（前言：見到娘娘這篇＜MBBS/LLB學生的一生＞，實在令人思潮澎湃，要二次創作／惡搞一下，＜【亂載小說】我忘不了 妳＞放低先。故事純屬虛構，如有雷同，實屬不幸。不過咁，我又覺得你可以睇左葉政淳幾篇文先。）
「中央政府推出「新香港人計劃」，開辦兩個雙福利計劃，其中一個為免費送奶粉，另一個為免批核綜緩計劃，舊香港人可以做一點社運成績出來，或報名大愛地幫新香港人同舊香港人融合…」
「喂喂，陳輝，快D過嚟望下！中央開左個新殖民計劃要人幫手打舊香港人呀！好似好好咁…」
諗返一年前，就係因為中央呢一單新聞，我呢個偽左翼青年就千方百計咁籌款，幫呢班同胞。其實我都明嘅。中央雖然係中國國土上嘅最高權力，其實未又係得京城同軍隊控制到，無我地舊香港人幫手，點殖民？自己知自己抹黑本土派／香港人唔算叻，由９７年都好比心機寫文入上傳媒諗住寫衰班本土派，即係幫舊香港人捍衛權益呢班呀，生果日月報係不二之選。而家仲有埋幫同胞呢條橋籌款，簡直係一次過滿足哂我三個願望。
最後，十一個籌款箱有四千蚊，另外仲有張人仔，我入左三萬蚊比女朋友（嗚呀真係好有霸氣！）。
社運真係社運，連光環都唔同過人。其他單位都係「愛」做字頭，例如「愛黨力」、「愛港盟」、「愛黨之聲」，唯獨是大中華同中產社運人係分別由「左膠２０４６」、「九十前社會大鑊」呢兩個我都唔知點解嘅組織做骨幹。一個大中華已經夠型，加埋中產社運簡直係型上加型。
入左社運圈，當然要銘記「包容大愛」呢個校訓。社運五件事﹕寫文抹黑、扮可憐、籌款、比D掌聲自己、高調反資本主義—我一定要做齊佢！唔可以白過呢２０４６年嘅大社運青年生活。
舉辦討論會當天，甫踏入群眾，我已經感受到個種與別不同嘅光環氣思。隨處可見嘅Mac機同Starbucks杯，GAP 同麥當勞，我差D以為自己去咗美帝資本主義研討會。雖然我係中產家庭大嘅偽文青，但係我知道單憑「大中華中產社運青年」呢９個字，我地係唔會輸比D本土派。
當我搞掂哂一般嘅讀新詩程序後，突然間係群眾度見到有無窮隻中指指向政總，有好多人係度叫下台、收皮、大話精、交待、黑箱作孽……，好唔和平理性非暴力非操口呀！當我仲未搞清楚係咩一回事嘅時候，我就比人拉左上台。當時仲係第一次拿咪面對咁多群眾的我，當然好希望可以係度吸多D光環，好好咁係享受掌聲。而我相信，係度話：「我地有咁多人，已經係階段性勝利喇，新香港人同舊香港人好快就能夠當家作主，打倒李超人喇，係唔係？」，一定好快成為群眾領導，係呀，我地讀咁多理論係領導群眾，協助他們小組討論的，我講咩唔關事，光環最重要。
估唔到係我問「係唔係？」之後，我真係極速收到反應。再叫「比D掌聲自己！」，雖然拍ge又唔算好多，但我覺得自己好型。完左叫口號後，我哋又唱番首「Do You Hear The People Sing？」，就正式驅散人群。雖然過程係有啲快，但係我個時仍然相信我咁嘅社運生活可持續發展。
2014年9月1日，啱啱好係星期一，第一批新香港人駐港日，亦係我見到社運成果嘅開始。
我一直以為大中華／中產係低人一等，原來係社會嘅一等社運青年。無論係新香港人定本地人，都覺得社運青年幫到佢地。純粹係話，除左要大中華嘅叫咪外，我地可以鬧人嘅次數特別多。社運圈有一個可行嘅方法比我地去同時話幫港人爭取權利同幫新香港人拎福利。結果，本土派傻仔鬧我地飲Starbucks、食麥當勞、用Mac去反對資本主義係打著紅旗反紅旗，新香港人真係以為我地有份舉辦社運去反對佢地.…每一日，對住班傻仔，我就算係過街老鼠，又有咩所謂？
每日廿四小時留意議題，上到Facebook仲要幫手解話：港媽要遷就大陸人餵人奶呀、同路人比人揭存籌款有問題要扮可憐呀、比唔知咩人惡搞要屈無待堂從文壇消失、支持仇人也是鄰舍、人地鬧中國人隨地便溺要鬧佢祈視呀…有時朋友話去寶勒巷飲酒，又無得話唔去，最後訓得一個鐘，第二日又起身睇下有咩議題要騎劫，真係充實。
社運同網上罵戰終於去到不理性地步，係時候旅行輕鬆下。其實因為籌左太多款，我已經無咩擔心，再加上其實我屋企真係中產…最後，我去咗東南亞、中東、非洲玩大半年，但繼續留係Facebook打網戰。
過咗一輪，太多新香港人佔領左整中環同旺角，出入都唔得，但係其實香港邊有咁多地方唔係咁。有好幾次，舊香港人想話買個Condom，落到條街多人到買唔到。最後，係外國人口中得知，原來一個地方人口係有上限。港府所謂嘅移民人口無上限，原來一直呃夠我…
太多新香港人交通癱瘓咗後，亦因為香港食物唔夠（我懷疑本土派議員勾結美帝造成的！），舊香港人要受到食物制裁，無得再有錢就得食，而我的同路人繼續話，新香港人要比錢超市霸權有飯食，好慘呢！我又幫手鬧舊香港人唔應該再歧視有野食的新香港人。但係因為我個旅行去好耐，我唯有日日食花生上Facebook睇戲。
呢一年入面，我籌款、騎劫示威、打網戰、去旅行…換泥嘅唔只係一個光環，個戶口仲多左兩個零添。而咁樣嘅生活，仲要享受多N年。講野唔合邏輯同民情？CCTVB劇集合邏輯同現實咩？香港人照Buy！
8年終於過去，呢8年我只係不停聽到死唔去嘅香港人埋怨，「點解陳輝你要咁離地？」、「唱K未呀你？」、「幾時散水﹖」、「香港因你陸沉」…
2022年12月6日，這天，當我穿起革命裝站在大五星勳章頒獎台上時，我已經on99歲。比起同年舊香港人，我沒有被批鬥死，沒有餓死，沒有被新香港市城管打死。最後，我決定入贅做一個新香港人，因為我覺得比較有大愛。我在旅行學到的常識，只是用上了5﹪。而我卻賠上了反對舊港人捍衛權益的時間，只顧埋首打Status。看著現在的新香港人，個個隨處便溺，把大中華的文化帶到的廣東省香港市。無論金鋪也好，藥房名店好，我相信香港市一步一步融入祖國。那麽，我的夢想呢﹖俗語說，寡夢如鮓。如今，回看當初，到底為了什麽而做大中華中產社運青年？望住眼前呢個香港市永遠榮譽書記，我喜極而泣…
（後記：好離譜咩？無可能咩？唔係有班社運專業人士做緊咩？
不過如果有人要對號入座，覺得我唔應該惡搞佢地嘅，自便～
Btw，玉蝴蝶娘娘原文太高可塑性，唔訓都要惡搞一下。）