無論你有冇睇過都好，講起100毛十個人我諗八個都知喺乜黎。高登仔好討厭依本嘢，因為好多內容都係出自高登，好似東抄吓西抄吓就出到本100毛。巴絲打們嘅不忿我明白，但有一點無可否認嘅係喺香港今時今日有100毛嘅存在或多或少都會令好多九十後喺不知不覺間更加了解自己生活緊嘅香港。香港係咪勝在有ICAC我唔肯定，但好彩香港都仲有本100毛。
今晚（一月十一號）嘅分獎典禮我冇睇，因為我本來對依個節目興趣其實不大。但今日我個FACEBOOK基本上係比佢個分獎典禮霸佔咗，所有人都話好耐冇坐定定喺電視前面睇一個節目，好多人仲專登出去戶外搞直播之後百幾條友一齊睇。依個節目受歡迎程度可能比過往任何一個演唱會更多人留意，因為大家除左鍾意佢地搞鬼嘅二創歌，仲有佢地對「香港人」依三個字嘅執著。喺香港打壓愈黎愈嚴重之下，就算大學同書局都會自我審查，唯獨係100毛繼續我走我路，甚至寧願蝕錢（佢地咁講啦吓）都要搞今晚依個節目，原因居然係因為好玩。香港人而家最需要嘅就係依種為左佢地需要而出現嘅活動同節目，而唔係好似TVB同政府政策咁煮到埋黎你就要食。冇人天生鍾意抗爭，大家都想每晚可以好似今日咁盡情做自己想做嘅野，但奈何而家嘅香港令好多人不得不舉起拳頭抗議，可以好似今晚咁輕鬆過，或者之後就只係得番今晚。
好多人話抗爭係要企出黎，係要流血，而唔係靠個鍵盤就得。佢有佢嘅道理，但問題係好多香港人都未知發生咩事，或者佢地未明白到個嚴重性。有幾多人每人會KEEP住睇港聞時事？有幾多人上FACEBOOK就係為左睇韓星睇拍拖好去處？就我自己觀察返黎，其實唔少大家SHARE出去有關香港政治嘅題材源頭就係來自100毛。雖然100毛九成九唔係第一手資料，但佢地有嘅係LIKE嘅人數（六十幾萬阿大佬）。一件事可唔可以比大眾關注，傳播範圍好重要，難得100毛從來冇避忌過政治題材，用佢輕鬆搞笑式嘅風格去令更多人知到香港到底出左咩事，我覺得單係依點已經比香港九成所謂資訊媒體好好多。你話講資訊性有好多更有見地嘅PAGE？係吖，我夠知有輔仁媒體，我夠知有本土新聞，我夠知有聚言時報啦，你已經係關心政治時事就話會去睇姐，咩無待堂傲將軍健吾分析得更加深入添，但100毛果種散播性同入屋性，除左蘋果日報仲有咩人可以夠佢黎？
雖然100毛有好多負面嘢出現，好似由之前偷片事件到高登一直最討厭嘅抄料等等，但喺而家咁多靠市民賺錢嘅品牌黎講，最比到香港人信心同親切感嘅我諗100毛一定喺前列，最起碼我諗如果問有咩公司願意為香港人發聲發到最後一刻，我覺得100毛會喺果少數嘅一間。雖然我已經冇買100毛依本嘢好耐，但香港變到而家咁樣之下仲有人願意揼本出黎搞一本雜誌而又一直企硬立場，其實我真係好開心。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/