都係聽人講先知今日 Juno 無啦啦上左神枱。睇左幾個post都到喉唔到肺。
首先講一講歌名，《羅生門》同《竹林中》其實係日本一位鬼才芥川龍之介既短篇小說，呢兩個故事都收納係同名小說集《羅生門》入面。而黑澤明拍既電影，係改編自《竹林中》同《羅生門》呢兩個故事，但係大部份情節其實係改編自《竹林中》。該黑白電影由黑澤明既御用男主角三船敏郎主演。所以呢個故事係文字先於畫面，而兩者最大既分別就係電影版存在一個比較客觀既真相，原作則沒有。
小說中既羅生門事件係發生係竹林中，事發後唔同既人物對同一單案件有唔同既過程描述，而互相係有矛盾，根本就有理解無真相。為既係帶出人性醜惡既訊息，人傾向講大話黎自我實現、掩飾軟弱既陰暗面。多襄丸要威威認左武士係佢殺既；武士要逞強聲稱係切腹自殺；夫人跪求紅毛泥保貞節...所謂真相就係大家都吹緊水去掩飾真相。
帶返落隻歌，Juno同人妻唱既歌詞本質係 true or false 既 statement。Hello Kitty or not? Comics or Dickens ? 係無答案既。 歌詞睇到只係兩個人既意識形態，Juno 對浪漫主義既追求，實現係佢對十年後復合仍然充滿憧憬既幻想。幻想去冰島破冰，可以重新黎過。冰島破左產都可以重新黎過，有咩唔得？相信念念不忘，必有回響。有回響了，朋友的確係用黎出賣的，經過舊同學爆料。念念不忘，終於有回響。Kay 出現了，她追求的是現實主義，過去左既野，就由得佢埋係福島decay啦（唔知係咪抽緊水？）。實現方法有提及，相信下一段戀情會更好，要展望未來。
因為歌名係羅生門，男女唱既內容都未必係事實，而且有矛盾。只知道死者姓愛名情，死因不明。到底係 Juno 不解人意定係人妻鐵石心腸？還是可能有第三者？無交代過，羅生門事件任人解讀，完全在於你願意相信那一種價值。當人相信了，就會去自我實現。
歌詞內果一種思念，可以話已經係去到病態既雙思病。那怕係十年？反正我信了。另外，有人話第三部曲就係女主角出場踢穿毒男係一廂情願左十年，我認為呢個只係羅生門既其中一個 possible scenario。亦有可能係第四部曲黎個bbq結局。
最後，點解 Juno 要耿耿於懷念念不忘愛到不像是凡人？期望第四部曲有說書人上身解話。