大地震對尼泊爾造成極大打擊，受影響嘅仲包括足球，雖然尼泊爾紅牛足球聯賽復打，但有三位尼泊爾球員於聯賽暫停時去到鄰國不丹踢波，其中一位係尼泊爾前國腳Rupesh KC(基斯)，七月中正式加盟Clearing FC(不丹交易所)，現時三人已返咗去尼泊爾。
不丹冇職業足球聯賽，但部分球隊有請職業外援，呢次係首次有尼泊爾球員去不丹搵食，由於地理位置接近，兩國一向有足球交流，現任不丹U14主教練，前不丹國腳Nawang Dhendup(敦都)喺2006年就曾經加盟過尼泊爾甲A足球聯賽球會New Road Team(新路隊)，成為首名效力尼泊爾聯賽嘅不丹球員，今次尼泊爾球員外流不丹聯賽，或多或少都係出於互相幫助。
提到不丹外流球員，球迷可能只會諗起今日喺泰國搵食嘅Chencho Gyeltshen(辰卓堅贊)，有中國大陸及香港媒體稱辰卓堅贊係不丹足球史上第一位職業球員，查實唔多啱，Nawang Dhendup(敦都)至係第一位不丹職業球員，而前國腳Nio Chencho就係第二位不丹職業球員，2011年效力印度乙組職業球隊Royal Wahingdoh F.C(瓦希格都皇家)，2012年轉投Luangmual F.C，辰卓堅贊正確黎講係第三位不丹職業球員。