2014年尾我開左獨媒作者戶口，一路都諗緊第一篇文寫乜，諗下諗下又聖誕新年，自然偷懶。然後放假去旅行，人去到檳城怡保自然更懶。諗住過埋農曆年先寫啦。
而呢篇文，係在馬來西亞寫的。2014年1月9日香港收市後爆出黎既呢單新聞，堪稱有今生冇來世。你想像到，其實我去旅行並唔會日夜睇財經新聞 （而我舊同事甚至同老婆去日本滑滑下雪都搵間屋仔黎睇股票，呢啲就打工仔典範）。
但，正所謂你唔理政治，政治搵上門。你唔搵誠哥，誠哥一樣搵上你。我寫呢篇文唔係因為「生於亂世有種責任」（呵欠）。而係因為，我唔睇新聞都好，電話Bloomberg 都自動彈Breaking news出黎，注定我係要寫。因為，真係有今生冇來世。你知，誠哥雖然仲生猛過我同你，但我諗維港投資（Horizons Ventures） 頂多係發明鑽石廳，應該未發明長生不老藥……掛？（發左都唔係話你知啦）。
信我，呢單刁真係有今生冇來世（第三次講）。不少地方呢幾日既新聞都係講法蘭西。但我肯定在香港，大家只會關心誠哥。甚至AV仁都唔會呃到頭條，至於死幾多個回教徒或有幾多回教徒射死人等等，只係啲食飽飯冇野做既左膠（在肯定自己既股票冇乜事後）先會理。
有關長實（1）和黃（13）世紀大重組細節等等，自己睇報紙睇到，不再抄文。有關股價升定跌之類，唔使等星期一開牌，睇星期五晚美國市ADR走勢都大約估到。單刁當中既分析，大把分析員免費同你講，仲幾有水準添。對，這是一個分析員多過股票冧把既年代。
本文旨在拋磚引玉（記住，呢句係萬能免責條款，寫左呢四隻字後鳩噏任何野都可以），只討論兩點。但至少比討論誠哥會唔會買亞視 有建設性
黃子華（好似係佢）都講過李嘉誠係香港既神。而李氏父子更係三為一體聖父聖子聖靈。不過我仲會加埋所有打工仔的典範，霍建寧先生。摩西？唔係啦，霍生做野不知幾快手！
呢個組合，勁過皇家馬德里歷代銀河艦隊，肯定冇乜死錯人。我唔只係講搵錢，搵錢唔難（!），做刁唔難，但自圓其說應付到你班友果下高難度。今次觀乎比較值得討論既，包括 1） 開曼群島， 2）「為股東增值」
先講開曼群島。你去過未？我未去過。你知唔知在邊？可能有人大約知，但不重要。諗起開曼群島你諗起乜？空殼公司。避稅天堂。無王管。隔幾十層都唔知邊個係老細，之類。斷估唔係諗起Johnny Depp套加勒比醉愛日記（The Rum Diary）
之但係，誠哥同霍生冇呃你既係，的確，大把公司在開曼群島註冊丫，你第一日落香港？港交所上市公司最多邊度註冊？香港？梗係冇咁淺。大陸？仇共反蝗正義超人上市既你咁估，但都唔係。正就係開曼群島！差不多600間，即係近四成公司。（而第二位係百慕達，之後先到香港，同大陸）
而我地唔係講緊蚊型公司喎。職業病發作，港交所話你知 ，開曼群島公司，佔左股市四份一市值咁滯，當然係未包括長實和黃（或長和，長地，whatever）。
所以，誠哥霍生冇呃你既係，汽車維修員有個士巴拿好合符邏輯，而公司在開曼群島上市，其實都好合符邏輯，並唔係咩大不了既事， 大家諗多左。況且，去邊註冊，又唔係真係好大影響丫。我仲有份去食曲奇餅既年代，匯控（5）堆大班一樣年年黎香港丫，不過倫敦先係大婆咁解。但總好過怡和系咁，在香港冇上市後，真係問啲後生仔都彷如唔知有呢堆公司存在過。
不過，既然開曼群島冇乜特別，點解過去N年都冇做就而家先做呢，又？ 呢個先係問題嘛！
至於撤資不撤資啦喎，政治青當然樂於呃字數製造網絡垃圾，但老老實實，積尼高遜（Jack Nicholson）話齋，比支槍指住，有乜分別？誠哥一早係加拿大藉啦，學董建華話齋，唔使畫出腸下話？
問題唔係邊度，唔係去邊，唔係點解，而係Timing。
下一篇講埋「為股東增值」