今年亞協盃嚟過大改革，分組賽方面會細分多區，即係話分組賽唔會再有南亞嘅印度、馬爾代夫及東南亞嘅星馬緬菲或香港球隊撈埋一組多P，減少東亞球隊同南亞及東南亞嘅足球交流，而分組賽細分多區後若果因為分數被越過而令香港球隊未來要降返去踢亞協盃嘅話，就會有機會出現兩隊香港球隊及兩隊朝鮮（北韓）球隊同組嘅情況。
我哋對北韓足球聯賽所知極少，外界流傳嘅北韓球隊一啲故事大部分都係來自中國、南韓媒體再由港台媒體轉述，比如當地頂級聯賽「最上級足球聯盟戰卜」，「425」等同北韓國家隊，每位球員都有軍方背景，機關車因為地近新義州有唔少球員都係從商嘅華人球員，平壤就係425二隊，小白水同鯉明水就係北韓青年球員培訓專隊。仲有啲好誇張，例如有球員踢聯賽手骨折都會堅持踢足全場，球員表現差會畀政府掟去做礦工或判死刑。
而過往北韓國家隊出戰國際賽事，官方引述嘅資料顯示部分球員來自425，相信等同北韓國家隊呢個講法都係堅，不過一定唔係全隊都係常備軍，球員係咪有軍方背景可能只有北韓當地嘅少量人至知，而小白水同鯉明水確係以青年球員為主，但都有超過25歲嘅「年長」球員，不過所謂官方資料係咪真實，可能只有北韓當地嘅少量人至知，係咪有球員踢聯賽手骨折照踢，可能係中國記者亂吹，可能係真，只有北韓當地嘅少量人及去實地採訪嘅記者至知，機關車係咪招待華商嘅球隊，只有北韓當地嘅少量人至知，但去做礦工判死刑我就相信係其他國家嘅媒體加料，若果幾場波就可以判球員死刑，咁北韓國門李明國應該死咗幾年，上年東亞外圍賽就唔應該見到佢。
就係因為北韓太封閉，好多外露嘅消息真偽成疑，令到北韓球隊非常神祕，因為北韓上年「最上級足球聯盟戰」有幾多隊都末必知，收北韓風最多嘅中國及南韓媒體放啲風好多都未必堅，更唔好話有冇轉會市場及算唔算職業聯賽，至今都係一個謎。所以好多香港球迷認為大改革後反令香港喺亞協盃更難踢，因為眾人耳聽返嚟嘅傳聞都指北韓球隊非常強大。
查實近幾年北韓「最上級足球聯盟戰」或乜鬼萬景台盃喺網上都能夠輕易搵到全場賽事重溫，而且北韓中央電視台係有方法搵到Streaming，而北韓中央電視台間中係有播波，球迷可以睇到參加「最上級足球聯盟戰」嘅球隊大約咩料，但有時比賽認真度會令人懷疑，好多匪夷所思嘅默奘波，而且近年Streaming時有時冇，甚至我都懷疑自己係咪睇緊假Streaming？
近年嚟講北韓球隊並唔算十分神祕，喺幾年前有派鯉明水參加過2014年亞洲足協會長盃（主席盃），當時隊中有李光赫、李赫哲、張成赫、鄭日冠、金京一等國腳，亞洲足協YouTube直播冇IP限制任睇只不過冇咩人睇，最後過關斬將去到決賽不敵同樣冇外援嘅土庫曼球隊HTTU，雖然小組賽只能迫和菲國嘅塞列斯，但之後迫和HTTU出到線，決賽週面對全職兼有外援嘅孟加拉球隊Sheikh Russel都能輕鬆大炒。
現時北韓球員質素當然比香港球員好，不過冇外援及主席盃球隊除土庫曼外水平麻麻，去到亞協盃層面又要另計，所以香港球隊未必同北韓球隊冇得打，如果想知北韓球隊咩料，留意香港球隊踢亞冠之餘都可以八下亞協盃北韓仔咩料，不過分組賽應該睇唔到啲咩住。