體育

那些年波牛暑假必備節目

廣告
那些年波牛暑假必備節目

廣告

我諗,每個鍾意踢波嘅男生,或者踢過波嘅男生,都曾經係童年時代參加過足總搞嘅足球訓練計劃。係我個個年代由麥當勞贊助,所以我會簡稱「麥當勞青訓」。

好記得第一次參加個陣,大約係小五,以Grade黎計,應該係D Grade,即13歲以下。其實都唔記得點解參加咗呢個計劃,好似係學校派表格,定唔知係去老麥食野時啲公關姐姐派,唔記得了,總之就係胡里胡塗參加咗。

簡單黎講,計劃分三階段。第一階段係幾十人圍喂威唔理識唔識踢波總之圍埋一齊傳下波猜下波鬥下波每星期玩兩日每次一粒鍾,好波個啲呢就係10堂之後入選第二階段,唔好波個啲就番屋企睇XX戰隊。入選第二階段個啲幸運兒就同教練有份教嘅其他組別合拼,再係當中揀12人出黎入選第三階段,參加分區比賽。
我呢啲柒頭皮,係小五個陣完全唔識踢波,莫講話斬起個波,就連點樣傳地波都唔識,所以第一年參加,去到第一階段已經被foul了。(我好記得去練波個陣我仲帶咗部暴龍機去玩,一邊等開波,一邊係到ununun等打怪)。諗番起以第一次去練波個陣係著住件老翻法國波衫加指定的白飯魚,然後拎住支水加個張證明紙去到球場搵阿sir報到,因為係朝頭早,一定好曬,所以一定要帶水。頭45分鐘猜下波玩下波,然後15分鐘就鬥波,輕輕鬆鬆咁就一個鐘。

我記得我每年都有參加,直到18定19歲爆歲數就無參加。呢7至8年入面,我入選過三次第三階段。第一次,係03年;第二次,係06年;第三次,係07年。頭兩次,我都係打龍門(第二次係被迫),第三次終於可以踢場區球員,但好可惜係做後備兼出場係最少的一個。第一次更加唔好提,比賽柯蛋、甩手、被笠死、彈琵琶樣樣做齊,比人笑到面黃。不過,呢啲都係一種回憶黎嘅,而係呢個有限童年裡入選過兼免費拎到件波衫已經不枉此生喇。(到今時今日我件keeper波衫都仲係唔岩著。)

其實諗番起我都唔知點解以前會咁想參加呢類足球活動,我肯定唔係個啲一定以為自己入到第三階段個班勁人,加上身邊啲同學同我住嘅地方一啲都唔近,所以唔會係朋輩影響,更加唔會係因為想進步而走去參加(雖然都會練到野,但同其他人實力太相差太遠,加上得十堂,斷估唔會十堂由初學者變美斯掛?)所以除咗係因為鍾意踢波之外,我諗唔到其他原因。

鍾意踢波嘅,莫講話參加訓練計劃,就咁同其他街童係公園鳩下鳩下咁踢都覺得開心喇!細個有得玩就開心啦,點似而家大個咗咩都諗太多?雖然我唔記得係邊年開始要比50$波衫錢,但整體黎講,每星期有兩日可以成班人鬥下波又有教練教你點踢波都抵玩嘅。

我個個年代係由麥當勞贊助,所以我簡稱「麥當勞青訓」,但去到06年,好似係06年,確實年份真係唔太記得,麥當勞就無再冠名贊助,無記錯個年係無贊助商,就算入選第三階段都唔會有波衫送,但去到07年搵到新贊助商Nowtv,計劃就由麥當勞青訓變成Nowtv。而後來又唔知去到邊年Nowtv無贊助,轉為賽馬會贊助,如無意外應該係維持到今時今日。

雖然今時今日已經唔再係叫麥當勞青訓,但我仍然改唔到口,係我腦海中,呢個訓練計劃仍然係我當年細細個參加個個嘅「麥當勞」;而每年暑假的日子經過球場,見到啲小朋友係到練波,又或者行過街見到啲o靚仔著住賽馬會個件訓練波衫,我都不期然會諗起當年童年參加訓練時的一點一滴,就好像戴志偉每起一次腳就用5-10集黎回顧自己的一生咁,而那一刻亦會知道,唔,暑假又來了。

足球說故事 Facebook Page

廣告