有個鍾意炒股票嘅同事同我講過：「 做咩要反對政府，最緊要經濟好就得喇 ，做咩要攪亂晒？」
我就同佢講：「依家連老廉都唔做嘢，689收5000萬都唔查咁又唔理佢呀？」
同事話：「咁又係，不過拉咗梁振英經濟都未必好喎。」
唉，依個就係典型香港人例子，唔知道廉潔、切實執行制度等核心價值唔只係講緊公義，仲係同香港人視之如命嘅經濟有住唇亡齒寒關係。
香港人咁鐘意炒股票（或叫投資），我就講香港金融行業同股票。
金融業係香港經濟四大支柱(註一)之一，而香港金融業其中一個最賺錢頂目就係幫大陸企業攪上市，咁果啲公司就可以吸外資（外資包括香港資金），但係諗真啲，上海深圳都有股票市場成立多年（1990年成立），做咩唔直接叫外資投資去大陸股票市場而要「咁麻煩」經香港一輪批核審查呢？
有人會話大陸A股市場唔開放呀嘛（B股情況等同亞視），但其實大陸開放渠道俾外資投資大陸股票市場已經超過十年，但係外資反應都係冷淡。03年就開始批 QDII 俾外資行投資大陸，不過批俾外資行啲 Quota 就用十年都未用完，你話QDII限制多，人地先無興趣，咁滬港通限制夠少喇掛，連人民幣滙款限制都冇埋，不過滬股通使用額度唔夠3%，更被稱為「幽靈列車」真係搵鬼坐。
講穿咗其中一大原因就係鬼佬信唔過大陸人做出黎盤數同資訊，所以大陸企業要千辛萬苦經香港審批後係香港上市，盤數打上香港個嘜頭班鬼佬先叫多返啲信心，不過陸企始終係陸企，就算香港上市都可以出事，依點可能日後再講。
究竟大陸嘅數據／資訊做假情況係點呢？
獻醜不如藏拙，都係引用真正大師級人馬意見 — 張化橋
先簡介一下依位大哥（知道佢咩料可以略過）：
張化橋被稱為「最敢講真話的和有良知的分析師」， 因為敢言張化橋曾多次惹禍上身（註1） ，連續4年（2001～2004年）被《亞洲貨幣》評選為最佳中國分析師。
98年 發表雙輸論（註二）俾滙豐炒咗。
2002年發表格林柯爾的報告，因此遭到了起訴。
發表司歐亞農業（沈陽荷蘭村）的質疑也差點為其帶來另一場訴訟。當然，這兩個公司現在都已經不復存在。
本人對張先生實力同誠信頗為肯定，亦非常欣賞張先生對大陸企業做假嘅到肉描述：
「中國的貪污腐敗和地溝油有多麼嚴重，上市公司的假賬就有多麼嚴重，因為它們都是龍的傳人所為，是同一個文化背景的產物。」
大家依家可以想像到做假情況有幾普遍，成個大陸文化都係貪污做假，就好似以前香港做差佬咁，唔收埋一份黑錢就要守水塘，所以想唔做造假都幾難。
而張先生多年來一直提及大陸官商勾結情況如下：
「政府埋下的地雷一般由兩個元素組成：慫恿、縱容和幫助上市公司（和擬上市公司）誇大銷售額、利潤和歷史上的繳稅額；或者給這些公司吃小灶，在土地、稅收、環保和資金方面給予優惠。用低價向上市的國企注資，或者用高價把上市國企的不良資產剝離出來都屬於此類。」
（地方政府點解會咁做？背後牽涉利益輸送同大陸用 GDP 考核地方政府等原因。）
點解大陸做假可以做到咁離譜？其實大陸嘅法律本來係寫得好詳細，但係就無人嚴格執法，亦欠缺監察機制，結果做成嚴重貪污風氣，官商勾結等情況。
反觀本來香港係三權分立，即行政、立法、司法分權進行因而能夠互相監察。
如果我地覺得執法不公（例如濫暴或偏幫某方），我地可以向立法會議員投訴甚至提出司法覆核告上法庭（最近就有人告差佬濫用暴力）。但係係大陸分分鐘
可以由立法機構指使執法機構黎打鑊你（係咪好熟口面？），仲唔洗指意向法庭投訴，人地三權合作嗎。人就係貪心，無監察仲唔作反？
原本嘅香港就係有依啲制度令香港相對廉潔因而令金融市場相對公平，所以先可以廣為世界接受，有日香港變成大陸咁，金融市場都會變成大陸一樣，無外資
會信，大陸亦唔會因為可憐香港再有公司去香港上市，你睇下以前啲廠同貿易港就知喇，取代到你仲有野留俾你咩，仲有，你買嘅股票分分鐘都係假架。
有人會話大陸一直都係咁發展，香港變到大陸咁咪一樣可以發展得好囉。喂，香港可以學大陸咁發展咩？香港夠大陸人工平咁去開廠咩？你肯減人工啲物價都唔肯減喇。咁依家大家都應該睇到核心價值唔只同公義有關，無咗你連個飯碗都保唔住呀！
依家習近平叫我地三權合作，要將大陸個套夾硬塞落香港度，乜你會覺得一個唔會被民意推倒嘅特首仲會為咗香港人利益而同習總 say no 咩？佢仲洗理香港人嘅利益咩？ 689擺譚慧珠依啲舔共人士入廉處係想有個廉潔香港咩？香港人冇權扳倒政府仲會有運行咩？
可能香港人會話邊諗得咁遠，可能係幾十年後嘅事呢，係咪要幾十年我就唔知，不過有單野已經殺緊埋身 — 輸入外地專才，可能香港人都係話
「無事嘅」，邊係搶飯碗呀，諗下以前啲廠話要搬野上大陸做，香港班廠佬咪又係話「無事嘅」，
仲要俾上面啲廠請上去教班大陸人，果陣咪哥前哥後咁叫班廠佬，
班廠佬仲以為自己好醒，結果呢？教識人咪全部香港人飛起晒囉，前後夾埋都係十年左右嘅事呀，依家殺到埋身香港人仲坐係度做乜呀？
好多典型香港人都未必會睇網媒，如果大家同意本文希望可以幫手傳開去，感謝！
註一
香港經濟的四大支柱產業是：貿易及物流業（2012年該業增加值佔GDP的24.6%）、旅遊業（4.7%）、金融業（15.9%）、專業服務及其他生產性服務（12.8%） –
註二
1998年，張化橋在匯豐當中國研究部主管時，因發表“雙輸論”（中國外匯太多，為何發外債？），反對中國財政部發行美元“揚基債”而被匯豐解雇（匯豐是「揚基債」的主承銷商之一）