攝：獨媒記者Gundam Lam
台灣太陽花學運係由學生衝擊後「成功」佔領台灣立會，當時香港人大叫台灣加油！
香港雨傘革命由9.26 係由一班學生衝擊公民廣場開始，之後俾警察圍堵再以胡椒濆霧對付，當時民憤四起反包圍警察至出動催淚彈導至歷史性“成功“佔領，當時香港人大叫香港加油！
11.18 都係衝擊立會不過結果係「失敗」，「失敗」嘅衝擊者被鋪天蓋地咁鬧「暴力」，佢同之前發生嘅太陽花學運有咩唔同？同9.26事件又有咩唔同？點解佢地係「暴力」呢？
首先假設今次衝擊者係人唔係鬼（間諜），我認為佢地分別有以下地方：
- 太陽花與9.26 事件都由學生帶起，人家對學生都甚有同情分
- 發生時間：今次事件發生在平日深夜，一來香港人要瞓，第日又要返工，亦可能連日佔領已令香港人好攰，同上次9.26唔同，當時香港人仲精力充沛，而且發生係星期五，第日唔洗返工，香港人就同你玩
- 無團體支持：上次9.26有雙學泛民瞓身吹雞用唔同渠道叫人支持，今次參與者俾佢地排除於外
- 成王敗寇心理，9.26-9.28 成功佔領後大家都張事情合理化，點解衝入公民廣場就合理，衝玻璃就唔合理呢？人都係會美化成功咗嘅一方，好似好多人都歌頌曼德拉坐幾十年監去爭取民主，不過就無咩講到佢之前被人迫到要暴力抗爭，去放炸彈甚至最後導至種族同自己人互相斯殺，如果佢失敗咗咁人會點評價佢？今次事件發生係9月27日大家又會點評價衝擊者？
我認為今次衝擊者 （如果唔係鬼）最多可以閙佢無計劃，不過鬧佢暴力真係五十步笑百步，大定係接收訊息方面要多聽唔同意見保持獨立思考！
仲有係今次事件香港人都要好好反思，佔領咁耐仲未有結果已經有人開始另覓出路，不過市民對參與者反應同9.26時已經有好大差別，住後民主路要點走？繼續佔領仲 work？定係佔領同時去試一啲唔同方法，例如不合作運動等。