今日省港盃呢我係用廣體睇嘅，發現旁述好鐘意叫呢位有助攻嘅港隊球員做楊麒麟，不過唔緊要啦，香港好多旁述都成日叫錯球員名啦，亞視仲存在世上時直播印尼明星對阿仙奴，旁述都係叫印尼球員做爆炸頭、光頭佬、Punk頭人等，楊賜麟三個字啱兩個，非常好㗎喇。
我就認為呢隊C隊都嚟緊嘅本土派港隊表現幾好，面對住實力大約同越南國家隊相約嘅廣東隊都組織到唔少攻勢，輸2比3都收貨啦，希望返到主場有多啲球迷入場，可以的話唔好黐住部電視及手機吧，返工返學嗰啲冇計啦，食住熱狗（與熱血公民冇關）坐住廂房（有開的話）睇波的話感覺都幾好㗎。
另外今場波黎洛賢幾搶眼，佢喺低組別時期已經好J，其實好似佢呢類球員低組別有唔少，只可惜可能搵食問題有投身頂級職業平台（嚴格係半職）意願嘅極少，但因此亦證實低組別聯賽喺香港球壇係有重要性及存在性，並非可有可冇嘅業餘圍威喂聯賽。