事件發生於 80 年代的石塘咀，主人翁是約40歲陳生陳太，陳生一家五口（兩夫婦及三名女兒），陳太腹大便便。那年頭開發黃竹坑清理寮屋區，一家五口投靠住於石塘咀的朋友，朋友有舖位於石塘咀跟人分租（今尼斯花園附近），樓下是髮型屋，閣樓原本是貨倉，今丟空著約有四百多呎，生活迫人之下，一家五口住進閣樓。
那年代剛有創業未有華明，波記仍在山道路邊開檔，五芳齋有菜肉包、銀絲卷、客飯，西餐廳有海南有華都，石塘咀舊街市，投注站在新景樓，有金塘酒樓、國邦大酒樓，雅香園，只有林品珍仍在同一位置。
該閣樓原本是朋友當貨倉使用，陳先生搬進時都要清理一下，清理過程中發環了幾盒舊書信，還有幾個藤制行李箱，打開一看全部都是軍票！ 儘管覺得奇怪但陳先生沒有想太多，將幾盒書信及軍票放在一角就算。
陳先生是開泥頭車工作，每日回到閣樓都已經疲倦得要立即入睡，但差不多晚晚都會遇到「俾鬼責」，又驚又怕，但第二朝又要開工，大的兩位女兒又要上學，最小一位女兒只得兩歲多，在家中經常望住牆角、天花、大門等大叫驚驚…驚驚…驚驚，跟著就會大喊要抱著爸媽，而陳太又臨盤在即，所以陳生都不敢跟老婆講太多，只好向借出地方朋友求助。
朋友一直當貨倉使用，做貨倉之前係乜都唔知，暫住商舖閣樓又唔方便裝神位或者地主，唯有去萬盛號問下，試下老人家方法，係窗前裝上清香，向閣樓內空氣中講：我一家五口都係落難被迫搬入黎住，無意務犯，我應承每日清香一注，求大家比條生路我行！ 可能心理反應，果然裝香後起碼有覺好訓。
好快陳太都生左 BB，終於追得到一個男仔，陳生陳太當然開心，但同時代表生活壓力更大。 陳生陳太開始因生活壓力而經常大吵大鬧，每次吵架後陳生就埋怨自己無出色仲生咁多個，陳太就哭哭啼啼，（果個年代都未係好興產後抑鬱症）好多次陳生陳太都想過自殺，但見到幾個小朋友，又忍下衝動............
那夜，陳生又遇上「俾鬼責」，打開眼一刻不能動彈就記得因為同老婆吵架而忘記上香，又後悔又不安又自責，而眼角就見到牆上一大團黑影在亂動，不只是一位，感覺告訴自己是一群，再細心感受到應該係一男…一女…及四個細路仔，一家六口咪同我而家一樣?………正慢慢移近。
呢一團黑影慢慢迫近，陳生心想，死期到了???? 作為大人無所謂，但幾個細路又點呀??? 陳生不知是驚還是急，眼淚都流出來，心裡面話：我無用，我無口齒，你地想點都得，求下你地放過我老婆仔女，我個仔出世都係剛滿月，爸爸都未識叫，若果你放過我，我保證以後唔會唔記得裝香，你肯比條生路我肯幫我，我能夠一家搬出呢個閣樓就帶埋你地走，一直供奉，好好報答！
黑影好似聽到陳生心裡面說話，在他面前眼前忽然消失，陳生立即彈起身！同時間陳太都一同彈起身，四目交投，無講說話，原來一直唔只陳生「俾鬼責」，陳太怕影響老公都唔敢同老公講，兩公婆相擁地哭。
經過這一夜後，兩公婆當然記得每晚裝香，而且都盡量避免吵架，因為佢地總覺得他們一家人一舉一動都被人看著。
好多人會話：比我就立即搬走，但係當你明白生活迫人，唔到你話事之時，情願妥協總好過流離失所........ 而且，搬? 搬去邊? 一郁就係錢，生活就係咁無奈。
又事隔個幾星期，一晚陳生發夢，清晰地見到那一家六口，男女主人都著洋裝，幾位小朋友打份都不錯，應該是那些書信跟軍票的主人.......夢內那位「男主人」淡淡然講了一段話：我見你都係一家六口，又咁慘，我可憐你唔想搵你地一家做替身，我比次機會你，記得做人有口齒呀!............陳生嚇到醒!!!
雖然深刻但要搵食，照常開工，又過了兩天。
香港勝在有 ICAC !! 那年代未有此口號！但係好彩有六合彩！陳生同朋友夾份買 8 個字複式六合彩，真係比佢中晒七個字!!! 兩公婆立即連夜買齊三牲祭品大量香燭答謝 （神）恩，第二天就去跑馬地體育路收錢。
陳生分得接近四百萬，立即買了新入伙的北角和富花園（當時都只需要六十幾萬），火速裝修好就舉家住進新居！
此事本來無人知道，陳生搬離當然將閣樓交回朋友，朋友一日就跟閣樓樓下髮型屋老闆閒聊：阿陳真係中左六合彩搬走，真係好彩!!!
髮型屋老闆娘忽然搭咀：初初都以為阿陳一家捱唔耐.....
下？妳講咩呀？
實不相瞞，其實我經常見到果D野，樓上閣樓住左一家六口，日日準時太陽落山就出去去街，仲著得好靚好似去飲喜酒咁架，但個男個樣好惡架........
妳從來唔講嘅? 唔早講? 等我仲比個朋友住......
點知喎，有得揀都無人會住呢D閣樓啦，況且我用樓下咁多事做乜喎，而家佢地呢家搬走都帶走埋佢地一家啦.......
朋友半信半疑，收到陳生相邀到新居食飯慶祝，在陳生家中發現他的神樓中有一個無名的神主牌被供奉著..........
朋友問及陳生陳太時，他們才將過去經歷一一相告。
完。
--------------------------------------------------
有無想過當生活迫人下，你又敢唔敢作出咁樣嘅承諾?? 撞鬼唔一定死人甚至可能發達，但係你面又敢唔敢先???
西友們，唔好問呢個故事真定假，照例又要威又要戴頭盔，以上故事如有雷同，實屬巧合。