圖：殷奧雲其中一隻手紋上一粒五角星，係緬甸國旗嘅五角星，五角星代表聯邦長存，黃色象徵團結，緬甸球員嘅紋身絕非亂嚟，幾乎都係同自己對國家足球嘅忠誠有關。
睇亞協盃分組賽除咗支持返自己地方嘅球隊踢洲際賽事外，留意對家動態除咗可以增長足球知識，其實都可以係一種樂趣。由於嚟嚟去去都係嗰班，總係會遇到一啲好投緣嘅對手，例如緬甸嘅豪門球隊Yangon United(仰光聯)，繼一二年抽中同公民一組，至今已經同香港球隊交手八次，其中有三場主場對佢哋嘅賽事我都有去睇，除咗外援球員係會更換，佢哋保留咗部分本地球員，因為留意得多同嚟得多，基本上我去到現場唔洗睇樣已經可以從身型、背影及球員手上嘅紋身去認出班球員係邊個打邊個。
隊中嘅隊長艾雲、中場雲迪恩、殷奧雲、菲奧雲、基恩連、後衛亨特、辛尼迪、前鋒喬高高等等都嚟過香港踢過幾次比賽，除咗亞協盃之外，國家隊嚟香港踢友賽都見到以上部分球員，加埋有睇緬甸喺挑戰盃、東錦賽、世界盃外圍賽等嘅賽事，都幾難認唔出佢哋。第一次睇前鋒喬高高踢比賽係透過網上收睇一一年嘅東南亞運動會足球直播，佢代表緬甸U23國家隊踢賽事，當時覺得呢個前鋒都幾全面，比其他緬甸隊友高半個級數，而第一次睇中場基恩連踢比賽係透過網上收睇嘅零九年緬甸其中一場重量級聯賽，當時佢只有十六歲，但已經係球隊正選，後來一直被外媒吹捧係緬甸嘅罕見天才級球員，各種傳佢會去泰國、日本、歐洲發展嘅消息新聞多的是，每次國家隊有比賽呢兩位球員都會被對方重點提防，比如一四年舉行嘅未代挑戰盃，雖然基恩連受傷缺陣，但馬爾代夫媒體報導主要都係將緬甸隊重點嘅放喺呢兩位攻擊球員身上，完全無視其他球員。
直到今年再睇見呢兩位球員，發覺唔知係咪好食好住人工又高，基恩連已經愈來愈肥，雖然個人腳下功夫仲有，甚至比南華部分本土砲好，但突破能力大不如前，傳球質素亦下降，發揮水準之下，喬高高就冇乜點變，底子還有，不過好多無謂小動作，反而最好波係殷奧雲，每次睇呢條友喺中場都踢得好清脆，只不過佢個位置唔搶眼，另外一位就係後防亨特，有唔少後上機會。而個晚仰光聯全隊最好波係巴西守門員費蘭度，諗起此前睇見個啲緬甸守門員大多笑死人，睇嚟緬甸以後邊隊踢亞協邊隊都要搵定外援/亞援守門員，今時今日緬甸足球最弱個範就係守門員。
深入地探索亞協盃對手其中一種樂趣，就係可以睇到好多變化多端嘅事同物，例如曾經被瘋狂吹捧嘅基恩連，因為緬甸U19打入世青賽就由主角淪為配角，現時佢仲愈踢愈肥，都唔知下年會變成點。但唔好忘記，基恩連只有二十三歲，雖然喺緬甸足壇計佢算係一位老將。