立法會選舉 投票篇
仲有兩日唔夠（4/9），就係立法會選舉既大日子！近日既工作，除左要認真係競選工程，向大眾傳播「如何投票」既公民教育都好重要。我諗，就算幫某位侯選人，鼓勵愈多人發揮自由意志去投票，比議員低票勝利當選更重要。
近日在很多街站總結到一個好大既問題，係社區層面街坊既訊息十分不完全。呢個不完全除左因為一些候選人有議政時差，更重要係大部分街坊仍以為得一票，而當中不乏好多理解力同學識較高既人，例如退休教授、行政人員、銀行從業員和中小企老闆。
講下選票
所以，不如講下投票。其實作為已登記選民既你，當日去到投票站，比身份証工作人員核實，佢會因應你較早前登記既資料分發屬於你既選票。如果你屬某些界別，如教育界、社福界、法律界等等，你有一票可投功能組別既候選人，請將選票對摺並投入紅色票箱，另一票可投屬於自己住果區既直選候選人，票係白色，請投票後放入白色票箱。如果你係一般市民，你有一張可以投（全港性）超級區議會，將藍色票蓋印後對摺投入籃色票箱；同樣，另外一票係地區直選，投下自己心目中既候選人。換句說話，大家會有兩票而不是一票啊，亦可以同身邊親朋戚友尤其係老弱者，讓大家都可以行使最大既公民權利。
講下被種票
有睇過雲海篇野，應該知道被種票既情況唔少，而恐怖在於政府機關同惡勢力混作一團阻礙查察事件。我地可以做，就係幫自己屋企人、幫身邊同住係院舍既殘疾人士同長者，查下個人選民資料有無被更改。呢個唔好講笑，先前已經有「過左身都去投票」，「十室九空無人住都投到票」同「全家都投哂功能組別」既case。
所以大家一定要check，而方法係在以下網址輸入基本資料如身份証號碼，最終睇番你地址同選區有無錯。雖然希望大家都投票，但唔去投票如行動非常不便者，都要check, 因為佢地分分鐘會被投票。
講下投票
講策略，相信有好多，以下列出幾個。
1）講政綱——究竟候選人既政崗係未來幾年做唔做到？有無理想？過往有無議政時差？候選人政黨背景係靠近基層講民生，重政制，定傾向市場講經濟發展？會唔會係地區同議會表決時係講一套做一套？不斷強調政府無資源，定站係民間立場爭取有限既資源？用口號式既語句反對異己提高支持度，定相信選民智慧用社會同歷史性既角度討論不同既議題，提高街坊社會意識？
2）講辯論技巧——候選人係各大論壇之中，對立場夠唔夠堅定？被質詢時對題回答，或是自說自話無限時間強調自己政崗同以往政績？口號式如「你拉布」或「你無恥」回應哂所有問題？問問題係人生攻擊，定真正探訪議題，甚至希望用有限時間讓候選人同大眾討論同關注唔係鎂光燈下既民生議題？問完問題用不斷既「你答啊你答啊你都係唔識答我幫你答」而唔比人答？回答既候選人耐心解決對有關問題既見解？
3）講年幾——有d人會覺得，而家呢個係年青人世界。建制唔洗講，而泛民d議員做左咁多咩都做唔到（事實上本人唔太認同），不如比年青人做，有魄力，換黎新景氣。所以無經驗同具體政崗，都唔係咁重要（？）
4）家庭配票——一家人同一選區可能支持幾位相約政治立場同想法既候選人，因此可以平均地投票，如果一個選區有幾千家庭咁做，絕對可以令心目中既兩三席同時入閘，不致令大黨候選人太多選票。依此理論，同學朋友都可以做聰明配票。
5）雷動計劃——可以裝telegram，加入雷動既策略投票。根據入面不同時段既data base，去投選安全線同入圍線既候選人，一齊做救兵，令多d同一陣營既議員入閘，最終令泛民保留關鍵的三分之一議席的否決權。根據呢點（唔想講都要講），4/9晚7點後，以大局為重，只有泛民同非泛民之爭。好多想睇定d到晚上先投票既朋友，就算支持開本土，若票數大幅落後，都係要轉投泛民較有機會既侯選人。
6）lesser evil（資深退休社工老師莫sir莫慶聯提出既觀點）-
有時未必可揀選，但係都唔一定投白票或者唔投。合心水之人，有時因唔想某政黨當選而坐大，可以考慮投佢既政敵，亦可以係佢既政敵揀一個同自己對社會願景最接近既人。「選舉有時並不一定選賢能，而是選lesser evil。」呢個觀點亦可以為大家提供多一個觀點去投票。
仲有好多投票既方法，大家不妨作集體商討。記得面對今時今日政制幾乎崩壞既香港，任何事都唔好孤軍作戰，投票都係。最後想講講打呢篇文字既原因，因為係街站所知，好多香港人工作忙碌，未必對投票有足夠掌握同理解。如果你覺得好淺白，恭喜你。而你亦有責任，同身邊既朋友尤其係長者去講解仲有兩日唔夠既投票日，促成今次強大既公民運動，多謝你！