琴晚香港民族黨集會有唔少外媒都關注，即使你係唔認同獨立，都唔可以否認呢兩個詞語近年喺香港社會出現得好頻密，而琴晚呢個和理非式集會係第一次有人如此公開地集合及談論香港獨立嘅嘢，所以好多外媒都有報導呢單嘢，包括印尼，我係八八下印尼波消息而睇到呢篇嘢。
但部分歸信政府嘅印尼主流媒體都忽視呢單嘢，我相信唔係因為撞正奧運，而係印尼國內有地方都有獨立建國嘅聲音，例如亞齊及西巴布亞，佢哋唔想因為類似報導被擺上主流而令印尼國內爭取獨立嘅人感到鼓舞及激勵士氣，佢哋唔想有下一個東帝汶，而且亞齊及西巴布亞有太多天然資源，失去呢兩個地方會打擊印尼經濟，所以對某些海外地方出現爭取獨立建國嘅新聞都會冷處理，一係唔理，一係輕輕帶過。
不過網媒流行之下各式各樣嘅新聞都可以睇得到，只不過印尼大部分人依然倚賴主流媒體發放嘅新聞做人，所以現時印尼政府冇去迫害某些追尋真理嘅私營網媒，甚至係無視，唔係好人，而係因為認為你毫無威脅，所以懶得睬你。