開齋節慶典到來印尼足球錦標賽都要暫停，唔少信奉伊斯蘭教嘅職球員都放下足球盡情慶祝，即使開齋節同非伊斯蘭教徒職球員冇關係，但由於係公假，非伊斯蘭教徒職球員都可以趁呢個假期去吃喝玩樂放鬆一下。但喺海外踢波嘅印尼球員就可能冇呢個特權去享受節日嘅快樂，例如效力緊緬甸國家足球聯賽球隊Zeyashwemye FC(薛雅殊邁亞FC)嘅中堅Dedi Gusmawan(古斯馬雲)咁，因為緬甸冇開齋節假期，所以連續兩年與印尼開齋節慶典無緣。
呢位印尼邊緣國腳同大部分印尼球員一樣都係信奉伊斯蘭教，但上年起外流加盟薛雅殊邁亞FC後，因為宗教文化不一，所以錯過好多重要慶典。雖然緬甸國家足球聯賽水平一般，不過古斯馬雲係現時少數印尼外流派中能夠踢到正選嘅球員，最近佢接受印尼網媒網上訪問，表示珍惜外流嘅日子，佢認為現時緬甸足球水平依然不及印尼，但聯賽發展取得好大嘅進步，管理手法甚至比印尼進步，青訓亦好有心機，如果印尼足球繼續停滯，好快會被緬甸超越，呢啲係唔去見識過唔會知，喺緬甸踢職業足球對佢嚟講絕對係獲益良多。
由於開齋節期間緬國聯有賽事，身為球隊正選嘅古斯馬雲冇可能返鄉慶祝，所以開齋節只能喺球隊根據地蒙育瓦嘅清真寺內度過，雖然緬甸人主要信仰係彿教，但唔可以忽視有三百萬人信奉伊斯蘭教徒存在，可能緬甸伊斯蘭教徒經常被壓迫所以非常齊心，見到來自印尼嘅古斯馬雲無依無靠，寺內嘅信徒都對佢照顧有加，即使語言問題都無阻佢哋嘅關係，經常一齊祈禱，宗教信仰已經變成佢哋嘅共通語言。
提起伊斯蘭教徒，好多人對呢個宗教充滿負面印象，某些以伊斯蘭教徒為主嘅國家時有發生迫害其他教徒事件，就算印尼都發生過，但係東南亞及南亞某些伊斯蘭教徒屬少數嘅國家都有發生宗教迫害事件，例如緬甸。有好多小乘佛教徒都好排斥伊斯蘭教徒，原因可以追溯到英國殖民印緬時期，當時英國將信奉伊斯蘭教嘅部分印度人遷入緬甸，但因為呢班伊斯蘭教徒喺經濟上佔有優勢，慢慢緬甸彿教徙就開始仇視伊斯蘭教徒，只因佢哋擔心信仰被威脅最後國家會被伊斯蘭教徒佔據，於是乎就有唔少針對伊斯蘭教徒嘅行為出現。脫離殖民後嘅緬甸政府對伊斯蘭教徒實施高壓管治，此後多年來發生過多單緬甸伊斯蘭教徒被彿教徒襲擊嘅事件，被屠殺嘅伊斯蘭教徒多到數唔晒，甚至有德高望重嘅佛教僧侶公開反伊斯蘭教，指伊斯蘭教徒一日存在緬甸，緬甸人及佛教徒都有危險，要將伊斯蘭教徒趕盡殺絕。
緬甸佛教徒對緬甸伊斯蘭教徒嘅迫害已經顛覆咗世人對佛教嘅印象，行為同伊斯蘭恐怖分子冇乜分別，但要留意佛教都有好多種，亦唔係每一個緬甸佛教徒都主張用極端手法趕盡伊斯蘭教徒，就如伊斯蘭教徒都有分好多種類一樣。幸好古斯馬雲喺隊內並冇感受到有宗教歧視，緬甸隊友同佢關係都幾好，所以佢非常享受緬甸嘅足球生活。