財爺新聞一則《
曾俊華：本港就業市場堅穩，關注中小企生存環境》，閱後有感：
又係神邏輯，舖租貴，係市場使然，人工貴，咁就有損市場嘞。點解唔可以減租加人工呢？到底有冇人明點解要最低工資呢？
就因為市場失效，要法例調節，逼啲業主減租，如果唔減係冇老細肯租嚟做生意，因為最低工資限定，唔可以無限減人工嚟就舖租。低技術工人冇議價能力，冇最低工資法例係可以俾人無限減人工。
咁點解又要「偏幫」低技術工人呢？因為以市場名義，任由貧富懸殊越轆越大，咁終於到一個臨界點，基層就唔會再認同社會遊戲規則，實行返璞歸真，用返原始暴力嚟生存，罪案率會飆升，咁大家都要承受罪案損失同加強保安支出，人與人之間互信程度亦會減低，交易遂要加強保險程序及成本，結果整體社會營運成本加大，競爭力被削弱。
自1967年後，香港太平近半世紀，好多人唔記得67暴動由來，有時求其一句「中共搞野」就當係原因，但係當日如果唔係低技術工人俾廠家無限剝削，令工人爆發連串示威及罷工，中共係無得乘虛而入，到後來放炸彈就係中共玩過火，連工人自己都睇唔過眼，發覺被利用，結果形勢逆轉為全民抗共。
呢點，英國人好清楚，所以隨後唔係秋後算帳，而係改善勞工法例、增加基層福利、立法局引入工會代表、中文合法化改善本地溝通、起公屋，反貪污，帶來半世紀繁榮。
再引申，社會遊戲規則就是法，但係法唔係天跌落嚟，而係人定，係人意，唔係天意。人人會遵守，因為所有參與者都覺得對本身有經濟效益，即係守法著數過唔守法，咁先遵守，所以我唔會神化法，覺得因為怕天譴先守法，而係對人人都公平，個個有著數，咁先守法，否則大家就會選擇天意，即係森林法則，暴力強食。
而要個法能人人遵守，唔係一個天子或一個中央可以定出嚟，而係要從下而上靠共識出嚟，時間拉長，但係法有基礎，打風都唔甩，亦有生命，隨時代民意轉變。而要有系統咁尋求從下而上嘅共識，就係一整套民主制度，層層代議士，程序一籮籮，似是低效益，但相比起冒重歸天意之險，民主成本物有所值，猶如汽車最慳油係拆晒所有安全設備，殼架輕薄，但輕撞即死，似是高效益，但死咗都唔知咩事。
如果法只靠中央，可能每數百年會一遇明君，一條友竟然如神一般睇通世局，廣大人民心意盡在一人心中，又明察秋毫，群臣不敢造次，但係明君一逝，後繼者難以維持，起初還能食老本似模似樣，但慢慢禮樂崩壞，唔使幾耐，無人守法，亂世重現，此時維持管治，唯有暴政，跟住大家又怨天怨地，再候數百年另一明君。。。此循環五千年啦，希望中國人今次學精啦。