喺防止學生自殺委員會最終報告的公聽會，吳克儉口講專業、同社會溝通，但份報告就毫無學生嘅聲音，亦都反映唔到學生嘅情況。
防止自殺委員會份報告個方向同態度本身有問題。依家有問題嘅唔係班學生，係個教育制度。但係份報告就將錯於係學生唔受得壓力等身上，但係就包庇教育制度。你唔解決個制度最根本嘅問題，就算你搞幾多推廣精神健康 及消除負面標 籤運動，都解決唔到。真正要處理嘅，係依個害死人嘅教育制度。在中學時我接受過兒情計劃，接受左一年輔導。但係翻學、應試已經夠攰，何來時間心機接受輔導？
依份報告係好唔負責任。將責任推哂俾社交媒體同傳媒，歸究於學生欠缺生涯規劃，然後就話學生自殺的成因唔係是源於教育制度，與教育系統所衍生的學校壓力與學生自殺並無直接關係。我完全無法理解依份報告點解可以咁表面完全就無重視過啲生命，一味只係諗住維持依家嘅制度。唔好話份報告唔關吳克儉事，佢不知幾咁高興份報告話學生自殺同教育制度無關。
今時今日嘅學生，之所以會絕望、尋死，固然有好多原因。但可肯定嘅係教育制度係其中一個好重要嘅因素。對學生黎講，特別係香港學生，教育幾乎佔據哂佢地嘅24小時，佢地選擇離開點會同教育制度無關？成個社會都同你除左考好成績就無出路。然後學校學嘅野又係為左考試，根本無意義，一啲關於學生的身心藝術發展等元素都都唔被重視。好似吳克儉所講，唔鐘意考TSA咪轉校囉，依家委員會、教育局就係咁嘅態度對待學生。學生除左跟住個規則玩，仲有咩選擇？考唔好就好似好無將來咁。
教育，就係要俾學生掌握獨立思考同學習嘅能力，而唔係要學生去配合個考試制度。成個教育制度就係將學生變成淨係識服從嘅齒輪。咁樣嘅教育完全忽視學生個體嘅需要，排斥哂啲有學習差異或者唔想跟住個咁死嘅制度嘅學生。但明明唔係學生錯。
唔係佢地蠢，而只係個教育制度太狹隘，容唔下一啲有自己諗法嘅學生。
依家嘅教育制度着重考核評估，係咁嘅教育方針下，學校間為排名互相競爭，逼啲學生過度操練試卷。學生為考試疲於奔命，花好多時間去補習，為唔好被淘汰。但有咁多個學生選擇輕生，政府始終不肯去面對這個事實。我地要以人為本，而唔係功利掛帥、視師生為經濟產物嘅教育制度。市場向導的教育的最終令評核學生能力的方式單一、僵化。公開考試係唯一準則，變相應試主導了教育，教育只注重競爭。但辛苦競爭後，我地面對嘅將來，係無將來。
防止學生自殺民間聯席要求立即撤換教育局局長、改革教育制度、政府組成跨部門小組跟進事件。