文：小草（20150213）
今日方向報法庭版，鬼咁大隻字，話果個疑似斬斷外藉家務工手指的僱主獲判無罪，係「還被告清白」。
其實，只係對個唔知米貴的法官來講，聽落有疑點啫。
個官話，如果被告把外傭手放在砧板上切，不可能只傷到一隻手指喎。咁如果個僱主係拉住她一隻手指呢？果隻手指明明被人斬左「四份三個圓周」，甩出來咁濟，唔通個外傭自己斬自己咩！她來港要先欠下仲介公司巨額債務，如果無得做，兩周內又要被遣返印尼，咁樣做實在對她一點好處都沒有。
個官又話，流好多血無理由仲做到家務！大佬呀，Erwiana被人虐待到咁都做左好耐家務啦，有乜咁出奇？
連方向報自己個標題隔離白色字果段仔文，都只係話受傷原因「永遠成謎」啫，邊有「真相大白」過呀？其實只是就香港的法律來講，要保障無屈人啫－－不過，都要睇下個官膠唔膠，蠢唔蠢囉……
老實講，一個外傭在僱主家中若受僱主傷害，有咩證據都先被僱主抹乾淨啦。Erwiana個僱主本來仲諗住丟她在機場俾張機票叫佢走添，如果不是有同鄉碰巧發現，件事就神不知鬼不覺啦。告僱主要做到「毫無疑點」實在好難囉！
報導又話，個痛哭流涕的被告係佛教徒，叫人地「諸惡莫作」咁話。我唔知佢係咪好人，但憑常識，痛哭的不一定係好人啫，所以要睇下事情係點囉。