一月一日，我哋八個人喺摩頓台茶記一邊午膳，一邊分發物資，原本我同女友打算同朋友開完會之後，返到去社記大隊先去政總，再到禮賓府。食飯期間咁啱譚香文就坐喺我哋隔籬，加上我哋朋友嘅游說，我同女友决定唔去政總唱大K，改為直接去禮賓府。
沿途由中央圖書館出發，經過富豪酒店，再到SOGO，然後到消防局，都一路大致暢順，都經過好多唔同嘅街站，直到電腦城附近開始人龍停咗喺度，因有網台喺街站度演講，消耗咗一d時間。跟着去大古廣埸方向行到去滙豐總行外邊，大會宣佈休息到5點再出發，要等警方安排好再出發。
由於從長江大厦側邊嘅花園通至上亞厘畢道封路唔俾遊行隊伍行上去到禮賓府正門，結果大隊喺滙豐總行外邊經舊政總西座側邊嘅雪廠街到上亞厘畢道後門前聚集，由於差佬唔放行，結果大隊停頓，隊頭不斷有人離開，大會開始教人摺紙飛機，稍後掟入禮賓府。慢慢地都有一大半人離場，我同三位女將等咗一段時間，因為大會話會留守到九點同紥營，决定先補充體力，跟住返嚟或去政總支援，而另外四位朋友留低等進一步情況。
喺我哋到咗遠東金融中心晚膳嗰陣，亦買咗食物打算俾朋友們補給，收到消息話隊尾變隊頭開始喺中環散步，我哋四個返到遮打花園打算滙合佢哋，轉折咗一輪，朋友們到埸食完晚餐，我哋發現差人開始喺長江同滙豐外進行封鎖，滙豐之後落閘同趕走哂d賓賓，另一隊差人開始喺長江對面遮打花園巴士站封鎖行人路，四位朋友先行到蘭桂坊，我同三位女將留底喺滙豐對出留意情況，之後長毛同其他示威人仕陸陸續續行去蘭桂坊，亦見到一批警員往蘭桂坊進發。
我同女友决定上蘭桂坊支援，當到達時發現，示威人仕全部企喺行人路，只係差人封鎖雲咸街與上亞厘畢道路口嘅馬路同行人路，唔俾車行同行人過去，期間有一對男女同差人擾攘咗一輪先俾行上去返屋企。後尾鬼佬警司到埸指揮放車，仲用廣東話閙鬼d細嘅做咩俾上亞厘畢道放車落嚟，示威人仕一直喺行人路根本阻唔到車，只係差佬攪大龍鳳。
然後大隊由蘭桂坊往電車路進發，早前有一批帶V煞面具嘅示威者坐咗喺大道中馬路上面示威，被圍補喺環球大厦旁畢打街馬路上面，警方將示威者引入畢打街，亦封鎖及停止大道中行車，慢慢將封鎖線收窄，有目的咁去包圍長毛、阿牛同陳偉業等人，其他示威者可自由離去，到最後長毛、阿牛同陳偉業等人被選擇性而又無警告下拘捕，而有示威者企圖阻止不果，仲被打同被補。
睇翻今次成個遊行，兵分三路分散警力係合適嘅，而去禮賓府可以兵分多路，既然自由行同遊客可以用花園道，而示威者就唔用得，咁下次攪去『禮賓府旅行』，分為A,B,C,D,E,F,G,H.....等等唔同嘅團，由唔同既路線去禮賓府"参觀"，搭車又好，行路又好。鍾意唱歌可以喺禮賓府外咁清幽翠綠嘅環境大聲唱歌，可以"民主歌曲獻CY"，旅行唔犯法啦掛，咁又封路？
今次去到入夜，人越嚟越小，又可能隊伍過於集中，加上部份示威者可能有疲態，結果很快被瓦解。因今次係和平示威，大致上冇人衝擊同突破警方防線，其實係好合作同守法嘅示威。企到上馬路都係警方封路，迫到示威者喺馬路啫，只係傳媒唔報令公衆唔知情。
首先下次直接去禮賓府，集中人手，而路線上可以分散及做好部署同分工。通訊上要有充足準備，可以嘅話安排人員進行拍攝，可讓公衆更全面了解。是否會衝擊同突破警方防線，也是要考慮嘅地方。
倒梁遊行係一個好嘅開始，大家仍需努力！加油！共勉之！