細路哥果陣，爸爸媽媽就教便宜莫貪，天下間無咁大隻蛤乸隨街跳，我地呢d 70、80後當然明白，細路果陣無啦啦話請你食粒糖或者帶你睇金魚都千其唔好信！無想過到而家2015年仲係橋唔怕舊，至緊要你受。
唔去理政治，政治就會將你整理！政治同女人一樣，你可以唔參與但一定要去瞭解，因為你一生中總要面對女人或者政治問題。
2015年區選年，忽然見到好多「地區工作」，甚至委任區議員都開辦事處扮辦事，地區工作係乜？八個大字！「蛇齋餅粽、成功爭取」，而總結政黨地區工作政治show亦係八個大字！「騙徒手法，層出不窮」。
我最鐘意扮離地中產（如果係真就唔洗扮啦），政治嘅野我只識條鐵，乜野都唔關我事就最清高，個個禮拜行山上道德高地就最過癮，但係而家d 騙徒下下燒埋身，我係堅尼地城行黎行去放下貓都不幸被迫要遇上，先有偉大民建聯成功爭取20年先有通車嘅地鐵，再有見到路祭葉國謙（幫你登記做選民寫低你個人資料），一時就見張國鈞抽水（免費幫老人家量血壓，明明有個扮辦事處都要擺街等老人家頂風頂雨），我就唔係特別討厭民建聯 （扮中產最緊要扮中立態度），但我就好憎呢d街頭騙案。
今次風花雪月亂吹一番，因為今日收到疑似騙徒fb pm問我政治看法，有無從屬任何政團，我回覆我係失業散工係咪有藍絲帶筍工？ 對方就唔覆我……… 所以我都寫番篇野敬告各街坊谷友，小心街頭騙案。