周永康status有講、而如果不是標題黨而有去真係自己用心留意下，都應該get到——「俾一啲期望升級為主嘅人見到，呢種行動未如理想」，從來不是1130行動升級的目標，而是學聯從行動失敗當中汲取到的事後教訓及分析。 訪問言談間令公眾誤以為學聯預先希望升級失敗——呢樣野。斷章取義式指責，算了吧。
如果佢咁講唔啱，點先啱？
話「嗯，其實就算盡力試過升級而唔work，但係呢個運動既呢個moment，再繼續不斷升級其實都係work既！大家快ｄ再搞升級！」
咁就啱？
而我心痛的是，為何還有咁多人覺得學聯欠左佢地。我覺得，是太多人欠了學聯才對吧。當泛民唔知無心定無力、三子一拖再拖、雙黃一陳只懂抽水的時候，是誰屌那媽頂硬上？
我所知道的這班，纔廿歲出頭的同學仔，的確不是那種天縱奇才式救世主，也不是英明神武的強人，當然更不是老謀深算的政治家。（最起碼，未是）我見著他們有怕、有懶、有亂的時候。但一次又一次當他們會怕、會亂、會迷茫，而大把比他們有所謂經驗的人也一樣 (if not更加) 怕、亂、迷茫的時候，他們卻又總是會想，「時代需要我們做甚麼？」，然後就「死就死啦，我地應該要做 / 應該要我地做，就做啦」，然後，就上了。
有些人，天不怕地不怕，固然是值得欣賞的勇者；但更觸動我的，卻是那些能夠與那個「想要放棄退縮的自己」搏鬥到最後一刻的身影。
他們的判斷和決定、以至政治路線，我不見得全部認同。但將心比己，又有幾多人敢講自己勁得過他們？又有幾多人敢講，自己企去他們的位置上，會頂得到那種瘋狂的壓力？本老衲我，自問唔得。
而現在的政治局勢，矛盾之烈，轉變之快，就邊個敢講，如果交由自己判斷就會啱？(除了永遠後設當預言的陳雲老師) 根本香港的大家都未參與過、未經歷過甚至未想像過一個咁既運動。
71大規模公民抗命、罷課大集會、926衝公民廣場，有邊個事先計到？有邊個敢話會掂？大把人覺得唔撚掂。包括我。而他們就是做了，而且打開了這麼大片空間出來。我爭D想quote Winston Churchill向飛行員致敬的演說："Never in the field of human conflict was so much owed by so many to so few. " 整個年代，都欠他們太多太多。
咁行動升級，錯了嗎？我唔知。從結果論，那無論如何，談不上得到任何戰果，談不上是一個好結局，而且損折極重。但當時的氣氛，他們有無得唔咁樣做？
不是學聯想這樣升級，更不是他們想展示「行動升級一定失敗」。而是，根本，在 「好多參與者要求行動升級」的判斷之下，不得不做的一次升級嘗試。而，當時又有甚麼組織，有能力及意志去負責起呢個滿足群眾要求的責任？泛民定三子定雙黃一陳？定係所謂的無大會但又唔見有廣泛自我組織的群眾？我唔明，點解那些事前大大聲說要升級的人事後可以指著學聯 / 雙學來屌；我明但始終覺得心痛，因為在運動的角色不同，其他人也沒辦法去分擔種種指責以至謾罵。為何又是這班同學仔去受哂呢？大佬，廿一二歲仔 / 女，大把呢個年齡既人點樣照顧自己都未撚識，他們卻揹起了一個動不動影響著幾成千上萬人的運動。而幾多人返工做個小小掃把或manager已經壓力爆煲。
而，的而且確，以當時群眾氣勢正走下坡的情況下，這次升級，只要失敗，短期內就沒有甚麼發動更強之總攻的可能。(個人認為其實進攻頂點在929早上之後就過去了) 所以這次嘗試得出的結果，是應該被視為一個極重要的指標，到底之後是要把行動再不斷升級，還是尋求其他轉化。「呢鋪再輸就證明我地要轉過個玩法」，同「呢鋪一定要輸，才證明我地唔適合呢個玩法」，不是好明顯的兩回事乎？
當然學聯人，正如其他任何人，是會有、而且應該有自己的取向和判斷的，肯定是有人本身是不認同個運動應該以不斷升級、不斷加強「行動對抗性」的方式會可以走下去。但他們就是選擇去同大家再試一次，睇下得唔得。我唔明，咁仲想佢地點？在那個脈絡之下，根本就是被挾到唔試唔得吧。
如果講的是行動計劃、操作問題，咁他們既然選擇去承擔起試埋這一鋪的責任，他們最多能做的就是儘量去設計一個似乎能夠滿足大家的方案，然後儘量去操作到最好吧。呢個世界，我唔知點樣可以包生仔。尤其以一個其實得十幾友、年齡／年資又淺的學生團體去做core。我諗唔到，仲可以做到點。無論如何，就算他們可能有人根本不想去進行一個咁既行動，他們就是和大家一起試左了。咁多人話要升下話，咁咪盡力試多次囉，仲想點？
有些人說，周同學過在太坦白。呢種講法，sorry，我真係覺得極恐怖。當然，如果我說，「唔通佢地講大話先叫好先叫啱？」是推得太極端了。但對於內外矛盾都越來越激烈、越來越撕裂的情況下，我實在覺得，我們所能選擇的，只有越來越坦誠，越來越不打官腔，而且要越來越旗幟鮮明，這樣纔能令還肯聽你說話的人們，相信你、信任你，並真正的了解你這條路線的concern是甚麼、追求的價值是甚麼。這個世代，不要再咁多因誤會而結合了。
曾和一位學聯人吃飯，佢問我「你同咩人相處最舒服？」當時我好似唔記得點解無答到。其實我想講的是，就是那些坦誠、humble的人。我心中坦誠和坦白是有一點分別。坦白主要是對人，坦誠則是面對自己，會去嘗試真正地理解自己。而我覺得呢班同學仔，係一班好坦誠、不逃避自己的「人性」的人。
（題為編輯所擬。）