文：結束一桶專棄＠宇靜
3月時一眾姊妹在Facebook上爭相奔告，一年一度的Bra界盛事【Wacoal BRA Recycle】又來了，可以幫環保出一分力，仲有50蚊現金劵回贈(限4月30日前用的)，梗係要係柜桶底揾翻所有舊bra出嚟。 望住堆bra係咪真係可以recycle? 但當時已經被50蚊回贈沖昏了頭腦!
但冷靜了一點後再想Wacoal話舊bra可以變成RPF再生能源，RPF究竟係乜呢？查一查原來RPF係Refuse Paper & Plastic Fuel的縮寫， 係利用廢膠、廢紙、木屑及廢布料等，經過破碎、乾燥、壓形、固化，製成固体燃料。 咦，咁即係用垃圾做燃料啦？ 直接燒垃圾，發熱量好低，而且容易產生二噁烷，但轉成RPF發熱效能更好，冇咁易產生二噁烷，而且運輸容易。
嘩！似乎姊妹們可以放心交哂比Wacoal了！
且慢！Wacoal送去邊處製造RPF？舊年有人問過，Wacoal話係香港生產RPF！香港有人做咩？唔敢話香港冇人做，但做咗又是誰用這些RPF再生能源呢？香港可以燃燒RPF的煱爐好似只有兩電(中電及港燈)，但兩電限於條例及技術原因，暫時都未能應用RPF。 咁出口呢？有些國家如澳洲當RPF係pre-treated嘅垃圾是不准許進口的，有些國家如印度、韓國是有進口RPF的。 但詢問吓價錢，一隻四十尺櫃貨價只能收到不足一萬元港幣的貨價，但由香港運費去印度卻足萬元，誰會做這種白做的環保生意呢！ 就以上懷疑問過Wacoal，Wacoal並冇正式回答，最後也不了了之。
今年有姊妹咬住唔放在Wacoal 的Facebook 專頁繼續追問舊Bra的命運，Wacoal最先的答覆是送去東南亞國家轉做RPF之後再將這些再生能源交給做紙的工廠使用，上網查考就知道東南亞似乎好少應用RPF，繼續追問，兩個星期後Wacoal終於答了 : 「最後決定會送到日本Wacoal合約工場轉化成RPF。」從Wacoal 在專頁上的答覆由最開先的”東南亞”到最終決定到”日本”給我的感覺是由「Bra界盛事」推出後才認真想想如何處理舊Bra啊！ 但這回收舊Bra計劃其實已經是第二年話會轉成RPF再生能源了！ 真好奇Wacoal第一年是如何認知RPF的，環保推廣是要由開始到轉化直至物品的結束均要好好計劃的才會是一件美事！ 其實心中還有幾個疑問， Wacoal香港可以收到幾多bra呢？無論幾多，運去日本費用都唔平！就當成宣傳費用的部份支出吧！ 但約以碳排放計算就很不化算了！咦，有些國家是不淮舊衫進口的，未知日本是否一樣？
現在商界潮興扣上環保光環做宣傳，其實對環保又有幾認真及負責任呢？ Wacoal這個宣傳，係日本可能好得，因為他們國內真的有RPF工廠及RPF的使用工業， 但在香港推行一式一樣的項目就可能不全然環保了。(最多是姊妹們的心態上環保了一些吧~)
說到底我們是鼓勵商界積極地作環保利民項目的，那管他們宣傳品牌為首要目的，但也請做認真地做好計劃，並提高透明度，不要抱矇混過關的態度好了。認真的公司認真的事姊妹們是絕對支持的。
姊妹們，究竟要唔要換舊Bra？使錢扮靚容易，點解掉舊嘢咁煩？咁不如買少件，煩少樣啦！