題為編輯所擬。
話說上回我地質疑元朗橫洲收地黑幕，點解剩係收綠化帶非原居民村起樓，又唔收埋隔離有塊新世界，留俾佢自己起3座高密度豪宅，今次終於俾我地係份橫洲報告捉到鐵證。
長達3000頁既橫洲解密英文報告裡面，政府消息人士教哂行頭記者應該睇邊part，根本就冇幫大家答到橫洲黑幕一個最關鍵既問題：點解政府收呢邊唔收個邊，個準則係邊度。
哦，原來今次份解密報告字裡行間有寫，就係寫到明話建議要減少影響新世界在橫洲個個位既私人土地（P4），話以免影響該區既發展計劃，但係就再冇其他理據支持。（原文參考報告部分「初步建議選項」第2.2.1.3）
然之後，個報告就修定左個收地劃界範圍，比原本既方案收多左少少新世界一部分囤積既土地，變相令個橫洲發展計劃可以同新世界個發展計劃無縫接駁，同埋同時又收少左啲原居民既丁地，做成非原居民就要急急被滅村，當地鄉紳既丁就可以慢慢套既局面。
明明新世界個計劃到依家一刻都未同城規會申請到個發展權，只係一堆雜草，政府根本唔應該因為佢囤左堆農地就要配合佢起豪宅。如果政府覺得呢個係一貫既做法既話，咁大家就會明哂點解政府偏要揀新界東北農地發展既真正原因，代表所有新界既土地發展計劃都係官商鄉黑。
雖然我都識好多朋友都係做緊規劃顧問，但唔好意思，今次收錢負責做呢份報告既奧雅納（ARUP）都真係好有可疑。政府今次用黑筆劃走哂報告裡面既奧雅納負責人資料，但被記者係另一份文件揭發由奧雅納多人準備，咁事實上有幾多個人準備份文件？有冇人又係一齊負責新世界個發展申請? 奧雅納係份報告咁樣建議收地劃界配合新世界，雖然可能冇諗過事件會曝哂光，但唔覺得自己食兩家茶禮好有問題架？重要係份報告裡面冇理據解釋點解會建議唔好攪到新世界塊地，你間公司以後重講咩獨立專業性？
亦有另一個可能，盲係間顧問公司只係政府既擋箭牌，俾啲錢買保險，其實係政府塞左啲摸底決定入個顧問公司個報告裡面，然後叫佢地修改下條邊界，如果係咁成件事就真係黑上加黑，代表政府除左同曾樹和梁志祥之流摸底之外，新世界都係其中一個摸底之列，咁就係所謂官商勾結既真身啦。
講番個規劃，本來橫洲報告中建議政府會在條路最尾端有個球場，依家新世界痴著既豪宅計劃，將會隊埋條路入番個橫洲計劃裡面，隊到個球場冇左影，即係話唔好以為地產霸權只係影響你既居住問題，依家就年橫洲工業都唔知去橫洲邊度有得打波! 關心體育政策既朋友係時候出動啦。
簡單黎講，橫洲報告係立法會宣誓事件個陣偷雞解密，公開左駁大家時運高睇唔到，認真花啲時間睇其實係黑上加黑（在此多謝仍沒有放棄追查既研究成員及記者朋友）。呢個問題一定要講到出去，唔好俾佢蒙混過關，官商鄉黑繼續肆虐，大家未來都冇運行。