攝：獨媒記者 Gundam
民陣發起嘅二月一日大遊行告終，一如以往，網上唔少人批評遊行嘅市民鳩行。
鬧遊行D人鳩行，其實咪一樣係鳩鬧。鬧人港豬更加啦，妳／你自己有幾唔豬呢？咪一樣齋鬧，藉此抬高自己而沾沾自喜一下之嘛。就算走出來衝擊慈母嘅防線，咪極其量鳩衝一下，唔見得比長毛呢二、三十年所做嘅野更轟烈喎真係！
呢種律人以嚴，待己以寬嘅輿論係值得同情嘅，個政治現實就係：經濟未崩潰，多數人嘅生活無論有幾難捱，都未去到不顧一切同你個pk政府死過嘅地步，咁作反極是有個譜的。以香港的語境來看，經濟一鑊熟，必包括樓市大崩盤，跌佢至少五、六成，跌到D人信心盡失，樓價有升無跌的神話破滅，物業不是資產，而是債務深淵的代名詞。但真係爆煲，係味就係好事呢?梗係唔係啦，真係亂起上黎，會變成點真係無人知架。只不過，局勢發展既野，總是一大籃子因素互相碰撞嘅結果，好混沌，非個別人所能準確預測及操控囉！
有個讀緊博士的朋友見我FB咁寫，留下一段頗有意思的回應，附錄作結：
「我估經濟崩潰造就革命條件，原因應該在於普羅大眾有幾大程度上係現在制度的既得利益者，當佢地都覺得寧願冇晒而家呢個制度同秩序畀佢的所有野都冇所謂的時候，就真係可以革命了。記得好似係睇 Hobsbawm 時見佢講過，所有的所謂共產主義革命都係發展在邊緣地區而不是資本主義的核心發展區（如西歐），就係因為正正係果d一窮二白的地區覺得革命係真係一個選擇來，因為革命的成本夠低，橫死掂死不如一搏（即真正的「失去的只是鎖鏈，得到的卻是全世界」）。」