2013年，即係晨曦踢亞協盃分組賽嘅一年，同組一隊印尼對手佩斯寶（Persibo）因為財困搞到面目全非，本地球員都係本身佩斯寶預備組球員、大後備及來自其他低組別球隊，因此參加亞協盃分組賽由出線大熱變成超級魚腩，作客晨曦一仗更因冇糧出令外援拒絕隨隊，只有十二位球員去到香港，最後上演列入經典嘅「0比8」事件，你有冇見過楊腸麟一個撞低兩件？嗰場有得睇！你有冇見過巴利一扭三？嗰場有得睇！你有冇見過球迷捉棋都唔想睇波？嗰場有得睇！你有冇見過有大叫晨曦球員''唔好掂佢唔好掂佢！？嗰場有得睇！你有冇見過敵方後備席得返加埋職員三個人？嗰場有得睇！你有冇見過60分鐘傷到唔夠七件？嗰場有得睇！
呢場一定係亞協盃分組賽近十年最神奇嘅賽事，亦成為近代印尼足球一大醜聞，人人喪插佩斯寶球員扮傷逃避比賽侮辱對手同球迷，但當時門將Happy Kurniawan（Happy仔）完場後卻受到球迷熱情對待，因為Happy仔被公認係隊中最盡責嘅球員，Happy仔本身係佩斯寶三號門將，但佩斯寶財困面目全非，Happy仔升格為正選門將，因為全隊得佢一位門將，留效佩斯寶亦被拖糧要去做苦力同裝修生活，直到佩斯寶被印尼足協禁賽Happy仔至選擇退役。後來又復出踢第三級業餘聯賽，但遭暴力對手踢至重傷，最後康復結婚，老婆係佩斯寶球迷。
今年Happy仔繼續踢第三級業餘聯賽，效力東加里曼丹省球隊Persikutim East Kutai，雖然並非正選，但佢一樣好投入，有一場波佢代替傷咗嘅門將，結果守到完場成功晉級下輪賽事，Happy仔當場痛哭。即使印尼第三級業餘聯賽極少人理，而Happy仔質素仍只足夠踢第三級業餘聯賽，落到第三級業餘聯賽仲要係後備，基本上冇可能上返頂級職業聯賽，但相比佢部分被印尼足協終身禁賽嘅隊友，佢已非常幸運，起碼仲有班落，起碼得到一個靚老婆，踢佩斯寶，絕對可以溝女。