【獨媒報導】港足波衫一直一衫難求，港足今晚將於啟德主場館迎戰印度，港隊球衣供應商 Nike 今午12時正在啟德零售館2發售球衣，每人限售一件。早上11時許已有逾200名市民排隊，正式開售時間前已截龍。
港隊波衫一直供不應求，每當開售一般於數小時內沽清，今日在啟德零售館2的開賣情況亦一如以往。排於首位的球迷，於開賣前3小時的早上9時到場。據《獨媒》記者觀察，早上11時許已有逾200人排隊。早上11時45分 Nike 宣布截龍，踏入中午12時正開售時間，職員安排4人一組進店購買。
Sam
早上9時到場、排頭位的球迷 Sam 表示，特意為今晚比賽購買球衣進場支持，「覺得係一種精神象徵，作為球迷對球員嘅打氣。」
陳先生
身穿今季港隊球衣的球迷陳先生，於早上11時半到場，為兒子購買細碼球衣，準備今晚一家到主場館觀戰。陳先生身上球衣是去年11月港隊對菲律賓時購買，對比上次購買經驗，今日安排較好，笑言「上次菲律賓嗰場露天落雨個個都濕晒，仲要夠鐘先可以入場（買），今次起碼有冷氣先啦，如果今日露天（排隊）真係死人。」
陳先生是逾20年港隊球迷，指過往港隊球衣確實難以入手，僅得波鞋街一間門市兼價格較昂貴，「以前𡃁仔嗰陣時候冇錢，以前700幾、800幾蚊都嘔血，個時4000幾蚊人工買800蚊1件波衫都惡搞。」他續稱理解供應商態度保守，「本身個base冇咁大，唔會夠膽做（多）。」
對今晚比賽有何期望？他笑稱「梗係想贏，但係 Westwood（教練韋斯活）就……」，指對方排陣「好鬼恐怖」，挑選的球員不合常理，「之前一直用茹子（港隊後衛茹子楠）做後備做到癲。」
Herman
今晚首次到現場觀看港隊比賽的球迷 Herman 亦成功購得球衣，他認為購買球衣的資訊不夠透明，「對我嚟講都係好陌生㗎，我唔知訊息，我唔知方法，或者唔知銷售點喺邊。我係靠人哋比㗎，如果唔係我都買唔到。」他期望今晚港隊能勝出比賽，「最近呢幾年佢哋打嗰個精神幾好」。
啟德體育園主場館今晚（6月10日）舉行亞洲盃外圍賽第三圈賽事，港隊首次主場迎戰印度，五萬張門票昨日宣告售罄。除了主場球衣，啟德體育園中央廣場今日亦會售賣官方的應援商品，將在下午5時半開始發售。