（photo 尖沙咀鐘樓 Clock Tower via cc Flickr user Ricky Chan）
政改過後，滿城盡是2047。主權談判、前途自決的問題，卻令我諗起普教中。
自從主權移交，普通話科成為初中、小學必修科，普教中資助計劃零八年啟動，二零一四年已有71%小學同25%中學實行普教中，取個中間數，即是有一半中小學生曾經或現在接受普教中。我99年出世，幼稚園起學普通話，其它九十年代出世嘅朋友，起碼小學經已上普通話堂。千禧後嘅小朋友，接觸普通話嘅機會，必定更多。
姑且將2047推前十年，假設2037舉行前途談判。即是話，我哋自細學普通話，甚至普教中嘅一代人，箇時正值壯年，將會承擔起決定香港前途嘅責任。設想一下，談判桌上，由一班母語係普通話嘅第四代香港人代表香港，會係何種景象？
同聲同氣？梗唔係啦，係「一個鼻孔出氣」，咁先係「規範漢語」。屆時中國代表，大可聲言：「大家都是中國人，文明人說普通話！」唔講廣東話，道氣都蝕晒，重講咩談判？認真隔夜油炸鬼— 冇晒火氣。
跟對方講同一種語言，無可避免墮入佢嘅一套，無論思考、表達，都不能夠忠實呈現自己所思所想。反之，使用母語，正正最為通順達意。故此，語文政策的轉變，必定有其政治意圖。昔日英殖政府英主中輔，設下階級分野，維繫其殖民統治。今日港共出盡千方百計，尊普貶粵，甚至在公共方面逐漸減少使用英文，意圖將香港人「普通話化」，其目的與國民教育、推簡體字無異，均是要香港人接受中國的統治。
有云：「爭個人之自由，即是爭國家之自由。」可見，要爭取群體的自由，必先爭取個人之自由。語言係思想之載體，文化之載體。無語言自主，即無思想之自主，無思想自主，即無個人行為之自主。語言思想行為俱無自主，如何為國家爭前途自主？
故此，行之以久的粵英雙語教學，必須維持到2047，以延續香港的獨立性，抗衡中共傀儡政府的人心整頓。
人口政策同語言文化，係抵抗港中融合嘅兩大戰線。我哋拒絕具體嘅殖民行徑之餘，更要防範軟性、潛移默化嘅文化清洗。普教中猶如癌症，佢無聲無息，令人防不勝防，等到塵埃落定之時，先出來殺你個措手不及。防範勝於治療，唔可以到咗癌症末期先醒覺，我哋要由今日開始拒絕普教中，只因歷史不准我哋後悔。
無論諸位支持城邦建國、民族自決或其他理念，為着香港之自由自主，為着我城之前途未來，還請出一分力，反對普教中。
For the sake of Hong Kong's future, please stand against the ethnocidal PMI scheme.