最近，不少人都給Facebook「大頭照」劃上了彩虹。除了「好靚」、「跟潮流」、「轉咗先算」等原因外，你明白它背後的真正意義嗎？
6月26日，美國聯邦最高法院以五票對四票毫釐之差，裁定全國同性婚姻合法化，往後同性婚姻就跟異性婚姻一樣，受到美國憲法的保障。Facebook為了慶祝這歷史一刻，於是推出「Celebrate Pride」彩虹濾鏡，給你我他以行動支持平權，尊重多元文化。
「吓？！乜係慶祝玩屎忽吖？」聽罷六色彩虹的意義，有些人可能已悄悄換回「正常」相片。至於仍然以彩虹為傲的，說實在又能否切切實實、言行一致地支持同志平權？還是潮流過後，立即左一句「屎忽鬼」，右一句「死基婆」，恐同症復發？
辦公室裡，我們表面上對同性愛持開放態度，用人唯才不問性向，包容所有小眾；即使是教徒亦不敢公然在職場直斥它違反自然，怕被標籤為「耶L」。只可惜，每當遇上疑似gay或lesbian的同事時，我們總喜歡在背後喁喁私語，揣度對方是孿是直，大灑焦鹽花生，毫無底線八卦獵奇。
瞥見新同事手機屏幕是粉紅花花圖案，你心裡暗忖：「見佢平時飲汽水豎起手指尾已經覺得有啲嘢，依家仲用花花公仔咁乸，話佢唔係hehe都冇人信！」
周末下午，你在街上驚遇兩位女同事拖手，頭也不回立刻舉機偷拍兼給友好廣發Whatsapp：「有花生派！以為佢兩個係friend啫，估唔到長頭髮竟然係les！」
得知隔籬同事將要出國公幹，同行的還有某「爆肌男」時，你一臉關心私下相告：「喂，聽講佢係『咩咩』呀！下星期出trip同佢同房嗰陣，記得著多條褲先好瞓！」
上司下個月跟男朋友結束愛情長跑，準備在四季酒店擺酒宴客。當Tom Boy同事眾目睽睽下收到請帖，你半開玩笑說：「你就慘啦，呢一世都冇仇報！」
收到某君的friend request，你忐忑不安，猶疑要不要跟他做Facebook朋友，自言自語說：「喺公司同佢都算有兩句嘅，但我唔係歧視佢，我只係頂唔順佢啲半裸自拍！」
以上花生話，你都聽過或說過吧！
轉了Facebook「大頭照」，用鍵盤支持美國同性婚姻合法化的你，撫心自問真的可以恐同症免疫，接納兩件麻甩佬手撓手逛街，毫無「唔舒服」的感覺？抑或只是思想開明，視覺失明，抱著「基本上我係唔反對嘅，但最好唔好畀我見到囉！」的偏見心態，眼不見為乾淨？
尊重多元，支持平權，憲法的肯定固然重要，更重要的是從我們的日常開始。當男男／女女相戀不再是新奇事，名人「出櫃」不再是報章頭條，同性戀題材不再是電影賣點；直到某日LGBT如空氣般，存在感很低的在我們身邊溜過而不被察覺，無須大驚小怪，毋庸其他大眾挺身力撐時，或許這才是平權的極致。
不要偽善，不要忽然大愛，不要為著政治正確、彰顯個人思想開放而表態。
Email：[email protected]
Facebook專頁：www.facebook.com/peanutoffice