圖一 Ada
義工：「我想證明番年輕人唔係咁魯莽。」
＊＊＊
曾見網上討論， 10/12 民主派的集會有幾多人？朋友說五百，筆者忍不住說，哪有這麼多，不計記者，頂多只有四百來人。
不同派系互相攻伐，樂見對方仆街而等食花生。然而無分左右，大家都失去人民。除了在淫威下徒感無奈，我們同有不可推卸的責任。民心疲乏，我們卻沒有希望和出路。或在眾口鑠金下附和強權；或在沉默的螺旋下無所適從。
儘管讀書必知道「訴諸群眾謬誤」，但讀書是一回事，現實是另一回事。群情洶湧，是什麼令我們與眾不同？唯有自反而縮。面對群眾首要謙卑，大家都這樣想，很可能錯的實屬自己；接下來就要反省，誠實與良知對話。過得到這兩關，就能有道德勇氣。
有兩個年輕人都住在元朗，雖在假日卻在五點起床，為的是去港島擺早晨街站，派反對釋法的傳單。究竟動力從何而來？
＊＊＊
問：點解咁早起身去港島擺街站？
Ada：可能係因為政治氛圍，香港人太多嘢需要面對，大人未必抽到時間。
而且老人家好少上網，我想佢地清楚年輕人的聲音，釋法對我地有幾大影響。監誓人已經認為冇問題，但梁振英點解用香港人嘅公帑，禠奪香港人選出嘅議員？我覺得好荒謬。三權分立，一國兩制，係咪已經蕩然無存？用行政長官嘅身份咁做，其實就係政治打壓同迫害。
所以我覺得出嚟好緊要，即使只有一小步，都要俾香港人訊息。即使佢地未必接受，起碼提醒佢地有依件事；而且派傳單接觸到不同年齡層。即使有中年人見到，問我地做咩，都會話幾好。
＊＊＊
問：是什麼推動你關心政治？
Ada：我今年中六，出年考 DSE。其實同儕都留心政治，但往往流於表面。係香港你發表言論，提交建議，甚至抗議都冇乜用，齋講對香港冇任何幫助。我想由自己行動，去影響其他人。
928 當日我係銅鑼灣學琴，聽到消息話有事，我就仆左過去，見住放第一粒催淚彈，就選擇留係金鐘夏愨道。我同朋友執執吓垃圾，就去幫手搞物資站。中四嘅我本來冇留意傘運背景，因為去左幾日左先上網搵資料，知道 831 落閘等等。
當時形勢好嚴峻，係嗰度通頂，第二朝又去翻學，搞到同屋企人嘅關係好差，同學間的關係亦唔係咁好，可能佢地覺得代價唔值得。而家睇返可能冇乜成效，但至少喚起左我地。
＊＊＊
問：好少見年輕人對政治有這麼大熱情，將來你想做什麼？
Ada：其實暫時未諗到。我自己 FF 就係凡有運動都要出嚟，同埋好似周庭咁係浸大讀政治，就係想讀嗰一科。
＊＊＊
問：自從議員被禠奪議席，抗爭一盤散沙，一片頹唐。但我們好蝕章，明知政府不對，卻難以對外宣揚開去。是什麼令你願意繼續走？又應該怎樣面對？
Ada：其實要為自己搵番個定向。我身邊朋友對政局都好模糊。我想為自己，為朋友搵番一個信念，自己先行一步。我想證明番年輕人唔係咁魯莽。捍衛住本來好多國家都羨慕我地嘅政治自由。
其實擺左兩次街站，幾好，冇問題喎。係銅鑼灣嘅街站，有中年人係咁鬧，我地要拉住義工姨姨。但係唔出聲，就係進一步嘅打壓。前路幾難行都好，都要摸住石頭過河。
＊＊＊
圖二 Oz
問：點解咁早起身去港島擺街站？
Oz：擺街站唔係剩係派傳單，係同市民溝通。可能有啲人鬧我地一味搞事之類，中年嘅義工比較容易嗌交，我會比其他人更努力向佢地解釋。
其實一埋嚟就鬧嘅人，係建制中比較激進，下下搭嘴的話，會變成冇 point 嘅罵戰，我會起碼俾佢講完，先同佢逐樣講。不可理喻的話，就不斷點頭，講「多謝你嘅意見」。
＊＊＊
問：是什麼推動你關心政治？
Oz：我爸爸親建制，做過區議會非民選的委任議員，係建制組織好活躍。細細個爸爸就會同我講建制嗰套。到中學我受老師同友儕影響，知道左另一套。
之前一直只有討論，但冇出嚟行動，傘運係行動嘅觸發點。當時我係 year 1，同學參與罷課，928 約埋一齊去金鐘，見住第一個催淚彈爆，「點解要咁做？」更加推動自己係度。
屋企人一直唔知我出嚟，直到係報紙見到我，有啲嬲，「就算你支持民主，都唔好做走出嚟嗰個」。立法會選舉前幾星期，去幫手冇返屋企，俾佢地話「又冇錢，俾人認到又搵唔到工」。
我覺得雙學（學聯、學民）係傘運中有價值，雖然佢地俾人話，但我認為值得欣賞；二來我認同非暴力抗爭同民主自決。
＊＊＊
問：經過政治洗禮，將來你想做什麼？
Oz：我自細對科學好有興趣，係城大讀過工程，又係恆管讀過 Data Science，但始終唔係自己想嗰科，一再重考 DSE，先入到港大讀 Biochemistry 同 Environmental Science。好多人都問我點解唔讀政政或社會學，但我覺得政界好少依方面嘅專家，而家我都會學政策研究，比如土地、環保議題。
＊＊＊
問：自從議員被褫奪議席，形勢好差，不單因為政府打壓，而且我們意志低沉。各派互相譏笑對方的集會人數，但其實沒有分別。是什麼令你願意繼續走？又應該怎樣面對？
Oz：一開始個勢差，因為淺黃或者溫和的民主派，都唔係好認同講「支那」，「唔好理，唔好幫」，唔想攬佢地上身。一攬上身就會令市民誤會，撐佢地即係覺得講「支那」冇問題。
我地要花多啲時間蘊釀情緒，民間嘅討論其實未夠多，好多人覺得「抵死」就算。依家形勢已經好少少。所以擺街站最重要係俾中間派別知道，要捍衛嘅係民主權利。
＊＊＊
問：好多人都覺得港大是「革命勝地」，香港民族論的發源地。剛才聽到你的政見，或者與獨派有別，你怎樣與他們相處？
Oz：以前係反國教，就算偏向右翼，都可以投身同一個運動，後來就互相排擠。但我覺得碎片化會改善，反釋法遊行到中聯辦，左翼同右翼有互相溝通，一齊傾點樣配合。因為初一事件，本土派被定性為一定要勇武抗爭，但到後來其實唔係下下都要訴諸暴力。
我住 Hall 嘅同學，門口都會貼「香港獨立」等標語，知道佢地唔認同自己個套抗爭手法，但依然可以互相尊重，一齊討論。
＊＊＊
後記
選委會競選一如立會選舉，都在機場博覽館公布結果。筆者不自量力通宵，回家後「囡低」兩次，睡過十小時才回復正常。在 fb 坦白後一天，赫見獲勝的黃任匡也寫了感言：
「打從雨傘運動開始的兩年來，昨晚我是第一次睡超過6小時的。」
我趕緊屏蔽掉自己帖子。
現在進出新西，偶然還能碰到小巴有周永勤的競選廣告。但沒人再有感觸，就似陳冠中的新作，「什麼都沒有發生」。不過數月，立會選舉的沖喜已經一點不剩，兩個獲勝的議員，霎時一無所有，比小說更離奇，但人民的反應完全不成正比。
希望自己的記憶沒有錯，但身在其中，親眼見證每一個人是如何努力過。即連筆者也痛改前非，以人生最高速度寫出十篇訪問（goo.gl/HomJFO），雖然選舉過後故態復萌。
結果呢？一場空？
楊德昌曾為《牯嶺街少年殺人事件》說：「獻給我的父親及他那一輩，他們吃了許多苦頭，使我們免於吃苦。」源於他為電影作背景調查，「很驚訝白色恐怖時期，幾乎每個朋友的父親都進去過（監獄），幾乎每一個！」
現實挫折了我們每一個人。回歸日常，我們就成為地鐵裡的沙甸魚之一。不甘心，卻承認這是人生。
我們遭受的壓抑，愈來愈似白色恐怖的開端。沒有其他可能，去到盡頭，漸漸失去情感，只能接受。
香港也有如《牯嶺街》的史詩。但要成為電影，我輩亦須如楊德昌的父輩，承擔同一命運，才能有這一天。
＊＊＊
最後還想作一小小實驗，希望投過六位議員的市民都來留言。請說說為何投給他們？除了投票還怎樣支持過他們？現在你們會怎樣做？謝謝。
（標題為貝克特詩作，摘自吳叡人《受困的思想》）