譚仔，我細細個就聽過呢個名。那年中六，譚仔在觀塘開了第三及第四分店（好似係）。兩間鋪之隔，只有半條物華街。一間在物華街中間，另一間在物華街與康寧道交界。還記得成班男同學，分幾張枱坐，擠滿了半間物華街分店。十六蚊一味餸連清湯底，加三蚊多一味餸，加一蚊轉麻辣湯底，加四蚊有一杯冷熱飲品（汽水加五蚊）。至於譚仔過橋米線套餐（下稱套餐），當時只售廿八蚊。
中六男生，食量相當驚人，大部份同學都點了套餐，將空虛飢餓的胃一一填滿。獨是細食的我，只點了一味豬肉清湯。我們點好了米線，隨即拿起筷子，好像整裝待發，誓要把大大碗的米線一扒而空。米線到了，送餐姐姐（應該是姨姨）把幾碗套餐放下在我的左右兩旁，獨有我的，是一碗豬膶清湯米線。
「豬膶？我嗌豬肉，唔係豬膶喎！」
「朱圓刀叉吾多，蝕主仙。」(鄉音：豬膶都差唔多，食住先。）
「我都唔食豬膶！我要豬肉呀！」
「禾邦彌喚。」(鄉音：我幫你換。）
不出一分鐘，新的米線已到。可是，豬膶渣仍浮在白色的清湯上。這證明，只是把面頭的豬膶換了豬肉，湯和米線仍舊是之前的豬膶米線。
「姐姐，我都話唔食豬膶，點解仲有咁多豬膶渣？」我不耐煩問她。
「屎屎朱圓銀屁啦，蝕住仙。」（鄉音：少少豬膶唔怕啦，食住先。）
我與她理論一會，她仍不換一碗全新豬肉米線給我。基於趕時間的緣故，我只能勉強吃了半碗嘔心的豬膶米線。
事隔數日，同學們又來譚仔吃米線。今次我已將「豬肉清湯」寫在紙條上，落單的時候可以遞給她看，不用再「食住先」。
「同學仔埋來，呢度六位。」香港人店長指著冷氣槽邊的圓枱說。
「六位？一張六人枱坐咗兩個人，我哋六個坐埋去咪變咗八個人，點坐呀？」身旁的肥偉毫不客氣問店長。
「坐住先啦，一陣兩位埋單，你哋咪夠位坐囉。」
繼上次的「食住先」，今次是「坐住先」。下次是？
「未有位喎，不如你叫住嘢食先，一陣有位，即刻有得食。」那店長非常周到，免費提供「叫住先」服務。
事隔十幾年後，米線在香港發展蓬勃，總有一間米線食店在左近。而我，仍舊忠於譚仔的味道。最近一次與女朋友光顧，我在門口看一看餐牌的價錢，已經隨通漲而飆升。正常一碗由十六蚊變成廿六蚊，多一味餸加四蚊，冷熱飲品要再加七蚊（汽水加八蚊）。套餐則升至四十八蚊。唯一不變的就是「譚仔文化」：「食住先」、「坐住先」、「叫住先」、甚至最近有「袋住先」（袋住張飛先）。
對於譚仔來說，賺大錢，開分店擴充業務，一定要得。皆因，譚仔訓練了一班說話夾雜鄉音的員工，十幾年以來一直向食客洗腦：「食住先」、「坐住先」、「叫住先」、「袋住先」。然而，對於我這種地道食客來說，究竟我應否「袋住（張飛）先」，然後繼續被這種「譚仔文化」同化？還是，我有更好的選擇？
當下，女朋友把那張「0689」號飛撕掉了，然後用一個華麗轉身，往爭鮮買外帶壽司，回到家中一邊撐枱腳，一邊看《選戰》。
故事內容純屬虛構，如有雷同，乃不幸矣。