚟
於浸大修讀創意及專業寫作文學士課程的李慧詩表示，現時只讀了一半課程：「仲有耐都未畢業呀，哈哈！」她透露自己第一天回校上課時，被同學當成透明人：「無計啦，話哂自己係 mature student，啲同學唔敢聊我係正常嘅，可以慢慢嚟。」
李慧詩又稱，目前課業十分充實，不擅長讀書的自己需要多點時間消化：「兩年無返學校，要重新識過哂班朋友仔，重新追返學業。」被問到與比自己年輕的同學相處會否有代溝，李慧詩則稱自己跟年輕人溝通「完全無問題」，因訓練時亦經常接觸到年輕運動員。
至於如何在上課及訓練間取得平衡，李慧詩表示目前沒有備戰或參加比賽的準備，只想專心於校園生活及放假，「做一啲單車以外，自己又想做嘅事」。
陳浩源籲享受失敗 陳仲泓分享進步方法
同場出席活動的東京殘奧羽毛球WH2級單打銅牌得主陳浩源強調，所有運動比賽的世界級選手都一定有失敗的經歷，故自己平常會享受「輸了比賽時的撕心裂肺的痛」：「唔知我哋運動員係咪有種自虐嘅性格，係鍾意輸，鍾意輸完自省再進步嘅過程。」
首位奧運跨欄港隊代表陳仲泓則分享進步的方法，指自己會在日記上寫下犯錯經過：「記低自己錯乜，錯嘅時候唔好炆，從錯誤中學習。」首位殘奧硬地滾球BC3級項目港隊代表何宛淇鼓勵同學，好好把握自己的人生，盡力做好想做的事情：「（大家）永遠唔會知下秒發生乜事，人可能一個肺炎就唔喺人世，你要好好把握自己嘅人生，只要想做就去做好佢。」