「李奧，你知道我們這個時代的問題是甚麼嗎? 人類失去了意義，每個人都是可以被取代的。再也沒有了理想，沒有了理想就沒有甚麼能讓我們比現在的我們更偉大。每個人都在找證據，證明有他存在的世界與沒有他的世界會有一點點差別。」 – 德國小說 「群」（The Swarm）
（含少量劇情，完全唔含劇情真係唔知點寫，但我相信你若果為怕劇透而唔睇呢篇文，會係你既損失）
坊間對飛鳥俠（Birdman）似乎評語幾好，令我有點意外亦有點欣慰，果然香港仲未死。我指既當然係香港「坊間」，美國更加係一面倒讚好。不過聽聞仲係有部份人覺得套戲「好悶」，「唔知做乜春」。甚至聽聞有人以為呢套係另一套Super Hero片，入場先知「中伏」，埋怨導演好「誤導」佢，改埋啲咁既戲名。
真係戲中有戲，戲外又有戲。「飛鳥俠」，就係諷刺呢一啲觀眾。當然好多入場讚好既觀眾佢其實都諷刺緊，但可能你不自知，或冇乜感覺。情形好似呆伯特（Dilbert）老闆睇呆伯特漫畫，都只會覺得「呢條友好熟口面」。
本片主旨好明確，照計你唔使睇呢篇文唔使睇簡介都會知。媽的，呢個年代仲可以有人比人「誤導」入場，唔怪得性交整貨車都有人信。所謂香港地遍地傻西，又一例證。你當然可以理解本片係類似「旺角卡門」式，「做一日英雄好過做一世烏蠅」既古仔。就呢點你可以話佢有丁點似米奇洛基(Mickey Rourke)既「拼命戰羊」（The Wrestler）。一樣係過氣英雄想盡地一煲玩鋪勁。
但當然，本片既主調，其實係諷刺，諷刺各樣既東西。由垃圾既超級英雄片，到無知既記者（不知羅蘭巴特Roland Barthes是誰），神憎鬼厭的影評人，膚淺的觀眾，社交網絡，一窩峰去拍超級英雄片既演員等等。仲有另一主題就係「存在」。唔討好Blogger 唔利用Twitter 冇Facebook Page， 你就等於唔存在。
就選角黎講，好多人都睇得出導演心思。米高基頓（Michael Keaton），唔敢話係超級英雄片始祖，但好多人仲記得佢演過添布頓(Tim Burton)果代既蝙蝠俠。米高基頓唔算大紅大紫，但兩集蝙蝠俠尚算收得。之但係，基頓拒絕再演，然後，雖則不致於潦倒餓死老婆瘟臭屋（廣東話真傳神！），但真係冇一套戲令你記得（Toy Story 聲演Barbie條仔阿Ken唔算掛？）。
咁，咪就係戲入面既Birdman咯！而事實上戲中主角最後一次演Birdman係1992年-正係基頓最後一次演蝙蝠俠（蝙蝠俠再戰風雲，Batman Returns）既年份!問你死未。
就呢點，套戲在選角上，同頭先提到既「拼命戰羊」就似了。米奇洛基一樣係戲如人生，一樣係成名（九個半星期，9½ Week）之後無以為繼，直到拍番「拼命戰羊」，仲同米高基頓而家一樣，提名奧斯卡最佳男主角。而最Q諷刺既係，米高洛基「紅番」之後就拍Iron Man 2！所以你話，「飛鳥俠」係咪好頂癮！
你甚至可以拎番「黑天鵝」Black Swan入面，過氣的雲露娜維達（Winona Ryder）黎比，一樣係咁回事。但「飛鳥俠」選角比「拼命戰羊」同「黑天鵝」更高明既係，就連堆配角，都係演超級英雄片既！愛德華諾頓（Edward Norton）演過新變形俠醫（The Incredible Hulk），愛瑪史東（Emma Stone）更加係出名的蜘蛛女。即係導演話比你知，呢堆演員不知幾識演戲，拎去演英雄片直頭係拖羅打邊爐咁嘥料。不過冇計，垃圾業者肯拍，垃圾觀眾又鍾意。而家本人就示範比你睇，唔使用劍既！
講到尾，就係搭咁大個棚黎抽水。效果亦都相當好。全片特技欠奉，主要特技係用黎抽水，差不多一個長鏡頭玩到尾（其實唔係真係一個長鏡頭，只係扮到好似係）。但值得睇既，除左係演員既演技，仲有係充滿智慧既對白。真係睇少兩句都唔得，莫講話訓著覺。本人就試過不止一次睇戲訓著覺，醒番發現都其實冇乜損失，仲係打緊交炸緊樓。
就種種黎講，「飛鳥俠」係我近一年（唔係講2015年啦下）睇過最精彩既電影之一。票房回報似乎亦都唔會有問題。講真，米高基頓拎得幾多片酬丫？我係佢分分鐘象徵式片酬都肯拍。一個唔該比佢撈到個影帝番黎，真係死而無憾。
不過陰謀論就話，套戲係咁串啲無知觀眾（由超級英雄片票房你就知大把呢啲人，又，本人就好少睇），又得罪片商，甚至連明星都串埋。方丈咁小器，係咪真係拎到金像獎先？
咁又其實，由佢入到圍，拎到咁多提名，就知方丈都唔係咁小器。而市場唔呃人，睇賠率，我們都是這樣長大的（Boyhood）拎最佳電影最佳導演，基本上熱過皇馬拎西甲。但「飛鳥俠」都叫做係次熱。米高基頓就真係分分鐘撈番個影帝番黎添呀，大熱門黎的。
原因之一，我相信係正如上文講，好多人比人諷刺緊都覺得「唔係講我丫」。但原因二更為重要，「飛鳥俠」雖則抵死，對白啜核，又諷刺業界影評記者讀者演員。但其實，真係去得唔夠盡。你見佢夠膽拎出黎玩既，都唔係真係一線紅到發紫既演員或導演。最多串下賴恩高斯寧（Ryan Gosling），或者美琪賴恩（Meg Ryan，一早過氣啦，真係相煎何太急？）個鼻之類。
觀乎編導處理其他場面，肯定唔係唔識挑釁唔識冒犯。是不為也非不能也。難免有評論覺得套戲有點唔夠誠實，表面諷刺建制，其實咪又係心中好想要。呢樣係成套戲唯一一點有點失色既地方。就呢點而言，導演甚至不及昆頓塔倫天奴（Quentin Tarantino）在「玩命飛車殺人狂」入面講「極速60秒」（Gone in 60 seconds）都不忘指名道姓加一句 “The real one. Not that Angelina Jolie bullshit.”