對於觀塘果個五千萬嘅音樂噴泉，其實一直都好想寫又一直都唔知可以點寫。因為最主要原因係我同任何人一講「觀塘區議會會用五千萬起個音樂噴泉」，佢哋嘅反應都係「唔係呀嘛，起嚟做乜？」我諗大家唔太需要我寫一篇民情報告去話俾大家聽點解唔需要音樂噴泉，但網上又的而且確欠缺資料去寫偽技術文(我都算半個業界人士㗎，我公司嘅噴水池同玩水區我都有份管理，雖然只係音樂燈光果part)，所以我一直都係forward 其他人嘅文就算。
不過最近睇到啟德海濱發展專責小組原來有份會議紀錄係包括咗「觀塘區社區重點項目：觀塘海濱音樂噴泉」，而且仲請咗民政事務總署同建築署做一個簡報，咁我聽咗佢果個長達49分32秒嘅會議錄音之後又想同大家分享吓，叫做等多啲人明白依家個音樂噴泉究竟搞成點。
海濱公園係邊我諗大部份觀塘人都相當清楚，唔知就麻煩大家自己google 一下。我幾鍾意建築署果位小姐對海濱公園音樂噴泉位置嘅描述：「咁會見到呢..其實呢個地方呢..um..都會有地鐵站去到，咁亦都幾方便果啲行人去到公園嘅範圍嘅。」
方唔方便呢，就真係見仁見智，叫做有條平路唔洗攀山涉水，但一定要唔少於十五分鐘嘅步行時間，穿過工業區先去到。將阿小姐嘅講法重新演繹一次就係「叫做搭地鐵之後行就會去到囉」。大家可能覺得我講呢十五分鐘路程係無的放矢，果十幾分鐘路程就嘈嘈嘈，正一廢青！但實際上觀塘人去呢個公園嘅次數真係唔多，因為佢同觀塘原本個生活圈實在太遠。「我屋企行去地鐵站都要十五分鐘啦，仲要行多十五分鐘去你個死人公園？！」就正正係真實寫照。
好啦，講返個噴泉，或者我係一直都「悔辱」咗佢，因為佢個真名係叫3D 音樂噴泉。雖然我反而想睇吓一個唔係3D 嘅音樂噴泉究竟係點，不過物理嘅嘢，我識條鐵咩。又根據建築署姐姐嘅講法，呢個係音樂燈光水霧效果配合嘅噴泉，有啲水柱射嚟射去，有啲燈呀projector 呀照嚟照去。
詳情請參考輔圖。
「umm.. 同普通嘅音樂噴泉一樣咁吸引」
我其實幾同意某位啟德海濱發展專責小組委員嘅講法，呢個係十年十五年前嘅設計，為起噴泉而起噴泉。近十年嘅新噴泉，包括星加坡、拉斯維加斯、美國迪士尼等等地方，佢哋嘅噴泉全部都有個主題，tell a story(講英文好似有說服力啲)。我自己就覺得呢個係品味嘅問題。我舉個例出嚟大家就會好明白 - 幻彩詠香江。究竟你座中銀閃吓閃下係乜意思呢？究竟你啲商場著燈熄燈，啲laser 射嚟射去又做乜鬼呢？今時今日你唔好同我講你啲水射嚟射去好高科技好勁，音樂噴泉表演個重點唔係音樂唔係噴泉，而係個表演。點樣去配合科技去整合成件事先係一個合資格嘅"SHOW"。講真你科技又唔係新，錢又唔係多，境又唔係特別靚，週邊配套又唔係好，你唔俾少少heart 去設計一個吸引到人嘅show，我都唔知你想點。
而呢個簡報或者暫時任何公開嘅資料俾我嘅感覺呢？
sorry 喎我完全feel 唔到佢嘅passion 囉。
我唔知係咪佢哋都知衰定係點，佢喺個簡報入面唔只一次講到話budget 所限做唔到太多。我都算半個業界人士都估到做到嘅嘢大約都係差唔多，都唔算係呃錢㗎啦。咁無咁大個頭，又何必戴咁大頂帽呢？一個噴泉要起幾多錢，我諗唔洗業界人士，淨係維基都可以答到你。阿潘議員(即係有個觀塘噴泉夢果位)喺佢自己個個人網頁俾咗三段噴泉嘅youtube 俾大家demonstrate一下佢果個觀塘夢。我哋即管維基百科一下：
一個係星加坡嘅Songs of the Sea，二零零七年落成造價三千萬美金。
一個係Las Vegas Fountains of Bellagio，一九九八年落成造價四千萬美金。
一個杜拜The Dubai Fountain，呢個威啦，二零零八年落成造價二億美金。
所以發夢呢家嘢啦喎，我都有個民主夢，不如一齊發呀？
不過阿啟德海濱發展專責小組委員都俾咗個好好嘅建議，佢話不如考慮吓用多啲五感，例如係觸感或者嗅覺。提議係好，但佢無睇清楚題目，呢個係3D 音樂噴泉，唔係4D 音樂噴泉。一早講到明3D 音樂噴泉就係話咗俾你聽咪洗旨意諗學果啲4D 5D 影院加埋哂啲煙呀、水呀、氣味呀、波波effect咁。
而講到點解會有呢個噴泉嘅概念嘅時候，區議會果位人兄(原諒我真係唔知佢係乜水)個解釋係咁：話說一開始諗呢一億可以點用嘅時候，四十個區議員就各自落區問吓啲街坊意見，問吓佢哋有乜期望。咁做哂問卷之後，就收咗十六個建議，所以係由下而上(佢係不斷強調，講咗四五次呢個term)，非常民主咁話。
咁我唔知啲街坊係咪真係咁啱得咁橋同阿潘議員有同一個觀塘夢，定係潘議員本身就係果個街坊啦。總知最後潘街坊嘅觀塘夢就係咁由下而上去咗區議會，最後就成為咗觀塘區嘅重點項目。如果覺得我有屈佢嘅，就請自己聽返會議錄音同潘議員嘅觀塘夢訪問，樣樣係網上都可以搵到，我俾埋link 你又點話。
而佢有個講法都幾有趣。呢個project 係起動九龍東嘅第一部份，當中呢就要睇吓市民嘅反應再去決定第二三四五部份點走。佢用個terms 係"摸著石頭過河"。我唔知依家條河係咪真係咁難過，定係家陣嘅石頭真係要咁貴。我自己就唔係幾接受到一舊五千萬嘅石頭。唔知大家點睇呢？
咁起個噴水池究竟係俾咩人用呢？區議會果條友就話係本區嘅低下階層，可以有新嘅公用設施俾佢哋。但同時呢，呢個又係一個新嘅景點。係現今市民嘅公共空間愈嚟愈細嘅情況之下，區議會竟然諗到一雞兩味，一個地方既俾到普通市民生活，同時又係旅遊景點，而兩樣係可以和平共存互不干涉嘅，實在係蒼生之福。
你可以想像就係當你同你老婆同你仔仔係屋企食完晚飯之後，決定同佢哋花來回一個鐘行過去觀塘噴水池散步。當然你知道噴水池附近係無商店無餐廳無便利店，所以你已經好醒目一早帶定水呀生果呀咁樣。去到當你諗住駐足觀賞呢個一年以嚟都係千篇一律嘅噴水池嘅時候，有一大班國內旅行團團友行過，又影相又拖喼又吵吵鬧鬧。不過當然一年以嚟你哋都見慣不怪，完全打擊唔到你個仔玩水嘅興致。就係你個仔仔衝咗去個玩水區諗住濕身盡興嘅時候，你見到個強國大媽係度洗腳！咁喺呢個時刻... 你叫唔叫住個仔好呢？
文:陳澤滔